AKP កំពង់ស្ពឺ ថ្ងៃទី១៧ ខែសីហា ឆ្នាំ២០២៦--

ឯកឧត្តម ឃឹម សិរីវង្ស រដ្ឋលេខាធិការក្រសួងពាណិជ្ជកម្ម អញ្ជើញជាអធិបតីភាពក្នុងពិធីបើកសិក្ខាសាលាផ្សព្វផ្សាយស្តីពី «នីតិវិធីនៃការអនុវត្តមុខងារវិស័យពាណិជ្ជកម្ម ដែលបានផ្ទេរទៅឱ្យរដ្ឋបាលក្រុង ស្រុក នៃខេត្តកំពង់ស្ពឺ» ដើម្បីពង្រឹងការផ្តល់សេវាឱ្យកាន់តែមានប្រសិទ្ធភាព និងឆ្លើយតបទាន់ពេលវេលាជូនប្រជាពលរដ្ឋនៅថ្នាក់មូលដ្ឋាន ដោយមានការអញ្ជើញចូលរួមពីសំណាក់អគ្គនាយករងនៃក្រសួងពាណិជ្ជកម្ម ប្រធានមន្ទីរពាណិជ្ជកម្មខេត្ត នាយករងរដ្ឋបាលសាលាខេត្ត ប្រធានអង្គភាពច្រកចេញចូលតែមួយរដ្ឋបាលខេត្ត អភិបាលរងក្រុង-ស្រុក ព្រមទាំងប្រធានការិយាល័យច្រកចេញចូលតែមួយ និងប្រធានការិយាល័យសេដ្ឋកិច្ច និងអភិវឌ្ឍន៍សហគមន៍មកពីគ្រប់ក្រុង-ស្រុកទូទាំងខេត្តកំពង់ស្ពឺ។

លោក ញ៉ឹល សំបូរ ប្រធានមន្ទីរពាណិជ្ជកម្មខេត្តកំពង់ស្ពឺ បានមានប្រសាសន៍បញ្ជាក់ថា ការផ្ទេរមុខងារវិស័យពាណិជ្ជកម្មមកឱ្យរដ្ឋបាលក្រុង ស្រុក នាពេលនេះ គឺជាការឆ្លើយតបយ៉ាងចំទិសដៅ ក្នុងការសម្រួលដល់ការផ្តល់សេវាសាធារណៈជូនប្រជាពលរដ្ឋ និងអាជីវករឱ្យបានកាន់តែឆាប់រហ័ស តម្លាភាព និងមានប្រសិទ្ធភាពខ្ពស់នៅថ្នាក់មូលដ្ឋាន។ ‎លោកប្រធានមន្ទីរនឹងបន្តសហការយ៉ាងជិតស្និទ្ធជាមួយរដ្ឋបាលខេត្ត ក៏ដូចជារដ្ឋបាលក្រុង-ស្រុក ក្នុងការផ្តល់ការគាំទ្រផ្នែកបច្ចេកទេស និងការបណ្តុះបណ្តាលបន្ថែមដល់មន្ត្រីអនុវត្តផ្ទាល់នៅតាមការិយាល័យច្រកចេញចូលតែមួយ និងការិយាល័យសេដ្ឋកិច្ច និងអភិវឌ្ឍន៍សហគមន៍ ដើម្បីធានាថាការអនុវត្តមុខងារដែលបានផ្ទេរនេះ ប្រព្រឹត្តទៅដោយរលូន និងស្របតាមនីតិវិធីកំណត់របស់ក្រសួងពាណិជ្ជកម្ម។

លោក ម៉ី ប៊ុនលី អគ្គនាយករង បានធ្វើបទបង្ហាញជូនដល់សិក្ខាកាមទាំងអស់អំពីលិខិតបទដ្ឋានគតិយុត្តិ នីតិវិធីបច្ចេកទេស និងសេចក្តីណែនាំលម្អិត ក្នុងការអនុវត្តមុខងារវិស័យពាណិជ្ជកម្មដែលបានផ្ទេរទៅឱ្យរដ្ឋបាលក្រុង ស្រុក។ បទបង្ហាញនេះបានផ្តល់នូវការយល់ដឹងកាន់តែច្បាស់ និងជាទុនយ៉ាងសំខាន់ដល់សិក្ខាកាមទាំងអស់ ក្នុងការយកទៅអនុវត្តការងារជាក់ស្តែងនៅតាមអង្គភាព និងក្រុង-ស្រុករបស់ខ្លួន ឱ្យទទួលបានប្រសិទ្ធភាព និងភាពត្រឹមត្រូវតាមច្បាប់។

ឆ្លៀតក្នុងឱកាសនោះ ឯកឧត្តម ឃឹម សិរីវង្ស រដ្ឋលេខាធិការក្រសួងពាណិជ្ជកម្ម បានបញ្ជាក់ថា ការផ្ទេរមុខងារ និងភារកិច្ចក្នុងវិស័យពាណិជ្ជកម្មទៅឱ្យរដ្ឋបាលថ្នាក់ក្រោមជាតិ គឺជាគោលនយោបាយដ៏លេចធ្លោរបស់រាជរដ្ឋាភិបាល ក្នុងការជំរុញកែទម្រង់វិមជ្ឈការ និងវិសហមជ្ឈការ ដើម្បីបង្ខិតសេវាសាធារណៈឱ្យទៅជិតប្រជាពលរដ្ឋ និងអាជីវករនៅថ្នាក់មូលដ្ឋានបំផុត។

ឯកឧត្តមរដ្ឋលេខាធិការបានសង្កត់ធ្ងន់ថា មន្ត្រីអនុវត្តនៅថ្នាក់ក្រុង-ស្រុក ទាំងអស់ ត្រូវប្រកាន់ខ្ជាប់នូវស្មារតីទទួលខុសត្រូវខ្ពស់ ប្រកបដោយអភិបាលកិច្ចល្អ និងតម្លាភាពក្នុងការផ្តល់សេវា ព្រមទាំងត្រូវបន្តសិក្សាស្វែងយល់បន្ថែមអំពីលិខិតបទដ្ឋានគតិយុត្តិ និងនីតិវិធីបច្ចេកទេសពាក់ព័ន្ធ ដើម្បីជួយសម្រួលដល់ការចុះបញ្ជី និងការធ្វើអាជីវកម្មផ្សេងៗឱ្យបានលឿនឆាប់រហ័ស ដើរទន្ទឹមគ្នានឹងការកាត់បន្ថយពេលវេលា និងចំណាយផ្លូវការរបស់ប្រជាពលរដ្ឋ។

បន្ថែមពីនេះ ឯកឧត្តមបានផ្តាំផ្ញើដល់មន្ទីរពាណិជ្ជកម្មខេត្ត និងរដ្ឋបាលខេត្តកំពង់ស្ពឺ ត្រូវបន្តធ្វើជាអាណាព្យាបាល បង្កើនការសម្របសម្រួល ផ្តល់ការគាំទ្រផ្នែកបច្ចេកទេស និងតាមដានការអនុវត្តការងាររបស់រដ្ឋបាលក្រុង-ស្រុក ឱ្យមានប្រសិទ្ធភាពខ្ពស់ ដើម្បីរួមចំណែកលើកកម្ពស់បរិយាកាសអាជីវកម្ម និងការអភិវឌ្ឍសេដ្ឋកិច្ចក្នុងខេត្តកំពង់ស្ពឺទាំងមូលផងដែរ៕

ដោយ៖ ម៉ែន ប៊ុនធីម