AKP ភ្នំពេញ ថ្ងៃទី៣១ ខែកក្កដា ឆ្នាំ២០២៦--ក្រុមមន្ត្រីជំនាញនៃនាយកដ្ឋានឧតុនិយម នៃក្រសួងធនធានទឹក និងឧតុនិយម បានចុះពិនិត្យ ជួសជុល និងថែទាំស្ថានីយឧតុនិយមស្វ័យប្រវត្តិ ដែលស្ថិតក្នុងភូមិសាស្ត្រខេត្តសៀមរាប ដើម្បីធានាបាននូវនិរន្តរភាព និងប្រសិទ្ធភាពក្នុងការតាមដាន ព្រមទាំងការគណនាព្យាករណ៍ស្ថានភាពអាកាសធាតុ។

កាលពីថ្ងៃព្រហស្បតិ៍ទី៣០ ខែកក្កដា ឆ្នាំ២០២៦ ក្នុងសកម្មភាពចុះបំពេញការងារនេះ ក្រុមមន្ត្រីជំនាញបច្ចេកទេសបានចុះអនុវត្តការងារបច្ចេកទេសផ្ទាល់នៅស្ថានីយឧតុនិយមស្វ័យប្រវត្តិចំនួន ៣ ទីតាំង រួមមាន៖
១. ស្ថានីយវ៉ារិន ស្ថិតក្នុងភូមិកញ្ចន់រុន ឃុំប្រាសាទ ស្រុកវ៉ារិន។
២. ស្ថានីយបន្ទាយស្រី ស្ថិតក្នុងភូមិបន្ទាយស្រី ឃុំខ្នាសណ្ដាយ ស្រុកបន្ទាយស្រី។
៣. ស្ថានីយប្រាសាទបាគង ស្ថិតក្នុងភូមិបង្កោង ឃុំអំពិល ស្រុកប្រាសាទបាគង។

ក្រុមការងារបច្ចេកទេសបានពិនិត្យរាល់ឧបករណ៍វាស់ស្ទង់ និងប្រព័ន្ធ Data Logger ដើម្បីធានាថាការបញ្ជូនទិន្នន័យទៅកាន់ម៉ាស៊ីនមេ (Server) ប្រព្រឹត្តទៅបានយ៉ាងល្អប្រសើរ ព្រមទាំងការទាញយកទិន្នន័យ រក្សាទុកផងដែរ។

បន្ថែមពីនេះ ក្រុមការងារក៏បានផ្លាស់ប្ដូរស៊ីមកាត អាគុយ ម៉ូដឹម ជួសជុលនិងផ្លាស់ប្ដូរគ្រឿងបន្លាស់ ព្រមទាំងប្ដូរថ្ម ក្នុងឧបករណ៍ Data Logger និងបានពិនិត្យឧបករណ៍វាស់កម្រិតទឹកភ្លៀង សីតុណ្ហភាព សំណើម ទិសដៅ ល្បឿនខ្យល់ និងសម្ពាធបរិយាកាស។ ជាចុងក្រោយ ក្រុមការងារក៏បានកាប់ឆ្ការព្រៃ និងសម្អាតបរិវេណស្ថានីយទាំងមូល ដើម្បីជៀសវាងការរំខានដល់ដំណើរការចាប់សញ្ញារបស់ឧបករណ៍៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)