AKP កំពង់ធំ ថ្ងៃទី៨ ខែសីហា ឆ្នាំ២០២៦-- នៅទីស្នាក់ការគណបក្សប្រជាជនកម្ពុជាឃុំបន្ទាយស្ទោង ស្រុកស្ទោង ខេត្តកំពង់ធំ នាព្រឹកថ្ងៃទី៨ ខែសីហា ឆ្នាំ២០២៦ លោក ថាំង វីយុទ្ធដា ប្រធានក្រុមការងារគណបក្សចុះមូលដ្ឋានឃុំបន្ទាយស្ទោង តំណាងឯកឧត្តម ថោ ជេដ្ឋា អនុប្រធានក្រុមការងារគណបក្សចុះមូលដ្ឋានខេត្តកំពង់ធំ និងជាប្រធានក្រុមការងារគណបក្សចុះមូលដ្ឋានស្រុកស្ទោង បានអញ្ជើញដឹកនាំក្រុមការងារជួបសំណេះសំណាលជាមួយសិស្សានុសិស្សចំនួន៧១នាក់ ដែលត្រៀមប្រឡងសញ្ញាបត្រមធ្យមសិក្សាទុតិយភូមិ នាថ្ងៃទី១០-១១ខែសីហា ឆ្នាំ២០២៦ ដែលមកពីបណ្តាភូមិទាំង១៥ ក្នុងមូលដ្ឋានឃុំបន្ទាយស្ទោង។

ក្នុងឱកាសនោះ លោកប្រធានក្រុមការងារបានពាំនាំនូវការផ្ដាំផ្ញើសួរសុខទុក្ខ និងការសួរសុខទុក្ខប្រកបដោយការយកចិត្តទុកដាក់ដ៏ខ្ពង់ខ្ពស់ពីឯកឧត្តមរដ្ឋមន្ត្រី ថោ ជេដ្ឋា ជូនដល់សិស្សានុសិស្សទាំងអស់។ លោកបានលើកឡើងថាការខិតខំរៀនសូត្រ១២ឆ្នាំកន្លងមកនឹងត្រូវឆ្លងកាត់ការប្រឡងបាក់ឌុបនាពេលខាងមុខ ដើម្បីត្រួសត្រាយផែនការជីវិត។

ជាមួយគ្នានេះ ក្មួយៗគួរស្វែងយល់ជ្រើសរើសជំនាញសិក្សាស្របតាមសមត្ថភាព និងចំណង់ចំណូលចិត្តពិតប្រាកដរបស់ខ្លួន ដោយមិនត្រូវជ្រើសរើសតាមគ្នីគ្នាឡើយ។លោកក៏បានផ្ដល់ដំបូន្មានឱ្យក្មួយៗបន្តបង្កើនចំណេះដឹងដើម្បីអនាគតខ្លួន ក្រុមគ្រួសារ និងសង្គមជាតិ ព្រមទាំងបានឧបត្ថម្ភថវិកាផ្ទាល់ជូនសិស្សទាំង៧១នាក់ សម្រាប់ធ្វើជាមធ្យោបាយប្រឡងនៅទីរួមខេត្តកំពង់ធំ។

លោកប្រធានក្រុមការងារ និងក្រុមការងារ ក៏បានឆ្លៀតឱកាសចុះសួរសុខទុក្ខប្រជាពលរដ្ឋក្នុងភូមិបរវែង ដោយបាននាំយកអំណោយ និងថវិកា ផ្តល់ជូនគ្រួសារដែលមានជីវភាពខ្វះខាតចំនួន៦គ្រួសារ ដោយក្នុង១គ្រួសារៗទទួលបានអង្ករចំនួន២០គីឡូក្រាម ត្រីខ ទឹកត្រី ទឹកស៊ីអ៊ីវ និងថវិកាមួយចំនួនផងដែរ៕

ដោយ ស៊ុម វណ្ណា