AKP បន្ទាយមានជ័យ ថ្ងៃទី៥ ខែកញ្ញា ឆ្នាំ២០២៦--ស្របពេលប្រាសាទបន្ទាយឆ្មារ ដែលជាសម្បត្តិបេតិកភណ្ឌវប្បធម៌ដ៏មានតម្លៃរបស់កម្ពុជាកំពុងក្លាយជាចំណុចទាក់ទាញសម្រាប់ភ្ញៀវទេសចរជាតិ និងអន្តរជាតិ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងលោកជំទាវសិរីករុណាបុទុមរតន៍ អគ្គមហាឧបាសិកាបណ្ឌិត ម៉ៅ មាល័យ បានអញ្ជើញអុជធូប ថ្វាយគ្រឿងសក្ការៈព្រះអវលោកេតេស្វារៈ និងបួងសួងសុំសេចក្តីសុខ សេចក្តីចម្រើនជូនជាតិ និងមាតុភូមិ។ 
ពិធីដ៏មានអត្ថន័យនេះ បានប្រារព្ធឡើងនៅប្រាសាទបន្ទាយឆ្មារ ស្ថិតក្នុងស្រុកថ្មពួក ខេត្តបន្ទាយមានជ័យ នាព្រឹកថ្ងៃសៅរ៍ ទី៥ ខែកញ្ញា ឆ្នាំ២០២៦ ដោយមានការអញ្ជើញចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ថ្នាក់ដឹកនាំ កងកម្លាំងប្រដាប់អាវុធទាំងបីប្រភេទ មន្ត្រីរាជការ និងអ្នកពាក់ព័ន្ធជាច្រើនរូប។

ក្នុងបរិយាកាសដ៏ស្ងប់ស្ងាត់ និងពោរពេញដោយសេចក្តីគោរពចំពោះសម្បត្តិវប្បធម៌ជាតិ សម្តេចកិត្តិសង្គហបណ្ឌិត ម៉ែន សំអន បានអញ្ជើញថ្វាយគ្រឿងសក្ការៈ និងបួងសួងដល់វត្ថុស័ក្តិសិទ្ធិក្នុងលោក ព្រមទាំងគុណបុណ្យព្រះរតនត្រ័យ មានព្រះពុទ្ធ ព្រះធម៌ និងព្រះសង្ឃ ទេវតាថែរក្សាព្រះស្វេតឆ័ត្រ ទេវតាថែរក្សាចក្រវាល និងទេវតាឆ្នាំមមី សូមជួយអភិបាល ប្រោះព្រំ បីបាច់ថែរក្សា និងប្រសិទ្ធពរជ័យដល់ថ្នាក់ដឹកនាំ និងប្រជាពលរដ្ឋខ្មែរទូទាំងប្រទេស។

សារនៃការបួងសួងរបស់សម្តេចកិត្តិសង្គហបណ្ឌិត មិនត្រឹមតែជាការបង្ហាញពីជំនឿ និងប្រពៃណីដ៏ល្អរបស់ប្រជាជាតិខ្មែរប៉ុណ្ណោះទេ ប៉ុន្តែថែមទាំងបានឆ្លុះបញ្ចាំងពីបំណងប្រាថ្នារួមរបស់ជាតិ ដែលចង់ឃើញកម្ពុជាបន្តរក្សាបាននូវសុខសន្តិភាព ស្ថិរភាព សុវត្ថិភាព និងការអភិវឌ្ឍកាន់តែរីកចម្រើន។

សម្តេចកិត្តិសង្គហបណ្ឌិត ម៉ែន សំអន បានបួងសួងសូមឱ្យសម្តេច ទ្រង់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាងកញ្ញា និងប្រជាពលរដ្ឋនៅទូទាំងប្រទេស សមប្រកបតែនឹងសេចក្តីសុខ សេចក្តីចម្រើន និងវិបុលសុខគ្រប់ប្រការ។

ជាមួយគ្នានេះ សម្តេចកិត្តិសង្គហបណ្ឌិត ក៏បានបួងសួងសូមឱ្យប្រទេសជាតិជៀសផុតពីជំងឺឧបទ្រពចង្រៃ និងគ្រោះធម្មជាតិគ្រប់ប្រភេទ ព្រមទាំងសូមឱ្យកម្ពុជាកាន់តែមានភាពទាក់ទាញសម្រាប់ភ្ញៀវទេសចរជាតិ និងអន្តរជាតិ ដើម្បីរួមចំណែកជំរុញសេដ្ឋកិច្ច និងបង្កើតឱកាសការងារ និងប្រាក់ចំណូលជូនប្រជាពលរដ្ឋ។

ចំណុចដែលមានអត្ថន័យជាពិសេសនៅក្នុងការបួងសួងរបស់សម្តេចកិត្តិសង្គហបណ្ឌិត គឺការផ្តោតលើកងកម្លាំងប្រដាប់អាវុធដែលកំពុងឈរជើងនៅតាមបន្ទាត់ព្រំដែន។ សម្តេចបានបួងសួងសូមឱ្យកងកម្លាំងប្រដាប់អាវុធគ្រប់ប្រភេទ ដែលកំពុងបំពេញភារកិច្ចការពារជាតិ និងឈរជើងនៅជួរមុខ មានសុខភាពល្អ សុវត្ថិភាព និងទទួលបានជោគជ័យក្នុងបេសកកម្មការពារបូរណភាពទឹកដី។
 
ក្រៅពីនេះ សម្តេចកិត្តិសង្គហបណ្ឌិត ម៉ែន សំអន ក៏បានបួងសួងសូមឱ្យប្រជាពលរដ្ឋខ្មែរទាំងអស់ទទួលបានជោគជ័យគ្រប់ការងារ សម្រេចរាល់បំណងប្រាថ្នា និងឱ្យប្រទេសជាតិបន្តសម្រេចបាននូវវឌ្ឍនភាពថ្មីៗជាបន្តបន្ទាប់។ នេះជាបំណងប្រាថ្នាដែលភ្ជាប់ពីសុខសន្តិភាពរបស់ប្រជាពលរដ្ឋ ទៅនឹងការរីកចម្រើនរបស់ប្រទេសជាតិទាំងមូល។

ការជ្រើសរើសប្រាសាទបន្ទាយឆ្មារជាទីតាំងប្រារព្ធពិធីបួងសួងនេះ ក៏មានអត្ថន័យជ្រាលជ្រៅផ្នែកវប្បធម៌ និងប្រវត្តិសាស្ត្រផងដែរ។ ប្រាសាទបន្ទាយឆ្មារ ជាសំណង់បុរាណដ៏ធំមួយដែលត្រូវបានកសាងឡើងនៅចុងសតវត្សទី១២ និងដើមសតវត្សទី១៣ ស្ថិតនៅភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។

ការបួងសួងរបស់សម្តេចកិត្តិសង្គហបណ្ឌិត ម៉ែន សំអន នៅប្រាសាទបន្ទាយឆ្មារ នាពេលនេះ អាចចាត់ទុកជាការបង្ហាញពីការភ្ជាប់គ្នារវាង ជំនឿ សន្តិភាព បេតិកភណ្ឌវប្បធម៌ និងក្តីសង្ឃឹមសម្រាប់ការអភិវឌ្ឍជាតិ។ ពីទីតាំងបុរាណដែលបន្សល់ទុកនូវស្នាដៃដ៏អស្ចារ្យរបស់បុព្វបុរសខ្មែរ សារនៃការបួងសួងនៅថ្ងៃនេះបានបង្ហាញពីបំណងឱ្យកម្ពុជាបន្តដើរទៅមុខប្រកបដោយសុខសន្តិភាព ស្ថិរភាព និងវឌ្ឍនភាព។

ជាចុងក្រោយ សម្តេចកិត្តិសង្គហបណ្ឌិត ម៉ែន សំអន បានបួងសួងសូមឱ្យប្រទេសកម្ពុជាបន្តមានសេចក្តីសុខ សន្តិភាព និងការរីកចម្រើន សូមឱ្យប្រជាពលរដ្ឋទូទាំងប្រទេសមានសុខភាពល្អ ជីវភាពកាន់តែប្រសើរ និងសម្រេចបានគ្រប់បំណងប្រាថ្នា ព្រមទាំងសូមឱ្យកម្ពុជាសម្រេចបាននូវវឌ្ឍនភាពថ្មីៗបន្ថែមទៀត ដើម្បីឱ្យមរតកពីអតីតកាលដូចជា ប្រាសាទបន្ទាយឆ្មារ ក្លាយជាមូលដ្ឋានសម្រាប់កសាងអនាគតដ៏រុងរឿងរបស់កូនចៅខ្មែរជំនាន់ក្រោយ៕

ដោយ ឈុន សារ៉ាត