AKP ភ្នំពេញ ថ្ងៃទី០៤ ខែកញ្ញា ឆ្នាំ២០២៦ -- អង្គការយូណេសេហ្វ(UNICEF) បាននិយាយថា កុមារប្រមាណ ២០លាននាក់ដែលមានអាយុពី១២ឆ្នាំ ដល់ ១៧ឆ្នាំ ឬជិត ១នាក់ក្នុងចំណោម ៥នាក់ បានជួបប្រទះនឹងការកេងប្រវ័ញ្ចផ្លូវភេទ និងការរំលោភបំពានយ៉ាងហោចណាស់មួយទម្រង់ក្នុងមួយឆ្នាំ ដែលសម្របសម្រួលដោយប្រព័ន្ធបច្ចេកវិទ្យានៅទូទាំងប្រទេសចំនួន២១។

ការរកឃើញទាំងនេះត្រូវបានរួមបញ្ចូលនៅក្នុងរបាយការណ៍ថ្មីមួយដែលមានចំណងជើងថា «តាមរយៈភ្នែករបស់កុមារ៖ របៀបដែលបច្ចេកវិទ្យាឌីជីថលអនុញ្ញាតឱ្យមានការរំលោភបំពានផ្លូវភេទកុមារ» ដែលរួមបញ្ចូលគ្នានូវទិន្នន័យស្ទង់មតិជាមួយនឹងសក្ខីកម្មពីកុមារដែលបានជួបប្រទះការរំលោភបំពាន។

លោកស្រី ខាធើរីន រូសស៊ែល នាយកប្រតិបត្តិអង្គការយូណេសេហ្វបានមានប្រសាសន៍ថា «របាយការណ៍នេះបង្ហាញពីការពិតដ៏ឈឺចាប់មួយ។កុមារជាង ២០លាននាក់នៅទូទាំងប្រទេសដែលបានសិក្សា ត្រូវបានទទួលរងនូវខ្លឹមសារផ្លូវភេទដែលមិនចង់ឃើញ ឬការកេងប្រវ័ញ្ចតាមអ៊ីនធឺណិត ជាញឹកញាប់នៅក្នុងកន្លែងឌីជីថលដែលពួកគេរៀន លេង និងភ្ជាប់ទំនាក់ទំនងជាមួយមិត្តភក្តិ»។

លោកស្រីបានបន្ថែមថា «កុមារជាច្រើនរងទុក្ខដោយស្ងៀមស្ងាត់ដោយមិនដឹងថាត្រូវងាកទៅរកជំនួយពីខាងណា»។

របាយការណ៍នេះ បានប៉ាន់ប្រមាណថា កុមារជាង ១៥លាននាក់ត្រូវបានរងផលប៉ះពាល់នឹងខ្លឹមសារផ្លូវភេទដែលមិនចង់ឃើញ ខណៈដែល៩លាននាក់ត្រូវបានស្នើសុំឱ្យចូលរួមក្នុងការសន្ទនាផ្លូវភេទ ឬចែករំលែករូបភាពផ្លូវភេទប្រឆាំងនឹងឆន្ទៈរបស់ពួកគេ។

កុមារប្រហែល ៤លាននាក់មានរូបភាពផ្លូវភេទរបស់ពួកគេដែលត្រូវបានចែករំលែកដោយគ្មានការយល់ព្រមពីពួកគេ៕

ដោយ៖ យា ចិន្ដាខន្ដី (ប្រភព៖ AA-AKP)