AKP តាកែវ ថ្ងៃទី២០ ខែសីហា ឆ្នាំ២០២៦--លោក ភួន ឈីម អភិបាលនៃគណៈអភិបាលស្រុកកោះអណ្ដែត បានដឹកនាំក្រុមការងារចម្រុះ រួមមាន អភិបាលរងស្រុក ការិយាល័យជំនាញ អាជ្ញាធរមូលដ្ឋាន និងកងកម្លាំងប្រដាប់អាវុធចម្រុះ ចុះរៀបចំសណ្ដាប់ធ្នាប់សាធារណៈ និងអប់រំណែនាំ ដល់អាជីវករលក់ដូរ ទាំងនៅក្នុងនិងជុំវិញផ្សារព្រៃយុថ្កា។ ការចុះត្រួតពិនិត្យនេះធ្វើឡើងនៅផ្សារព្រៃយុថ្កា ស្ថិតនៅក្នុងឃុំព្រៃយុថ្កា ស្រុកកោះអណ្ដែត ខេត្តតាកែវ កាលពីថ្ងៃទី១៩ ខែសីហា ឆ្នាំ២០២៦។

ក្នុងឱកាសចុះពិនិត្យដោយផ្ទាល់នោះ លោក ភួន ឈីម អភិបាលនៃគណៈអភិបាលស្រុកកោះអណ្ដែត បានជួបសំណេះសំណាលយ៉ាងស្និទ្ធស្នាលជាមួយបងប្អូនអាជីវករ និងបានណែនាំ ពាក់ព័ន្ធនឹងការរៀបចំសណ្តាប់ធ្នាប់សាធារណៈ និងអនាម័យ ដល់បងប្អូនអាជីវករទាំងអស់ សូមកុំដាក់តាំងលក់ទំនិញឬសម្ភារផ្សេងៗ រំលោភមកលើចិញ្ចើមផ្លូវ និងទ្រូងផ្លូវសាធារណៈ ដែលធ្វើឱ្យបាត់បង់សណ្ដាប់ធ្នាប់សាធារណៈ និងបង្កការកកស្ទះដល់ការធ្វើដំណើររបស់ប្រជាពលរដ្ឋ។

លោកអភិបាលស្រុកក៏បានធ្វើការណែនាំឱ្យអាជីវករគ្រប់រូប ត្រូវចេះវេចខ្ចប់និងទុកដាក់កាកសំណល់ក៏ដូចជាសំរាម ឱ្យបានត្រឹមត្រូវតាមកន្ត្រកឬធុងសំរាម។ដើម្បីរក្សាបាននូវបរិស្ថានស្អាត និងផាសុកភាពសម្រាប់ខ្លួនយើងផ្ទាល់ និងអ្នកមកទិញទំនិញ ព្រមទាំងបានសង្កត់ធ្ងន់ថា ការរៀបចំសណ្ដាប់ធ្នាប់នេះមិនមែនជាការរឹតត្បិត ការរកស៊ីរបស់បងប្អូនឡើយ។ ប៉ុន្តែវាជាការរួមគ្នារៀបចំរបៀបរៀបរយ ដើម្បីទាក់ទាញម៉ូយនិងអ្នកទេសចរណ៍ ឱ្យចូលមកផ្សារព្រៃយុថ្ការបស់យើង កាន់តែច្រើនដែលជាប្រភពចំណូលដ៏ល្អ សម្រាប់លើកស្ទួយជីវភាពគ្រួសាររបសបងប្អូន ឱ្យកាន់តែរីកចម្រើនបន្ថែមទៀត។

លោក ភួន ឈីម ក៏បានបញ្ជាឱ្យកម្លាំងជំនាញរបស់រដ្ឋបាលស្រុកទាំងអស់ ត្រូវបន្តចុះអប់រំណែនាំនិងសម្របសម្រួល ការរៀបចំអនាម័យ បរិស្ថាន សណ្ដាប់ធ្នាប់សាធារណៈនេះជាប្រចាំ ដោយឈរលើគោលការណ៍អប់រំ ណែនាំ និងការយោគយល់គ្នាទៅវិញទៅមក ដើម្បីចៀសវាងការបង្កផលប៉ះពាល់ ដល់ការលក់ដូរប្រចាំថ្ងៃរបស់បងប្អូនប្រជាពលរដ្ឋ៕

ដោយ អ៊ុច សៀង