AKP ភ្នំពេញ ថ្ងៃទី០៦ ខែសីហា ឆ្នាំ២០២៦--ក្រុមមន្ទីរអប់រំ យុវជន និងកីឡា(អយក)ខេត្តកំពង់ស្ពឺ និងក្រុមបាត់ដំបងយូណាយធីតប្រជែងបាន៣ពិន្ទុដូចៗគ្នា បន្ទាប់ពីបានយកឈ្នះលើគូប្រជែងរៀងៗខ្លួន នៅក្នុងការប្រកួតសន្សំពិន្ទុ២ពូលផ្សេងគ្នា នៃការប្រកួតបាល់ទាត់ពានរង្វាន់សម្តេចតេជោ ហ៊ុន សែន ថ្នាក់ខេត្ត រដូវកាល២០២៦-២០២៧។

២ប្រកួតនេះបានធ្វើឡើងកាលពីល្ងាចថ្ងៃទី០៥ ខែសីហា ឆ្នាំ២០២៦ សម្រាប់ជំនួបសប្តាហ៍ទី៣ ដោយក្រុមម្ចាស់ផ្ទះ មន្ទីរអយកខេត្តកំពង់ស្ពឺបានយកឈ្នះក្រុមភ្ញៀវ ភ្នំពេញហ្គាឡាក់ស៊ី ២-១ (ពូល C) ខណៈក្រុមភ្ញៀវ បាត់ដំបងយូណាយធីតបានយកឈ្នះម្ចាស់ផ្ទះ ខេត្តឧត្តរមានជ័យ ដោយលទ្ធផល ៦-២ (ពូល B)។

គួរបញ្ជាក់ថា ការប្រកួតថ្នាក់ខេត្តពានរង្វាន់សម្តេចតេជោ ហ៊ុន សែន បានបញ្ចប់សប្តាហ៍ទី៣ បន្ទាប់ពីបញ្ចប់៥ប្រកួត រយៈពេល២ថ្ងៃនេះ។  ការប្រកួតថ្នាក់ខេត្តមាន១៩ក្រុមតំណាងរាជធានីខេត្តបានចូលរួមប្រកួតប្រជែង ដោយចែកចេញជា៥ពូល ដោយត្រូវដំណើរការប្រកួតពីថ្ងៃទី២១ ខែកក្កដា ដល់ថ្ងៃទី០១ ខែវិច្ឆិកា ឆ្នាំ២០២៦ ដើម្បីស្វែងរកក្រុមជ័យលាភីឡើងទៅប្រកួតថ្នាក់ជាតិជាមួយក្រុមឈរជើងក្នុងក្របខ័ណ្ឌលីគកំពូលកម្ពុជា ១១ក្រុម។ អ្វីកាន់តែពិសេសសម្រាប់ការប្រកួតពានរង្វាន់សម្តេចតេជោ ហ៊ុន សែន រដូវកាលថ្មីនេះ គឺក្រុមជ័យលាភីថ្នាក់ខេត្តអាចនឹងប្រកួតជម្រុះជាមួយក្រុមលីគលំដាប់ទី២ មុនជ្រើសរើសបេក្ខភាពក្រុមខ្លាំងៗទៅប្រកួតថ្នាក់ជាតិ៕

ដោយ ហេង ណាលីន (រូបភាព៖ Hun Sen Cup)