AKP បន្ទាយមានជ័យ ថ្ងៃទី១៨ ខែសីហា ឆ្នាំ២០២៦--ដើម្បីពង្រឹងប្រសិទ្ធភាពនៃការឆ្លើយតបគ្រោះមហន្តរាយ និងការជួយសង្គ្រោះនៅថ្នាក់មូលដ្ឋានឱ្យកាន់តែទាន់ពេលវេលា សាខាកាកបាទក្រហមកម្ពុជា ខេត្តបន្ទាយមានជ័យ ក្រោមការចង្អុលបង្ហាញ និងយកចិត្តទុកដាក់ខ្ពស់ពី ឯកឧត្តម អ៊ុំ រាត្រី ប្រធានគណៈកម្មាធិការសាខា បានចាត់ឱ្យក្រុមប្រតិបត្តិសាខាចុះរៀបចំវគ្គអប់រំបំប៉នពិសេសស្តីពី «ប្រវត្តិចលនា គោលការណ៍គ្រឹះទាំង៧ និងវិជ្ជាសង្គ្រោះបឋម» ជូនដល់អ្នកស្ម័គ្រចិត្តសរុបចំនួន ៥២នាក់ (ស្រី ១៦នាក់) កាលពីថ្ងៃទី១៧ ខែសីហា ឆ្នាំ២០២៦។

សមាសភាពអ្នកស្ម័គ្រចិត្តដែលបានចូលរួមនាឱកាសនោះ រួមមានមកពីឃុំបុស្បូវ ចំនួន ២៩នាក់ (ស្រី ៧នាក់) និងឃុំឈ្នួរមានជ័យ ចំនួន ២៣នាក់ (ស្រី ១០នាក់) ស្ថិតក្នុងស្រុកព្រះនេត្រព្រះ ខេត្តបន្ទាយមានជ័យ។

លោកស្រី សុខ លាភា នាយិកាសាខាកាកបាទក្រហមកម្ពុជា ខេត្តបន្ទាយមានជ័យ បានគូសបញ្ជាក់ថា វគ្គបណ្តុះបណ្តាលនេះរៀបចំឡើងដើម្បីរំលេចនូវមេរៀនគ្រឹះ និងជំនាញបច្ចេកទេសសំខាន់ៗមានប្រវត្តិចលនាកាកបាទក្រហម និងអឌ្ឍចន្ទក្រហម បណ្តុះការយល់ដឹងស៊ីជម្រៅពីប្រភពដើម ស្មារតីលះបង់ និងបេសកកម្មបម្រើប្រជាជាតិ។គោលការណ៍គ្រឹះទាំង ៧ ក្រសោបយក មនុស្សធម៌ ភាពមិនលំអៀង អព្យាក្រឹតភាព ឯករាជ្យភាព សេវាកម្មស្ម័គ្រចិត្ត ឯកភាព និងសកលភាព ប្រកាន់ខ្ជាប់ជាប្រទីបបំភ្លឺផ្លូវក្នុងការប្រតិបត្តិការងារ។វិជ្ជាសង្គ្រោះបឋម ការហ្វឹកហាត់បច្ចេកទេស និងជំនាញជាក់ស្តែង ក្នុងការសង្គ្រោះជីវិតជនរងគ្រោះ ឬអ្នកជួបឧបទ្ទវហេតុភ្លាមៗ ឱ្យបានទាន់ពេលវេលាមុនពេលបញ្ជូនទៅមន្ទីរពេទ្យ។

"ការចុះពង្រឹងសមត្ថភាពដល់ផ្ទាល់ដីនាពេលនេះ មិនត្រឹមតែជាការបំពេញបន្ថែមនូវចំណេះដឹងផ្នែកទ្រឹស្តី និងបច្ចេកទេសសង្គ្រោះប៉ុណ្ណោះទេ ប៉ុន្តែថែមទាំងជាការដាស់តឿន និងលើកទឹកចិត្តដល់កម្លាំងស្ម័គ្រចិត្តទាំងអស់ ឱ្យបន្តដើរតួនាទីជាប្រឡាយភ្ជាប់ទំនាក់ទំនងយ៉ាងជិតស្និទ្ធរវាងកាកបាទក្រហមកម្ពុជា និងប្រជាពលរដ្ឋរងគ្រោះ ឬងាយរងគ្រោះបំផុតនៅក្នុងសហគមន៍"។ 

ក្នុងបរិយាកាសសិក្សាប្រកបដោយភាពស្និទ្ធស្នាល និងសកម្ម អ្នកស្ម័គ្រចិត្តដែលបានចូលរួមបានសម្តែងនូវក្តីរំភើប និងមោទនភាពយ៉ាងខ្លាំងចំពោះឱកាសទទួលបានចំណេះដឹងថ្មីៗនេះ។

អ្នកស្ម័គ្រចិត្តតំណាងឱ្យឃុំបុស្បូវ និងឃុំឈ្នួរមានជ័យ បានចែករំលែកថា ការយល់ដឹងកាន់តែច្បាស់ពីតម្លៃនៃស្មារតីស្ម័គ្រចិត្ត ការសិក្សាពីប្រវត្តិចលនា និងគោលការណ៍គ្រឹះទាំង ៧ បានធ្វើឱ្យពួកគាត់យល់កាន់តែច្បាស់អំពីតួនាទីដ៏ខ្ពង់ខ្ពស់របស់ខ្លួន ក្នុងការធ្វើជាតំណាងឱ្យភាពស្មោះត្រង់ គ្មានការរើសអើង និងការលះបង់ដើម្បីសហគមន៍។

ភាពជឿជាក់លើជំនាញសង្គ្រោះជីវិត ការអនុវត្តជាក់ស្តែងលើ «វិជ្ជាសង្គ្រោះបឋម» បានផ្តល់នូវទំនុកចិត្តយ៉ាងខ្លាំងដល់ពួកគាត់។ កន្លងមក ការជួបប្រទះគ្រោះថ្នាក់ចរាចរណ៍ ឬការសន្លប់បាត់ស្មារតីក្នុងភូមិ តែងតែធ្វើឱ្យអ្នកស្រុកមានការភិតភ័យខ្លាំង ប៉ុន្តែពេលនេះ ពួកគាត់មានជំនាញត្រឹមត្រូវក្នុងការឃាត់ឈាម សង្គ្រោះខ្យល់ដកដង្ហើម និងការបញ្ជូនជនរងគ្រោះប្រកបដោយសុវត្ថិភាព។

អ្នកស្ម័គ្រចិត្តទាំងអស់បានប្តេជ្ញាចិត្តរួមគ្នាថា នឹងយកចំណេះដឹងដែលទទួលបានពីវគ្គបំប៉ននេះ ទៅចែករំលែកបន្តដល់ប្រជាពលរដ្ឋក្នុងភូមិ និងត្រៀមខ្លួនជាស្រេចដើម្បីក្លាយជា «អ្នកឆ្លើយតបមុនគេ» ក្នុងការចុះជួយអន្តរាគមន៍ និងសម្រាលទុក្ខលំបាករបស់ប្រជាពលរដ្ឋក្នុងមូលដ្ឋាន។

ការបណ្តុះបណ្តាលនាពេលនេះ បានស្តែងឱ្យឃើញយ៉ាងច្បាស់ពីការអនុវត្តន៍ជាក់ស្តែងនូវបាវចនាដ៏ថ្លៃថ្លា «កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា ដោយមិនទុកនរណាម្នាក់ចោលឡើយ» ដែលជាបង្អែកយ៉ាងរឹងមាំ និងជាទីសង្ឃឹមរបស់ប្រជាពលរដ្ឋនៅគ្រប់កាលៈទេសៈ៕

ដោយ ឈុន សារ៉ាត