AKP ព្រះសីហនុ ថ្ងៃទី២៥ ខែសីហា ឆ្នាំ២០២៦--នាព្រឹកថ្ងៃអង្គារ ទី២៥ ខែសីហា ឆ្នាំ២០២៥ ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ដឹកនាំកិច្ចប្រជុំពិនិត្យរបាយការណ៍ និងស្តាប់បទបង្ហាញ ការដំឡើងផ្លាក សញ្ញាចរាចរណ៍ផ្លូវគោកសម្រាប់ការចតរថយន្តថ្ងៃសេស ថ្ងៃគូ និងផ្លាកសញ្ញា ចរាចរណ៍ហាមចតរថយន្តលើដងផ្លូវចំនួន ១២ខ្សែ ក្នុងក្រុងព្រះសីហនុ ខេត្តព្រះសីហនុ ដោយមាន ការចូលរួមពីលោកអភិបាលរងខេត្ត អភិបាលក្រុងព្រះសីហនុ និងប្រធានមន្ទីរ អង្គភាពពាក់ព័ន្ធ។

ក្នុងឱកាសនោះ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានគូសបញ្ជាក់ថា ដើម្បីរៀបចំសណ្តាប់ធ្នាប់សាធារណៈនៅតាមដងផ្លូវក្នុងក្រុង និងការចតនៅលើក្រានីត (ផាសអាប់) ដើម្បីបង្កើនសោភណភាពទីក្រុង ក្នុងកិច្ចប្រជុំនេះយើងពិភាក្សាប្រមូលធាតុចូលរៀបចំដងផ្លូវ ក្នុងក្រុងព្រះសីហនុ ជាទីក្រុងសេដ្ឋកិច្ច ពាណិជ្ជកម្ម កសិកម្ម និងទេសចរណ៍។

ក្នុងកិច្ចពិភាក្សា ការចតរថយន្តសម្រាប់ថ្ងៃសេស និងថ្ងៃគូនៅលើខ្សែផ្លូវចំនួន ១២ខ្សែក្នុង ក្រុងព្រះសីហនុបានឱ្យដឹងថា មុនអនុវត្តន៍នៅលើខ្សែផ្លូវបានយើងត្រូវធ្វើការផ្សព្វផ្សាយឱ្យបាន ទូលំទូលាយ ជាពិសេសការធ្វើវេទិកាសាធារណៈតម្រូវឱ្យមានការផ្សព្វផ្សាយការចតរថយន្ត នេះផងដែរ។ ទន្ទឹមនោះ ការផ្សព្វផ្សាយដល់សិស្សានុសិស្ស និសិ្សត និងសាធារណជន ដើម្បីសណ្តាប់ធ្នាប់សាធារណៈ និងបង្កើនសោភណភាពទីក្រុងរបស់យើង។

ជាមួយគ្នានោះ ឯកឧត្តមអភិបាលខេត្តព្រះសីហនុ ក៏បានឯកភាពនៃការពិភាក្សាប្រមូល ធាតុចូលពីកិច្ចប្រជុំ ដូច្នេះយើងរួមគ្នាសិក្សាជាជំហានជ្រើសរើសផ្លូវមួយចំនួនយកមកអនុវត្តន៍ សាកល្បង និងបន្តពង្រីកជាជំហានៗបន្ថែមទៀតនៅតាមដងផ្លូវទាំង ១២ខ្សែ ក្នុងក្រុងព្រះសីហនុ។ ដោយធ្វើការផ្សព្វផ្សាយឱ្យបានទូលំទូលាយដល់ប្រជាពលរដ្ឋ និងសាធារណជនរយៈពេលមួយខែ ទៅលើខ្សែផ្លូវដែលដាក់ឱ្យដំណើរការជំហានដំបូង ដោយសារតែបច្ចុប្បន្ននៅក្នុងក្រុងព្រះសីហនុ ខ្វះចំណតសម្រាប់យានយន្តគ្រប់ប្រភេទ ទាមទារឱ្យយើងរកដៃគូវិនិយោគលើចំណតឱ្យបានកាន់ តែច្រើន ដើម្បីសន្តិសុខសណ្តាប់ធ្នាប់សាធារណៈ និងសោភណភាពទីក្រុងព្រះសីហនុនៅពេល ខាងមុខ៕

ដោយ ងូ សុមុនី