AKP កំពង់ឆ្នាំង ថ្ងៃទី៣១ ខែកក្កដា ឆ្នាំ២០២៦--លោក រឿន វុទ្ធីអគ្គនាយករងបេតិកភណ្ឌនៃក្រសួងវប្បធម៌និងវិចិត្រសិល្បៈបានអញ្ជើញចូលរួមជាអធិបតីភាពតាំងពិព័រណ៍មិនអចិន្ត្រៃយ៍លើកទី២ នៅបរិវេណសួនបណ្ឌិតសភាចារ្យ អ៊ុក រ៉ាប៊ុន ខេត្តកំពង់ឆ្នាំង កាលពីថ្ងៃទី៣០ ខែកក្កដា ឆ្នាំ២០២៦ ដោយមានការអញ្ជើញចូលរួមពីលោក ឈឹម វុទ្ធា អភិបាលរងខេត្តកំពង់ឆ្នាំង លោក ពៅ ប៊ុនថន សមាជិកក្រុមប្រឹក្សាខេត្តកំពង់ឆ្នាំង លោក លោកស្រី ប្រតិភូក្រសួង វប្បធម៌ និងវិចិត្រសិល្បៈ ថ្នាក់ដឹកនាំរដ្ឋបាលខេត្ត មន្ត្រីរាជការ សិស្សានុសិស្ស និងប្រជាពលរដ្ឋជាច្រើននាក់ផងដែរ។

ក្នុងឱកាសនោះលោក រឿន វុទ្ធី បានថ្លែងនូវការកោតសរសើរចំពោះសារមន្ទីរពិព័រណ៍ខេត្តកំពង់ឆ្នាំងបានបើកដំណើរការជាផ្លូវការ ដោយមានថែរក្សា និងអភិរក្សវត្ថុបុរាណជាច្រើន ដែលបានមកពីការធ្វើកំណាយស្រាវជ្រាវនានា យកមករក្សាទុកនៅទីនេះនិងមានប្រើប្រាស់នូវហ្វីលកញ្ចក់រូបថតពិព័រណ៍មិនអចិន្ត្រៃយ៍តាំងបង្ហាញនូវរូបគំនូរនៅដើមសតវត្សរ៍ទី២០ ដែលបានរកឃើញឡើងវិញ ក្រោយពីគេធ្លាប់ជឿថា បាត់បង់ជារៀងរហូតទៅហើយ។ តាមរយៈរូបថតដ៏កម្រ សាស្ត្រាស្លឹករឹត និងបទពិសោធន៍បែបអន្តរកម្ម អ្នកទស្សនាអាចឈ្វេង យល់អំពីសារៈសំខាន់ផ្នែកវប្បធម៌ និង ឈុតឆាករឿងជាតក និងអំពីរឿងរ៉ាវដែលនាំឱ្យបាត់បង់ រហូតដល់រកឃើញឡើងវិញនូវគំនូរក្នុងព្រះវិហារព្រះកែវមរកតជាដើម។

ទន្ទឹមនឹងនេះលោកបានបន្តថា លោកគ្រូ អ្នកគ្រូសិស្សានុសិស្សក្នុងខេត្តក៍ដូចជានៅទូទាំងប្រទេសអាចចូលរួមតាំងពិព័រណ៌សមិទ្ធផលស្នាដៃរបស់សិស្សនៅថ្ងៃនេះ ដើម្បីសិស្សានុសិស្សមានបំណិនជីវិតនិងបទពិសោធន៍ល្អៗក្នុងការចាប់យកអាជីពនៃការងារក្នុងពេលអនាគត។ ក្រោមការដឹកនាំរបស់ប្រមុខរាជរដ្ឋាភិបាលសម្ដេចធិបតី ហ៊ុន ម៉ាណែត បានដាក់ចេញនូវយុទ្ធសាស្ត្របញ្ចកោណ គឺពង្រឹងអភិបាលកិច្ចល្អនៅសាលារៀនគ្រប់កម្រិត ពង្រឹងការរៀន និងបង្រៀនឱ្យសិស្សកាន់តែរៀនបានច្រើន ចេះច្រើនគឺប្រឡងជាប់ លើកទឹកចិត្តអាហារូបត្ថម្ភដល់សិស្សក្រីក្រខ្វះខាតដើម្បីពង្រឹងគុណភាព និងបង្កើនធនធានមនុស្សដើម្បីប្រទេសមានការអភិវឌ្ឍន៍។

ក្នុងឱកាសនោះ លោកអគ្គនាយករង បានជម្រុញដល់មន្ទីរវប្បធម៍និងរដ្ខបាលខេត្ត លោកគ្រូ អ្នកគ្រូ ខិតខំយកអស់កម្លាំងកាយកម្លាំងចិត្ត ផ្ទេរចំណេះដល់សិស្សានុសិស្សទាំងអស់ សិក្សារៀនសូត្រតាមកម្មវិធីទំនើប ដើម្បីអនាគតភ្លឺថ្លារបស់ប្អូនៗ និងសំណូមពរដល់មាតាបិតាសិស្សសូមចូលរួមសហការជាមួយលោកគ្រូ អ្នកគ្រូតាមដានការសិក្សាកូនៗតើមករៀនសូត្រប្រចាំថ្ងៃត្រឹមត្រូវទេ ឬគេចសាលាដើម្បីមានវិធានការអប់រំតម្រង់ទិសដៅឱ្យពួកគេក្លាយជាសិស្សល្អ កូនល្អ និងជាពលរដ្ឋល្អ ដើម្បីជួយកសាងសង្គមជាតិទៅថ្ងៃអនាគតតាមរយៈការដាក់តាំងបង្ហាញនិងសិក្សាពិព័រណ៍មិនអចិន្ត្រៃយ៍៕

ដោយ បៃ ស៊ីថុន