AKP ប៉ៃលិន ថ្ងៃទី១៤ ខែសីហា ឆ្នាំ២០២៦-- ព្រះសោភ័ណរតនវេទី អ៊ា សុផន ព្រះមេគណខេត្តប៉ៃលិន និងជាព្រះចៅអធិការវត្តពោធិមារាម ហៅវត្តប៉ាហ៊ី បានដឹកនាំព្រះសង្ឃ មន្ត្រីរាជការ កងកំលាំងប្រដាប់អាវុធ និងប្រជាពុទ្ធបរិស័ទយ៉ាងច្រើនកុះករ ចុះដាំកូនឈើប្រណិត ចំនួន ១.៤០០ដើម នៅថ្ងៃទី១៤ ខែសីហា ឆ្នាំ២០២៦ រួមមាន៖ ដើមបេង ដើមក្រញូង នាងនួន ធ្នង់ និងដើមព្រីង នៅក្នងពុទ្ធមណ្ឌលសង្ឃមណ្ឌលព្រៃសង្ឃវន្ត ស្ថិតក្នុងភូមិភូមិបហ៊ុយ ក្នុងសង្កាត់បយ៉ាខា ក្រុងប៉ៃលិន ខេត្តប៉ៃលិន ដែលកន្លងមក ធ្លាប់រងការកាប់ទន្រ្ទាន និងភ្លើងឆេះព្រៃ វាលអស់ជាអន្លើៗ។

ការដាំដើមឈើនេះមានការចូលរួមពីសំណាក់លោកអភិបាលរងក្រុងប៉ៃលិន ក្រុមប្រឹក្សាសង្កាត់ប៉ៃលិន ក្រុមប្រឹក្សាសង្កាត់បយ៉ាខា មន្ត្រីរាជការនៃមន្ទីរបរិស្ថាន មន្ទីរធម្មការ និងសាសនា តំណាងកងកម្លាំងប្រដាប់អាវុធ លោកគ្រូ អ្នកគ្រូ សិស្សានុស្ស លោកមេភូមិ ព្រមទាំងប្រជាពុទ្ធបរិស័ទជិត ឆ្ងាយ ក្នុងខេត្តប៉ៃលិនយ៉ាងច្រើនកុះករ។

ព្រះសោភ័ណរតនវេទី អ៊ា សុផន ព្រះមេគណខេត្តប៉ៃលិន និងជាព្រះចៅអធិការវត្តពោធិមារាម ហៅវត្តប៉ាហ៊ី បានមានថេរដីកាបញ្ជាក់ថា សកម្មភាពដាំដើមឈើនេះ ធ្វើឡើងក្នុងគោលបំណងដើម្បីស្តារ និងរក្សាគម្របព្រៃឈើឡើងវិញ បង្កើតជាជម្រកដ៏សុវត្ថិភាពសម្រាប់សត្វព្រៃ និងផ្តល់ផលប្រយោជន៍ជាច្រើនដល់បរិស្ថានធម្មជាតិ។ ព្រះអង្គបានបន្តថា ការងារនេះក៏ជាការចូលរួមចំណែក ជាមួយរាជរដ្ឋាភិបាលកម្ពុជា និងស្របតាមអនុសាសន៍ដឹកនាំរបស់ លោកជំទាវ បណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន ដែលតែងតែយកចិត្តទុកដាក់ និងជំរុញឱ្យមានការស្រឡាញ់ ការថែរក្សា និងការដាំដុះដើមឈើឡើងវិញ។

ព្រះអង្គបានបន្តថា ចាប់តាំងពីឆ្នាំ២០២០ មកដល់ពេលនេះ សង្ឃមណ្ឌលព្រៃសង្ឃវន្តបានដាំកូនឈើសរុបបានប្រមាណ ៩.៥០០ដើមមកហើយ។ ការដាំដើមឈើចំនួន ១.៤០០ដើមបន្ថែមទៀត នាពេលនេះ នឹងរឹតតែបង្កើនភាពបៃតង និងនិរន្តរភាពបរិស្ថាន នៅក្នុងខេត្តប៉ៃលិនឱ្យកាន់តែប្រសើរឡើង៕

ដោយ៖ វួច ពឿន