AKP កំពង់ស្ពឺ  ថ្ងៃទី១២ ខែសីហា ឆ្នាំ២០២៦--ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា អញ្ជើញជាគណៈអធិបតី ក្នុងព្រឹត្តិការណ៍ប្រកួតកីឡាមិត្តភាព និងសប្បុរសធម៌ ក្រោមប្រធានបទ «បាល់ទាត់ភ្ជាប់បេះដូង ជួយបងប្អូនភៀសសឹកនៅភូមិរងចាំ» រវាងថ្នាក់ដឹកនាំខេត្តកំពង់ស្ពឺ និងក្រុមបាល់ទាត់ ស.ស.យ.ក. អលស្តារ នារសៀល ថ្ងៃទី១១ ខែសីហា ឆ្នាំ២០២៦។កម្មវិធីនេះមានការអញ្ជើញចូលរួមពីសំណាក់ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ឯកឧត្តម លោកជំទាវ សមាជិកគណៈអចិន្ត្រៃយ៍ និងគណៈកម្មាធិការកណ្តាល ស.ស.យ.ក. ឯកឧត្តម លោកជំទាវ លោក លោកស្រី ថ្នាក់ដឹកនាំខេត្ត មន្ទីរអង្គភាពចំណុះរដ្ឋបាលខេត្ត និងអ៊ំ ពូ មីង បងប្អូនប្រជាពលរដ្ឋ និងប្អូនៗយុវជន នៅកីឡដ្ឋានខេត្តកំពង់ស្ពឺ។

ជាកិច្ចចាប់ផ្ដើម ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ បានឡើងធ្វើការស្វាគមន៍យ៉ាងកក់ក្ដៅចំពោះវត្ដមានថ្នាក់ដឹកនាំ ឯកឧត្តម លោកជំទាវ លោក លោកស្រី ថ្នាក់ដឹកនាំខេត្ត មន្ទីរអង្គភាពចំណុះរដ្ឋបាលខេត្ត និងអ៊ំ ពូ មីង បងប្អូនប្រជាពលរដ្ឋ និងប្អូនៗយុវជនដែលមកចូលរួមទស្សនាផ្ទាល់យ៉ាងច្រើនកុះករ។ 

ជាកិច្ចបន្ទាប់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសម្តែងនូវសេចក្តីសោមនស្សរីករាយ នឹងកោតសរសើរ រដ្ឋបាលខេត្តកំពង់ស្ពឺ ដែលបានគាំទ្រ និងសម្របសម្រួល រៀបចំការប្រកួតបាល់ទាត់មិត្តភាពនេះឡើង ដើម្បីរៃអង្គាសថវិកាជួយដល់ប្រជាពលរដ្ឋភៀសសឹក នៅ«ភូមិរង់ចាំ» ខេត្តបន្ទាយមានជ័យ។ ឯកឧត្តមបានបន្ថែមទៀតថាកម្មវិធីនាថ្ងៃនេះ គឺជាការចាប់ផ្តើម និងជាផ្នែកមួយនៃកម្មវិធី «បេះដូងសប្បុរសដើម្បីភូមិម៉ង់ចាំ» ដែលក្រុមបាល់ទាត់ ស.ស.យ.ក. អលស្ដារ ផ្តើមរៀបចំឡើង និងមានការសហការ គាំទ្ររៀបចំពីភាគីពាក់ព័ន្ធ រួមមានក្រុមបាល់ទាត់ដៃគូចំនួន១១ និងស្ថាប័នដៃគូដទៃទៀត។ 

ឯកឧត្តមក៏បានអំពាវនាវ និងលើកទឹកចិត្តដល់មហាជន យុវជន និងសប្បុរសជនទាំងអស់ បន្តរួបរួមគ្នាក្នុងស្មារតី “ខឿនការពារជាតិ ប្រជាជន” គឺយើងបន្តរួមគ្នា ចូលរួមចំណែកបន្ថែមជាមួយរាជរដ្ឋាភិបាលកម្ពុជា ដើម្បីផ្តល់ភាពកក់ក្តៅ ក្តីស្រឡាញ់ និងក្តីរលឹក សម្រាប់បងប្អូនជនរួមជាតិរបស់យើង។

គួរបញ្ជាក់ផងដែរថា ការប្រកួតរវាងក្រុមបាល់ទាត់រួមគ្នាដើម្បីកំពង់ស្ពឺ vs ក្រុមបាល់ទាត់ ស.ស.យ.ក. អលស្តារ ជាលទ្ធផលការស៊ុតបញ្ចូលទីបានបីទល់មួយ ដោយក្រុមបាល់ទាត់ ស.ស.យ.ក. អលស្តារ ទទួលបាន3គ្រាប់ ក្រុមបាល់ទាត់រួមគ្នាដើម្បីកំពង់ស្ពឺទទួលបាន១គ្រាប់ នឹងថវិកាដែលរៃអង្គាសបានក្នុងការប្រកួតមិត្តភាពសប្បុរសធម៌ នៃកម្មវិធី "បេះដូងសប្បុរស ដើម្បីភូមិរង់ចាំ" បានសរុបចំនួន ៤៥ ១០០ ០០០រៀល និង ១ ៦៥០ដុល្លារផងដែរ៕

ដោយ ម៉ែន ប៊ុនធីម