AKP កំពង់ឆ្នាំង ថ្ងៃទី២៧ ខែសីហា ឆ្នាំ២០២៦--ឯកឧត្តម ហ៊ី សោភា ប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា បានមានប្រសាសន៍នៅក្នុងកម្មវិធីបើកសិក្ខាសាលាផ្សព្វផ្សាយស្តីពីសមិទ្ធផលធម្មនុញ្ញសម្រេចបានក្នុងរយៈពេល៣០ឆ្នាំ ប្រារពធ្វើឡើងនៅសាលប្រជុំសាលាខេត្តកំពង់ឆ្នាំង កាលពីថ្ងៃទី២៦ ខែសីហា ឆ្នាំ២០២៦ ដោយមានការអញ្ជើញចូលរួមពីឯកឧត្តម ស៊ីវ រុន ប្រធានក្រុមប្រឹក្សាខេត្ត ឯកឧត្តម ស៊ុន សុវណ្ណារិទ្ធិ អភិបាលខេត្ត ឯកឧត្តម ប្រធានសាលាដំបូងខេត្ត ឯកឧត្តមព្រះរាជអាជ្ញាអមសាលាដំបូងខេត្ត ឯកឧត្តម លោកជំទាវ សមាជិកក្រុមប្រឹក្សាខេត្ត មន្រ្តីរាជការ កងកម្លាំងទាំងបី លោកគ្រូ អ្នកគ្រូ សិស្សានុសិស្សជាច្រើននាក់ផងដែរ។

ក្នុងឱកាសនោះឯកឧត្តម ហ៊ី សោភា បានមានប្រសាសន៍ថា រដ្ឋធម្មនុញ្ញប្រជាធិបតេយ្យជឿនលឿន កើតចេញពីឆន្ទៈរួមរបស់ប្រជារាស្ត្រខ្មែរគ្រប់និន្នាការនយោបាយ ដែលបានរក្សាគុណតម្លៃប្រពៃណីខ្មែរ ជាតិ សាសនា ព្រះមហាក្សត្រ ផ្សារភ្ជាប់នឹងគុណតម្លៃធម្មនុញ្ញទំនើប ប្រជាធិបតេយ្យ សិទ្ធិមនុស្ស នីតិរដ្ឋ ស្របតាមឧបសម្ព័ន្ធទី៥ នៃកិច្ចព្រមព្រៀងសន្តិភាពទីក្រុងប៉ារីស។ ក្នុងរយៈពេល ៣០ឆ្នាំកន្លងមក ក្រុមប្រឹក្សាធម្មនុញ្ញសម្រេចបាននូវសមិទ្ធផលធំធេងជាច្រើន ក្រោមការខិតខំប្រឹងប្រែង និងការទទួលខុសត្រូវខ្ពស់របស់ថ្នាក់ដឹកនាំ សមាជិក សមាជិកា គ្រប់អាណត្តិ និងអគ្គលេខាធិការដ្ឋាន ដើម្បីបំពេញសមត្ថកិច្ចដ៏ឧត្តុង្គឧត្តមក្នុងការធានាការពារការគោរពរដ្ឋធម្មនុញ្ញ ដែលជាគ្រឹះមិនអាចខ្វះបានសម្រាប់ការកសាង និងពង្រឹងនីតិរដ្ឋនៅកម្ពុជា។

ទន្ទឹមនឹងនេះឯកឧត្តមបានបន្តថា ការដោះស្រាយបញ្ហានយោបាយ និងបញ្ហាច្បាប់ ដែលបានកើតមានឡើងជាបន្តបន្ទាប់ ដោយរក្សាបាននូវភាពសុខដុមរមនាក្នុងសង្គម ញុំាងឲ្យរដ្ឋធម្មនុញ្ញនេះនិងរបបនយោបាយមានស្ថិរភាពរយៈពេលវែង៣០ឆ្នាំ ។ ទាក់ទងនឹងការបន្សាំបន្ស៊ីគ្នារវាងគុណតម្លៃនៃព្រះរាជាណាចក្រកម្ពុជា សម្រេចបានលទ្ធផលវិជ្ជមាន លើភាពសុខដុមរមនាក្នុងសង្គម។ 

ដូច្នេះផ្អែកលើបទពិសោធន៍ សម្រាប់ករណីនៃប្រទេសកម្ពុជា ការពង្រឹងអត្តសញ្ញាណជាតិ មានកត្តាធំៗចំនួន៣, ១. កត្តាមោទនភាពជាតិ, ២. កត្តាសុខដុមនីយកម្មសង្គម និង ៣.កត្តាឥទ្ធិពលនៃជំនឿផ្សេងៗ គោលការណ៍នៃរដ្ឋធម្មនុញ្ញទាំងនេះធ្វើឱ្យប្រទេសកម្ពុជាមានការអភិវឌ្ឍន៍៕

ដោយ បៃ ស៊ីថុន