AKP កំពង់ធំ ថ្ងៃទី២០ ខែសីហា ឆ្នាំ២០២៦--ឯកឧត្តម នួន ផារ័ត្ន អភិបាលខេត្តកំពង់ធំ កាលពីថ្ងៃទី១៩ ខែសីហា ឆ្នាំ២០២៦ បានប្រគល់សាឡង់ចំនួន២គ្រឿងជូនរដ្ឋបាលឃុំឈើទាល និងរដ្ឋបាលឃុំមានជ័យ ស្រុកសណ្ដាន់ ខេត្តកំពង់ធំ សម្រួលដល់ការធ្វើដំណើររបស់ប្រជាពលរដ្ឋនៅតំបន់ ជាពិសេសដើម្បីធានាសុខសុវត្ថិភាពរបស់បងប្អូនប្រជាពលរដ្ឋ និងការសិក្សារៀនសូត្ររបស់សិស្សានុសិស្ស។

ឯកឧត្តម នួន ផារ័ត្ន បានមានប្រសាសន៍ថា ដោយការមានការយកចិត្តទុកដាក់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាពីសុខទុក្ខបងប្អូនជាពលរដ្ឋនៅតាមមូលដ្ឋាន ការប្រគល់សាឡង់ចំនួន២គ្រឿងនេះមានគោលបំណងជួយសម្រួលដល់បងប្អូនប្រជាពលរដ្ឋឱ្យមានភាពងាយស្រួលក្នុងការធ្វើដំណើរ ជាពិសេសសិស្សានុសិស្សដែលត្រូវធ្វើដំណើរទៅសាលារៀនជារៀងរាល់ថ្ងៃ។ ការមានមធ្យោបាយធ្វើដំណើរសមស្រប នឹងជួយឱ្យសិស្សានុសិស្សអាចទៅសិក្សារៀនសូត្របានទាន់ពេលវេលា និងកាត់បន្ថយការលំបាកក្នុងការធ្វើដំណើរ។

ឯកឧត្តមអភិបាលខេត្តបានអំពាវនាវដល់បងប្អូនប្រជាពលរដ្ឋទាំងអស់ឱ្យចូលរួមថែរក្សា និងការពារធនធានធម្មជាតិព្រមទាំងគោរពច្បាប់របស់រដ្ឋ ជាពិសេសត្រូវហាមឃាត់ការទន្ទ្រានដីព្រៃ ដែលជាសម្បត្តិរបស់រដ្ឋមកធ្វើជាកម្មសិទ្ធិផ្ទាល់ខ្លួន។ ការចូលរួមរបស់ប្រជាពលរដ្ឋក្នុងការការពារដីព្រៃ និងធនធានធម្មជាតិគឺជាកត្តាសំខាន់សម្រាប់ការអភិរក្សធនធានរបស់ជាតិ និងការអភិវឌ្ឍប្រកបដោយចីរភាព។

ជាមួយគ្នានេះ ឯកឧត្តមបានស្នើឱ្យមាតាបិតា និងអាណាព្យាបាលសិស្សយកចិត្តទុកដាក់បញ្ជូនកូនចៅឱ្យបានមកសាលារៀនគ្រប់ៗគ្នា និងជំរុញការសិក្សារបស់កូនៗដើម្បីឱ្យពួកគេទទួលបានចំណេះដឹងនិងជំនាញសម្រាប់អនាគត។ យុវជន និងសិស្សានុសិស្សជាកម្លាំងស្នូល និងជាទំពាំងស្នងឫស្សីសម្រាប់ប្រទេសជាតិ។ ការប្រគល់សាឡង់នេះត្រូវបានចាត់ទុកថាជាការចូលរួមបន្តពង្រឹងសេវាសាធារណៈនៅមូលដ្ឋាន និងជួយសម្រួលដល់ជីវភាពប្រចាំថ្ងៃរបស់ប្រជាពលរដ្ឋពិសេសការធ្វើដំណើររបស់សិស្សានុសិស្សក្នុងស្រុកសណ្ដាន់ ខេត្តកំពង់ធំ៕

ដោយ ស៊ុម វណ្ណា