AKP បន្ទាយមានជ័យ ថ្ងៃ២២ខែសីហាឆ្នាំ២០២៦---

ឆ្លើយតបទៅនឹងគោលនយោបាយកាត់ បន្ថយភាពក្រីក្រ និងបង្កើនប្រាក់ចំណូ លជូនប្រជាពលរដ្ឋនៅតាមមូលដ្ឋាន ក្រុមការងារអន្តរក្រសួង និងមន្ទីរជំនាញជុំវិញខេត្តបន្ទាយមានជ័យ បានចុះបេសកកម្មរួមគ្នាយ៉ាងសកម្ម ដើម្បីត្រួតពិនិត្យគុណភាពសមិទ្ធផលហេដ្ឋារចនាសម្ព័ន្ធ និងលើកកម្ពស់ជីវភាពប្រជាពលរដ្ឋឱ្យមានភាពចីរភាព ទន្ទឹមគ្នានឹងការផ្ទេរចំណេះដឹងផ្នែកបច្ចេកទេសកសិកម្មទំនើប។

កាលពីថ្ងៃទី២១ ខែសីហា ឆ្នាំ២០២៦ លោក សាន វួន អនុប្រធានមន្ទីរកសិកម្ម រុក្ខាប្រមាញ់ និងនេសាទ និងជាជនបង្គោលគម្រោង LASED III ប្រចាំខេត្តបន្ទាយមានជ័យ រួមជាមួយ លោក ហ៊ីង មុន្នីរ៉ុង មន្ត្រីអនុវត្តគម្រោង បានដឹកនាំក្រុមការងារបច្ចេកទេស ដោយមានការចូលរួមពីតំណាងមន្ទីរដែនដី នគរូបនីយកម្ម សំណង់ និងសុរិយោដី មន្ទីរអភិវឌ្ឍន៍ជនបទ ក្រុមហ៊ុនម៉ៅការសាងសង់ ព្រមទាំងអាជ្ញាធរដែនដីស្រុកភ្នំស្រុក និងឃុំប៉ោយចារ បានចុះពិនិត្យ និងវាយតម្លៃបញ្ចប់រយៈពេលធានាសុពលភាព ១ឆ្នាំ  លើសមិទ្ធផលការងាររៀបចំសម្អាតដី បោះបង្គោលព្រំ និងស្ថាបនាផ្លូវដីស ស្ថិតនៅទីតាំងដីស ម្បទានសង្គមកិច្ច ភូមិតេជោសន្តិភាព ឃុំប៉ោយចារ ស្រុកភ្នំស្រុក។

ជាលទ្ធផលនៃការចុះត្រួតពិនិត្យ និងវាយតម្លៃយ៉ាងល្អិតល្អន់តាមបទដ្ឋានបច្ចេកទេស ក្រុមការងារអន្តរក្រសួងបានសម្តែងនូវការពេញចិត្ត និងវាយតម្លៃទទួលយកជាផ្លូវការលើសមិទ្ធផលសំខាន់ៗការងាររៀបចំ និងសម្អាតផ្ទៃដី បានអនុវត្តរួចរាល់លើទំហំដីសរុប ២០៧.៣៤ ហិកតា ដែលរួមមានទាំងតំបន់ដីឡូតិ៍លំនៅដ្ឋាន និងដីឡូតិ៍កសិកម្ម។ការងារបោះបង្គោលព្រំដី បានបោះបង្គោលព្រំដីឡូតិ៍លំនៅដ្ឋាន ដីកសិកម្ម និងព្រំដីចំណីអូរ បានត្រឹមត្រូវតាមបច្ចេកទេសសរុបចំនួន ១,៣៣៣ បង្គោល។ការស្ថាបនាបណ្តាញផ្លូវ បានបញ្ចប់ការស្ថាបនាផ្លូវតភ្ជាប់ និងផ្លូវដីសក្នុងតំបន់លំនៅដ្ឋាន និងកសិកម្ម សរុបប្រវែង ២៦.១៨៣ គីឡូម៉ែត្រ សម្រួលដល់ការធ្វើដំណើរ និងការដឹកជញ្ជូនកសិផល។សំណង់សិល្បការបានស្ថាបនាសំណង់លូកាត់ទទឹងផ្លូវចំនួន ២ កន្លែង រួចរាល់ស្ថាពរ ប្រកបដោយគុណភាពតាមលក្ខណៈបច្ចេកទេស។ ទន្ទឹមនឹងការចុះវាយតម្លៃសមិទ្ធផលរូបវន្ត គម្រោង LASED III ក៏បានផ្តោតសំខាន់លើការរៀបចំកម្មវិធី «ពង្រឹងសមត្ថភាព និងជីវភាពសម្បទានិក» តាមរយៈការបណ្តុះបណ្តាលបច្ចេកទេស។

លោក យ៉ាង ចាន់តូ មន្ត្រីការិយាល័យក្សេត្រសាស្ត្រ និងផលិតភាពកសិកម្ម បានបើកវគ្គបណ្តុះបណ្តាលបច្ចេកទេសដាំដុះដំណាំស្រូវស្រាល និងការដាំដុះបន្លែក្នុងផ្ទះសំណាញ់ ជូនដល់ប្រជាពលរដ្ឋជាសម្បទានិកនៅភូមិតេជោសន្តិភាព។ វគ្គបណ្តុះបណ្តាលនេះទទួលបានការចាប់អារម្មណ៍យ៉ាងខ្លាំង ដោយមានប្រជាពលរដ្ឋចូលរួមសរុប ១៥០ នាក់ (ក្នុងនោះស្ត្រីមានរហូតដល់ ១៣០ នាក់)។ 

ការចុះត្រួតពិនិត្យបញ្ចប់រយៈពេលធានា និងការផ្តល់វគ្គបណ្តុះបណ្តាលនេះ មិនត្រឹមតែជាការធានានូវគុណភាព សុវត្ថិ ភាព និងចីរភាពនៃហេដ្ឋារចនាសម្ព័ន្ធរូបវន្តក្នុងតំបន់ដីសម្បទានសង្គមកិច្ចប៉ុណ្ណោះទេ ប៉ុន្តែថែមទាំងជាស្ពានចម្លងប្រជាពលរដ្ឋសម្បទានិក ឱ្យទទួលបាននូវចំណេះដឹងកសិកម្មទំនើប ឆ្លើយតបនឹងបម្រែបម្រួលអាកាសធាតុ ជំរុញការប្រើប្រាស់ដីកសិកម្មឱ្យអស់លទ្ធភាព និងបង្កើនប្រាក់ចំណូលគ្រួសារ ប្រកបដោយចីរភាព និងសមធម៌សង្គម៕

ដោយ៖ឈុនសារ៉ាត