AKP បន្ទាយមានជ័យ ថ្ងៃទី២៧ ខែសីហា ឆ្នាំ២០២៦--លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានជំរុញឱ្យអាជ្ញាធរ និងសមត្ថកិច្ចពាក់ព័ន្ធនៅខេត្តបន្ទាយមានជ័យបន្តពង្រឹងកិច្ចសហការគ្រប់ជ្រុងជ្រោយក្នុងការគ្រប់គ្រងលំហូរឆ្លងកាត់ព្រំដែនខុសច្បាប់របស់ពលរដ្ឋកម្ពុជា និងជនបរទេស ដោយផ្តោតសំខាន់លើការបង្ការ ទប់ស្កាត់ និងឆ្លើយតបឱ្យបានទាន់ពេលវេលាចំពោះហានិភ័យនៃអំពើជួញដូរមនុស្ស និងបទល្មើសពាក់ព័ន្ធនានា។

លោកជំទាវ ជូ ប៊ុនអេង បានថ្លែងបែបនេះក្នុងកិច្ចប្រជុំពិភាក្សាយ៉ាងសំខាន់ ស្តីពី «ការគ្រប់គ្រងលំហូរឆ្លងកាត់ព្រំដែនខុសច្បាប់របស់ពលរដ្ឋកម្ពុជា និងជនបរទេស» ដែលបានរៀបចំឡើងនៅសាលប្រជុំសាលាខេត្តបន្ទាយមានជ័យ កាលពីរសៀលថ្ងៃទី២៦ ខែសីហា ឆ្នាំ២០២៦ ដោយមានការចូលរួមពីឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ព្រមទាំងថ្នាក់ដឹកនាំ មន្ត្រីរាជការ និងកងកម្លាំងសមត្ថកិច្ចពាក់ព័ន្ធជាច្រើនរូប។

ក្នុងកិច្ចប្រជុំនេះ លោកជំទាវ ជូ ប៊ុនអេង បានគូសបញ្ជាក់ពីសារៈសំខាន់នៃការគ្រប់គ្រងលំហូរមនុស្សឆ្លងកាត់ព្រំដែនឱ្យបានត្រឹមត្រូវ ស្របតាមច្បាប់ និងបទប្បញ្ញត្តិជាធរមាន ព្រោះការឆ្លងដែនដោយខុសច្បាប់អាចបង្កឱ្យកើតមានហានិភ័យជាច្រើន ជាពិសេសការធ្លាក់ខ្លួនរងគ្រោះដោយអំពើជួញដូរមនុស្ស ការកេងប្រវ័ញ្ចកម្លាំងពលកម្ម ការបង្ខំឱ្យប្រព្រឹត្តបទល្មើស និងបញ្ហាសង្គមផ្សេងៗទៀត។

លោកជំទាវបានសង្កត់ធ្ងន់ថា ការងារនេះមិនអាចសម្រេចបានដោយស្ថាប័នណាមួយតែម្នាក់ឯងឡើយ ប៉ុន្តែត្រូវការកិច្ចសហការយ៉ាងជិតស្និទ្ធរវាងអាជ្ញាធរដែនដី កងកម្លាំងប្រដាប់អាវុធទាំងបីប្រភេទ ស្ថាប័នជំនាញ និងអង្គភាពពាក់ព័ន្ធ ដើម្បីចែករំលែកព័ត៌មាន ស្រាវជ្រាវមុខសញ្ញា ទប់ស្កាត់ការឆ្លងដែនខុសច្បាប់ និងចាត់វិធានការតាមផ្លូវច្បាប់ចំពោះអ្នកដែលពាក់ព័ន្ធនឹងការប្រព្រឹត្តបទល្មើស។      

ជាមួយគ្នានេះ លោកជំទាវក៏បានលើកឡើងពីសារៈសំខាន់នៃការយកចិត្តទុកដាក់ចំពោះប្រជាពលរដ្ឋដែលអាចជួបប្រទះហានិភ័យនៅតាមតំបន់ព្រំដែន ដោយត្រូវផ្តល់ព័ត៌មាន និងការណែនាំឱ្យបានគ្រប់គ្រាន់ អំពីការធ្វើដំណើរ ការងារ និងការឆ្លងកាត់ព្រំដែនតាមផ្លូវស្របច្បាប់ ដើម្បីកាត់បន្ថយឱកាសដែលជនខិលខូចអាចប្រើប្រាស់ភាពខ្វះខាតព័ត៌មានរបស់ប្រជាពលរដ្ឋធ្វើជាឧបករណ៍សម្រាប់កេងប្រវ័ញ្ច ឬជួញដូរមនុស្ស។

លោកជំទាវ ជូ ប៊ុនអេង ក៏បានលើកឡើងថា ការប្រយុទ្ធប្រឆាំងអំពើជួញដូរមនុស្ស ត្រូវធ្វើឡើងដោយមានការទទួលខុសត្រូវខ្ពស់ ទាំងក្នុងការបង្ការ ការបង្ក្រាប ការសង្គ្រោះ និងការការពារជនរងគ្រោះ។ ក្នុងន័យនេះ សមត្ថកិច្ចត្រូវបង្កើនការប្រុងប្រយ័ត្ននៅតំបន់ដែលមានលំហូរមនុស្សឆ្លងកាត់ច្រើន និងត្រូវពង្រឹងការផ្លាស់ប្តូរព័ត៌មាន ដើម្បីឱ្យការឆ្លើយតបចំពោះស្ថានការណ៍មានប្រសិទ្ធភាព និងទាន់ពេលវេលា។

ដោយឡែក ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានបង្ហាញការប្តេជ្ញាចិត្តរបស់រដ្ឋបាលខេត្ត ក្នុងការចូលរួមអនុវត្តការងារគ្រប់គ្រងលំហូរឆ្លងកាត់ព្រំដែនខុសច្បាប់ឱ្យមានប្រសិទ្ធភាព និងស្របតាមទិសដៅរបស់រាជរដ្ឋាភិបាល ព្រមទាំងបន្តសហការយ៉ាងជិតស្និទ្ធជាមួយក្រសួង ស្ថាប័ន និងអង្គភាពពាក់ព័ន្ធ។   

ឯកឧត្តម អ៊ុំ រាត្រី បានបញ្ជាក់ថា រដ្ឋបាលខេត្តនឹងបន្តជំរុញដល់អាជ្ញាធរមូលដ្ឋាន និងកងកម្លាំងមានសមត្ថកិច្ច ឱ្យបង្កើនការយកចិត្តទុកដាក់ចំពោះសន្តិសុខ សណ្តាប់ធ្នាប់នៅតាមតំបន់ព្រំដែន ពង្រឹងការត្រួតពិនិត្យ និងទប់ស្កាត់សកម្មភាពឆ្លងដែនខុសច្បាប់ ព្រមទាំងចូលរួមការពារប្រជាពលរដ្ឋកុំឱ្យធ្លាក់ចូលក្នុងបណ្តាញជួញដូរមនុស្ស ឬការកេងប្រវ័ញ្ចក្នុងគ្រប់រូបភាព។    

អភិបាលខេត្តបន្ទាយមានជ័យ ក៏បានបង្ហាញជំហរថា ការងារប្រយុទ្ធប្រឆាំងបទល្មើសតាមព្រំដែន និងអំពើជួញដូរមនុស្ស ត្រូវការការអនុវត្តន៍ជាក់ស្តែង មិនមែនត្រឹមតែការផ្សព្វផ្សាយ ឬការណែនាំប៉ុណ្ណោះទេ។ ដូច្នេះ អាជ្ញាធរ និងសមត្ថកិច្ចគ្រប់លំដាប់ថ្នាក់ ត្រូវចាត់ទុកការងារនេះជាភារកិច្ចរួម និងត្រូវមានការទទួលខុសត្រូវច្បាស់លាស់ចំពោះលទ្ធផលនៃការអនុវត្តនៅមូលដ្ឋាន។

សម្រាប់ខេត្តបន្ទាយមានជ័យ ដែលមានទីតាំងភូមិសាស្ត្រជាប់ព្រំដែន និងមានច្រកឆ្លងកាត់ព្រំដែនសំខាន់ៗ ការគ្រប់គ្រងលំហូរមនុស្សឱ្យបានល្អ គឺជាកត្តាសំខាន់មួយសម្រាប់រក្សាសន្តិសុខ សណ្តាប់ធ្នាប់សាធារណៈ និងការពារប្រជាពលរដ្ឋ។ ដូច្នេះ ការពង្រឹងកិច្ចសហការរវាងស្ថាប័នពាក់ព័ន្ធ និងការអនុវត្តវិធានការបង្ការ ទប់ស្កាត់ និងបង្ក្រាបឱ្យបានទាន់ពេលវេលា នឹងរួមចំណែកកាន់តែសំខាន់ក្នុងការកាត់បន្ថយហានិភ័យពីការឆ្លងដែនខុសច្បាប់ និងបទល្មើសជួញដូរមនុស្ស។

កិច្ចប្រជុំនេះ បានបញ្ជាក់ជាថ្មីពីការប្តេជ្ញាចិត្តរួមរបស់ថ្នាក់ដឹកនាំខេត្ត និងស្ថាប័នពាក់ព័ន្ធ ក្នុងការដាក់សុវត្ថិភាព និងផលប្រយោជន៍របស់ប្រជាពលរដ្ឋជាចម្បង ព្រមទាំងបន្តអនុវត្តវិធានការឱ្យបានម៉ឺងម៉ាត់ ស្របតាមច្បាប់ ដើម្បីធានាថា ការឆ្លងកាត់ព្រំដែនប្រព្រឹត្តទៅដោយសុវត្ថិភាព មានសណ្តាប់ធ្នាប់ និងស្របច្បាប់ ខណៈអ្នកប្រព្រឹត្តបទល្មើសនឹងត្រូវប្រឈមមុខចំពោះវិធានការតាមផ្លូវច្បាប់៕

ដោយ ឈុន សារ៉ាត