AKP ភ្នំពេញ ថ្ងៃទី២៦ ខែសីហា ឆ្នាំ២០២៦-- ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចុះពិនិត្យជាក់ស្ដែងស្ថានភាពទឹកជំនន់ទន្លេមេគង្គ និងផលប៉ះពាល់ដល់ប្រជាពលរដ្ឋ នៅក្នុងខេត្តត្បូងឃ្មុំ និងខេត្តកំពង់ចាម នាព្រឹកថ្ងៃពុធទី២៦ ខែសីហា ឆ្នាំ២០២៦នេះ ដោយមានវត្តមានចូលរួមពីសំណាក់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងអាជ្ញាធរមូលដ្ឋានជាច្រើនរូបផងដែរ។

សូមជម្រាបថា ក្នុងរយៈពេលប៉ុន្មានថ្ងៃកន្លងមកនេះ ឥទ្ធិពលព្យុះ និងប្រព័ន្ធសម្ពាធទាបដែលកើតមាននៅភាគខាងលើអាងទន្លេមេគង្គ បានបណ្តាលឱ្យតំបន់ផ្ទៃរងទឹកភ្លៀងនៃទន្លេមេគង្គក្នុងប្រទេសថៃ ឡាវ វៀតណាម និងប្រទេសកម្ពុជាមានភ្លៀងធ្លាក់ច្រើននៅក្នុងអាងទន្លេមេគង្គ។ ស្ថានភាពនេះធ្វើឱ្យកម្ពស់ទឹកទន្លេមេគង្គមានការហក់ឡើងខ្លាំង បណ្តាលឱ្យជន់លិចតំបន់មួយចំនួននៅតាមដងទន្លេមេគង្គផ្នែកខាងលើ ក្នុងខេត្តស្ទឹងត្រែង ខេត្តក្រចេះ ខេត្តត្បូងឃ្មុំ និងខេត្តកំពង់ចាម។

ឯកឧត្តមរដ្ឋមន្ត្រីបានបញ្ជាក់ឱ្យដឹងថា នៅប្រទេសកម្ពុជាតាមស្ថិតិរបស់ក្រសួងចាប់ពីឆ្នាំ២០០០ ដល់ឆ្នាំ២០១៩ ទឹកទន្លេមេគង្គតែងតែឡើងខ្ពស់រហូត ប៉ុន្តែក្នុងរយៈពេល៥ឆ្នាំចុងក្រោយចាប់ពីឆ្នាំ២០២០ ដល់ឆ្នាំ២០២៥ ទឹកទន្លេមេគង្គមានកម្ពស់ទាប មិនបណ្តាលឱ្យលិចលង់ដល់ភូមិឋានប្រជាពលរដ្ឋ និងមិនប៉ះពាល់ដល់ហេដ្ឋារចនាសម្ព័ន្ធ។ ដោយឡែកនៅឆ្នាំ២០២៦ រំហូរទឹកទន្លេមេគង្គមានការប្រែប្រួលខ្លាំងខុសពីធម្មតា កម្ពស់ទឹកហក់ឡើងខ្ពស់នៅផ្នែកខាងលើរហូតដល់កម្រិតប្រកាសឱ្យប្រុងប្រយ័ត្ន ដែលបណ្តាលឱ្យមានការជន់លិចនៅតំបន់មួយចំនួនតាមដងទន្លេមេគង្គ។

ឯកឧត្តមរដ្ឋមន្ត្រីក៏បានបញ្ជាក់បន្ថែមថា ឥទ្ធិពលនៃបាតុភូតអែលនីញ៉ូបានធ្វើឱ្យអាកាសធាតុមានការប្រែប្រួលខ្លាំង ជាក់ស្តែងនៅឆ្នាំនេះមានព្យុះរហូតដល់ ២១រួចហើយគិតត្រឹមចុងខែសីហា ដែលជាធម្មតារៀងរាល់ឆ្នាំចំនួននេះគឺកើតឡើងនៅខែកញ្ញាឬខែតុលា។ មួយវិញទៀតកម្ដៅកាន់តែឡើងខ្លាំង កន្លែងខ្លះភ្លៀងខ្លាំង កន្លែងខ្លះអត់ភ្លៀង របាយទឹកភ្លៀងធ្លាក់មិនស្មើគ្នា ហើយភាគច្រើនភ្លៀងធ្លាក់នៅតំបន់ខ្ពង់រាប និងតំបន់មាត់សមុទ្រ ចំណែកតំបន់ទំនាបកណ្តាលមិនសូវមានភ្លៀង ធ្វើឱ្យជួបប្រទះគ្រោះរាំងស្ងួតក្នុងរដូវវស្សា៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)