AKP ភ្នំពេញ៖ថ្ងៃទី៣ ខែសីហា ឆ្នាំ ២០២៦–

មន្រ្តីជាន់ខ្ពស់ក្រសួងបរិស្ថាន បានជួបពិភាក្សាការងារជាមួយ លោក ម៉ា ចិត្រា និងក្រុមការងារនៅទីស្តីការក្រសួងបរិស្ថាននៅរសៀលថ្ងៃទី៣ ខែសីហា ឆ្នាំ២០២៦ ដើម្បីពង្រីកការគ្រប់គ្រងធនធានធម្មជាតិ តារយៈពង្រីកកិច្ចសហការរវាងមន្ត្រីក្រសួងបរិស្ថាន និងអ្នកស្រឡាញ់បរិស្ថាន ក្នុងស្មារតីខ្មែរតែមួយ។

ក្រសួងបរិស្ថាន បានចាត់ទុកថានេះ គឺជាជំហ៊ានដ៏សំខាន់មួយទៀតនៃការចូលរួមកិច្ចសហប្រតិបត្តិការក្នុងការរួមគ្នាពិនិត្យ ទប់ស្កាត់ និង បង្រ្កាបបទល្មើស នៅតាមតំបន់ការពារធម្មជាតិ ដើម្បីធានាបាននូវការការពារ និងអភិរក្សព្រៃឈើប្រកបដោយនិរន្តរភាពនៅកម្ពុជា។

ដោយក្នុងនេះ ក្រសួងបរិស្ថានបានកំណត់ចំណុចសំខាន់ៗនៃកិច្ចសហការនេះ ដែលជា យុទ្ធសាស្រ្ត ២.១ ហើយក៏ជាជំហានទី២ នៃការអនុវត្តសសរស្តម្ភទី២ «ភាពបៃតង» នៃយុទ្ធសាស្ត្រចក្រាវិស័យបរិស្ថាន ដែលផ្តោតលើការពង្រឹងការគ្រប់គ្រងធនធានធម្មជាតិ ដើម្បីធានាបាននូវនិរន្តរភាពបរិស្ថាន។

ជាមួយគ្នានេះក្រសួងបរិស្ថានបាន ថ្លែងអំណរគុណ ដល់អង្គការសង្គមស៊ីវិល ភាគីពាក់ព័ន្ធ ជាពិសេស អ្នកស្រឡាញ់បរិស្ថាន និងសហគមន៍មូលដ្ឋាន ដែលបានរួមសហការយ៉ាងសកម្ម ជាមួយមន្ត្រីឧទ្យានុរក្ស ក្នុងការបង្ក្រាប និងទប់ស្កាត់បទល្មើសព្រៃឈើ។

ដោយឡែកឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងបញ្ជាក់ជុំវិញបញ្ហានេះថា កិច្ចសហការនេះបានឆ្លុះបញ្ចាំងពីការប្តេជ្ញាចិត្តដ៏មុតមាំ និងការចូលរួមចំណែកយ៉ាងសំខាន់ក្នុងការការពារ និងអភិរក្សព្រៃឈើ និងធនធានធម្មជាតិដ៏មានតម្លៃរបស់កម្ពុជា៕

ដោយ៖មករា