AKPកំពង់ធំថ្ងៃទី២២ខែសីហា ឆ្នាំ២០២៦--

លោកឧត្តមសេនីយ៍ទោ ហេង សុផលស្នងការនគរបាលខេត្តកំពង់ធំបានក៏សរសើរដល់កងកម្លាំងនគរបាលទាំង អស់ដែលឈរលើស្មារតីសាមគ្គីភាពឈានទៅសម្រេចបានល្អប្រសើរជូនថ្នាក់ដឹកនាំនិងសង្គមជាតិក្នុងឱកាសដែលលោកអញ្ជើញដឹកនាំកិច្ចប្រជុំ បូកសរុបសភាពការណ៍ និងលទ្ធផលកិច្ចប្រតិបត្តិការប្រចាំខែ សីហានិងលើកទិសដៅការងារបន្តខែកញ្ញាឆ្នាំ២០២៦ ដោយមានការចូលរួមពីកងកម្លាំងចំនួន២៧០នាក់ នៅសាលប្រជុំស្នងការដ្ឋាននគរបាលខេត្តកាលពីរសៀលថ្ងៃទី២១ខែសីហាឆ្នាំ២០២៦។

ក្នុងឱកាសថ្លែងបើកកិច្ចប្រជុំ លោកឧត្តមសេនីយ៍ទោ ហេង សុផល បានពាំនាំនូវប្រសាសន៍ផ្ដាំផ្ញើនិងថ្លែង អំណរគុណពីសំណាក់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម នួន ផារ័ត្ន អភិបាលខេត្តកំពង់ធំដល់បងប្អូនកងក ម្លាំង ចំពោះលទ្ធផលល្អប្រសើរនៃការអ នុវត្ត តួនាទី ភារកិច្ច បេសកកម្មនាពេលកន្លងមកធានាបានសុខសុវត្ថិភាពជូនជាតិមាតុភូមិ។ ឆ្លៀតក្នុងឱកាសនោះដែរលោកស្នងការបានលើកឡើងអំពីសង្គ្រាមនៅមជ្ឈឹមបូព៌ារវាងប្រទេសមហាអំណាចលើពិភពលោកនិងជម្លោះព្រំដែន ដែលបង្ករដោយការឈ្លានពានរបស់កងទ័ពថៃ មកលើបូរណភាពទឹកដីនៃព្រះរាជាណាចក្រកម្ពុជា។

បន្ថែមលើសភាពការណ៍ នានា ដើម្បីថែរក្សាបាននិរន្តរភាពការងារ លោកឧត្តមសេនីយ៍ទោ ហេង សុផល បានដាក់ចេញនូវទិសដៅការងារ ដល់កងកម្លាំងសម្រាប់អនុវត្តឱ្យទទួលបានប្រសិទ្ធភាពខ្ពស់÷ទី១.សូមបន្តថែរក្សាវប្បធម៌ សាមគ្គីភាពដើម្បីចូលរួមចំណែកកសាងនូវសមិទ្ធផលថ្មីៗ បន្ថែមទៀត ជូនរាជរដ្ឋាភិបាល ក្រសួងមហាផ្ទៃ អគ្គស្នងការដ្ឋាននគរបាលជាតិ និងស្នងការដ្ឋាននគរបាលខេត្តកំពង់ធំ។ទី២.ពង្រឹងបទវិន័យលេខ៨៧៣របស់កងកម្លាំងនគរបាលជាតិនិងពង្រឹងរបៀបរបបការងារ អនុវត្ត តួនាទី ភារកិច្ច តាមឋានានុក្រម ប្រកបដោយក្រមសី លធម៌ វិជ្ជាជីវៈមានទំនួលខុសត្រូវ។បន្តចូលរួមលើការងារមនុស្សធម៌ ជួយគ្នាទៅវិញទៅមកនាគ្រាជួបការលំ បាក.ទី៣.ការងារនគរបាលព្រហ្មទណ្ឌ ទោះបីជាសភាពការណ៍ បទល្មើសមានលក្ខណៈល្អប្រសើរយ៉ាងណាក្តីត្រូវបន្តពង្រឹងវិធានការជំនាញក្នុងការគ្រប់គ្រងមុខសញ្ញាឈានទៅបង្ក្រាបបានទាន់ពេលវេលា ដើម្បីផ្ដន្ទាទោសតាមនីតិវិធីច្បាប់។ទី៤.ការងារសណ្តាប់ធ្នាប់សាធារណៈ បញ្ហាគ្រោះថ្នាក់ចរាចរណ៍ផ្លូវគោកនៅតែជាក្ដីព្រួយបារម្ភ របស់ថ្នាក់ដឹកនាំគ្រប់លំដាប់ថ្នាក់ដូច្នេះហើយទាមទារឱ្យសមត្ថកិច្ចយើង បង្កើនការផ្សព្វផ្សាយអប់រំ គ្រប់ទំរង់រូបភាព ដល់មហាជនទូទៅដើម្បីលើកកម្ពស់ការយល់ដឹងនិងចូលរួមអនុវត្តច្បាប់ចរាចរណ៍ឱ្យទទួលបានលទ្ធផលល្អប្រសើរ។ទី៥.ការងារប្រឆាំងបទល្មើសគ្រឿងញៀន រួមគ្នាគិត រួមគ្នាធ្វើសំដៅទប់ស្កាត់ កាត់បន្ថយបទល្មើសគ្រឿងញៀន ដែលកើតមានក្នុងមូលដ្ឋាន សំដៅថែរក្សាបាន សន្តិសុខ សុវត្ថិភាព សណ្តាប់ធ្នាប់ជូនសង្គមជាតិ និងប្រជាពលរដ្ឋ ស្របតាមគោលន យោបាយ"ភូមិ-ឃុំ-សង្កាត់មានសុវត្ថិភាព"។

ទី៦.ការងារប្រឆាំងបទល្មើសសេដ្ឋកិច្ច បន្តបញ្ជុះកម្លាំងសហការជាមួយមន្ត្រីជំនាញ តាមគោលដៅទីបញ្ជាការស្រាល ដើម្បីឆ្លើយតបនឹងកិច្ចប្រតិបត្តិការ បង្ក្រាបបទល្មើសនានា កសាងសំណុំមរឿងតាមនីតិវិធី។ទី៧.ការងារអន្តោប្រវេសន៍ បន្តចុះធ្វើបច្ចុប្បន្នភាពជាប្រចាំគ្រប់គ្រងត្រួតពិនិត្យលើជនបរទេស ដែលបានស្នាក់នៅក្នុងភូមិសាស្ត្រខេត្ត ជាពិសេសបង្កើនការអនុវត្តអនុក្រឹតលេខ ០៣ ស្តីពី ការគ្រប់គ្រងសន្តិសុខតាមទីតាំង រស់នៅប្រមូលផ្តុំ ឱ្យសកម្មនូវយុទ្ធនាការ បង្ការ ទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញក្នុងភូមិសាស្ត្រទទួលខុសត្រូវរបស់ខ្លួន។ ត្រូវពង្រឹងការផ្សព្វផ្សាយអប់រំប្រជាពលរដ្ឋឱ្យមានការប្រុងប្រយ័ត្ន ចំពោះគ្រប់រូបភាពនៃ ការឆបោកតាមបច្ចេកវិទ្យា ព្រមទាំងបង្កើនប្រសិទ្ធភាពក្នុងការស្រាវជ្រាវ ស៊ើបអ ង្កេត ដើម្បីការពារសន្តិសុខសណ្តាប់ធ្នាប់សង្គម និងរក្សាផលប្រយោជន៍ ស្របច្បាប់របស់ប្រជាពលរដ្ឋ ។ទី៨.ការងារនគរបាលបង្ការ ពន្លត់អគ្គីភ័យនិងសង្គ្រោះ បន្តត្រៀមលក្ខណ:គ្រប់ជ្រុងជ្រោយ សម្រាប់កិច្ចអន្តរាគមន៍ ដល់ប្រជាពលរដ្ឋ នាគ្រាជួបហេតុការណ៍ ចៃដន្យ។ទី៩.ការងារគ្រប់គ្រងអាវុធគ្រឿងផ្ទុះ ត្រួតពិនិត្យធ្វើបច្ចុប្បន្នភាពអាវុធជាតិផ្ទុះនិងសហការ ជាមួយអាជ្ញាធរមូលដ្ឋានចុះផ្សព្វផ្សាយអំពីច្បាប់ លិខិតបទដ្ឋាននានា ដែលពាក់ព័ន្ធការប្រើប្រាស់អាវុធខុសច្បាប់ និងគ្រោះថ្នាក់ដោយសារយុទ្ធភ័ណ្ឌមិនទាន់ផ្ទុះ តាមគោលដៅងាយរងគ្រោះ។ទី១០.ការងារអត្តសញ្ញាណកម្ម បន្តអនុវត្តដូចភ្លៀងរលឹម លើការងារផ្ដល់សេវារដ្ឋបាលជូនប្រជាពលរដ្ឋ ការផ្តល់សៀវភៅ ស្នាក់នៅ សៀវភៅគ្រួសារ និងការផ្តល់អត្តសញ្ញាណប័ណ្ណសញ្ជាតិខ្មែរ ជាដើម៕

ដោយ៖ ស៊ុម វណ្ណា