AKP ភ្នំពេញ ថ្ងៃទី២ ខែសីហា ឆ្នាំ២០២៦ -- ក្រសួងមហាផ្ទៃនៃរាជរដ្ឋាភិបាលកម្ពុជា បានថ្លែងអំណរគុណចំពោះលោក Tom Andrews អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា ដែលបានយកចិត្តទុកដាក់ និងទាញការកត់សម្គាល់ក្នុងសេចក្តីថ្លែងការណ៍ អំពីទុក្ខលំបាករបស់ពលរដ្ឋភៀសសឹកកម្ពុជាជាង៦៥០.០០០នាក់ បង្កឡើងដោយអំពើឈ្លានពាន និងការរំលោភសិទ្ធិមនុស្សយ៉ាងធ្ងន់ធ្ងរពីសំណាក់កងទ័ពថៃ ជាពិសេសស្ថានភាពពលរដ្ឋជាង២០.០០០នាក់ ដែលមិនទាន់អាចវិលទៅលំនៅឋានវិញ ដោយសារតែកងទ័ពថៃបានចូលកម្ទេចផ្ទះសំបែង និងកាន់កាប់ដីធ្លីភូមិករណ៍របស់ពួកគាត់ ក្រោយបទឈប់បាញ់ចូលជាធរមាន។ 

ក្នុងសេចក្តីប្រកាសព័ត៌មានស្តីពីស្ថានភាពពលរដ្ឋភៀសសឹក និងផលប៉ះពាល់លើតំបន់ស៊ីវិលកម្ពុជាគិតត្រឹមព្រឹកថ្ងៃទី២ ខែសីហា ឆ្នាំ២០២៦ ក្រសួងមហាផ្ទៃ នៃរាជរដ្ឋាភិបាលកម្ពុជាបានកត់សម្គាល់ថា អ្នករាយការណ៍ពិសេសបានលើកឡើងចំៗថា បន្ថែមលើវិបត្តិនៃការជម្លៀសខ្លួន ផលប៉ះពាល់ផ្នែកសេដ្ឋកិច្ច និងសង្គម បាន និងកំពុងស្តែងឡើងយ៉ាងធ្ងន់ធ្ងរ។ ប្រជាពលរដ្ឋដែលកំពុងស្នាក់នៅទីតាំងបណ្តោះអាសន្នបានបាត់បង់ការងារ និងទ្រព្យសម្បត្តិ ព្រមទាំងប្រឈមនឹងការលំបាកក្នុងការប្រកបរបរចិញ្ចឹមគ្រួសារ។

សេចក្តីប្រកាសព័ត៌មានដដែលនេះបានបន្តអះអាងថា ចាប់តាំងពីបទឈប់បាញ់រវាងកម្ពុជា និងថៃចូលជាធរមានកាលពីថ្ងៃទី២៧ ខែធ្នូ ឆ្នាំ២០២៥មក ភាគីថៃពុំបានអនុវត្តពេញលេញតាមសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) នោះទេ។ ក្នុងស្ថានភាពនេះ ក្រសួងបានបន្តកត់ត្រាទុករាល់សកម្មភាពមិនស្មោះត្រង់របស់ភាគីថៃ ទន្ទឹមគ្នានឹងការបន្តយកចិត្តទុក ដាក់ដោះស្រាយផលប៉ះពាល់លើប្រជាពលរដ្ឋ និងតំបន់ស៊ីវិលដោយសារអំពើឈ្លានពាន ជាពិសេសពលរដ្ឋដែលពុំទាន់អាចវិលត្រឡប់ទៅលំនៅឋានវិញបាន។

តាមរយៈសេចក្តីប្រកាសព័ត៌មានដែរ ក្រសួងមហាផ្ទៃ នៃរាជរដ្ឋាភិបាលកម្ពុជា បានអំពាវនាវជនរួមជាតិ ទាំងក្នុង និងក្រៅប្រទេស រួបរួមស្មារតីសាមគ្គីគាំទ្រ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលកំពុងដឹកនាំបេសកកម្មដោះស្រាយបញ្ហាព្រំដែនជាមួយភាគីថៃដោយសន្តិវិធី តាមយន្តការការទូត និងច្បាប់អន្តរជាតិ សំដៅនាំមកវិញនូវអធិបតេយ្យភាព បូរណភាពទឹកដី សន្តិភាព និងស្ថិរភាពតាមខ្សែបន្ទាត់ព្រំដែន ជាពិសេសជីវភាពជាប្រក្រតីនៃប្រជាជនទាំងសងខាង៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)