AKP បន្ទាយមានជ័យ ថ្ងៃទី៣០ ខែកក្កដា ឆ្នាំ២០២៦--ក្នុងពិធីបុណ្យជាតិ «រុក្ខទិវា ៩ កក្កដា» ដែលរដ្ឋបាលខេត្តបន្ទាយមានជ័យរៀបចំឡើងយ៉ាងមហោឡារិក ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានលើកឡើងពីសារៈសំខាន់នៃការរួមគ្នាដាំដុះ និងថែទាំដើមឈើ ដោយចាត់ទុកថាជាកិច្ចការរួមរបស់សហគមន៍ទាំងមូលក្នុងការធានានិរន្តភាពបរិស្ថាន និងការអភិវឌ្ឍបៃតង។  

ពិធីនេះបានប្រារព្ធឡើងនៅព្រឹកថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦ នេះ នៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ក្រោមអធិបតីភាពរបស់ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និង ឯកឧត្តមអ៊ុំ រាត្រី អភិបាលខេត្តបន្ទាយមានជ័យ ព្រមទាំងមានការចូលរួមពីមន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករ។

ថ្លែងក្នុងឱកាសនោះ ឯកឧត្តម អ៊ុំ រាត្រី បានគូសបញ្ជាក់យ៉ាងមុតមាំថា ការដាំដើមឈើមិនមែនជាបន្ទុករបស់ស្ថាប័នណាមួយតែឯកឯងនោះទេ ប៉ុន្តែវាគឺជា ភារកិច្ចរួមរបស់ពលរដ្ឋគ្រប់រូប។ ឯកឧត្តមបានអំពាវនាវចំៗដល់គ្រប់ភាគីពាក់ព័ន្ធទាំងអស់ ឱ្យរួមគ្នាជំរុញសកម្មភាពដាំដើមឈើឱ្យបានផុលផុសនៅគ្រប់ទីកន្លែង មិនថានៅតាមដងផ្លូវ សាលារៀន វត្តអារាម មូលដ្ឋានសហគមន៍ និងដីឡូត៍ឯកជនឡើយ។  ការដាំដើមឈើគឺជារឿងមួយ ប៉ុន្តែអ្វីដែលសំខាន់ជាងនេះទៅទៀត គឺការយកចិត្តទុកដាក់ ថែទាំឱ្យបានលូតលាស់ល្អ។ យើងមិនត្រូវដាំរួចហើយបោះបង់ចោលនោះទេ ព្រោះកូនឈើត្រូវការទឹក ការការពារ និងការស្រោចស្រពទើបអាចធំធាត់ក្លាយជាម្លប់ និងជួយស្រូបយកកាបូនឌីអុកស៊ីតបានពិតប្រាកដ។

ឯកឧត្តមអភិបាលខេត្តបានបន្ថែមថា បរិស្ថានបៃតងនឹងចូលរួមចំណែកយ៉ាងសំខាន់ក្នុងការទប់ស្កាត់ការប្រែប្រួលអាកាសធាតុ ផ្តល់ខ្យល់អាកាសបរិសុទ្ធ និងលើកម្ពស់សោភណភាពក្នុងខេត្តបន្ទាយមានជ័យឱ្យកាន់តែមានភាពទាក់ទាញ និងគួរឱ្យរស់នៅ។     ពិធីដាំដើមឈើអមដោយភាពសប្បាយរីករាយ និងស្មារតីសហការខ្ពស់ពីសំណាក់អ្នកចូលរួមគ្រប់ជាន់ថ្នាក់ ដែលបានបង្ហាញពីការយល់ដឹងស៊ីជម្រៅអំពីតម្លៃនៃធនធានព្រៃឈើ។

លោក គ្រូ សុខ រ៉ាឌី ជាគ្រូបង្រៀនម្នាក់ដែលបាននាំសិស្សានុសិស្សមកចូលរួម បានបង្ហាញចំណាប់អារម្មណ៍ថា«ខ្ញុំពិតជារំភើបនិងសប្បាយរីករាយណាស់ដែលបាននាំកូនសិស្សមកចូលរួមដាំដើមឈើថ្ងៃនេះ។ វាជាមេរៀនក្រៅថ្នាក់ដ៏មានតម្លៃបំផុតសម្រាប់ក្មេងៗ ដើម្បីឱ្យពួកគាត់ចេះស្រឡាញ់ធម្មជាតិ និងយល់ពីរបៀបថែរក្សាបរិស្ថានចាប់ពីពេលវ័យក្មេងតទៅ»។

អ្នកស្រី នី រ័ត្ន ប្រជាពលរដ្ឋរស់នៅក្នុងសង្កាត់ព្រះពន្លា បានលើកឡើងដែរថា «ការអំពាវនាវរបស់ឯកឧត្តមអភិបាលខេត្តគឺពិតជាត្រូវចំពេលវេលា។ ពួកយើងជាប្រជាពលរដ្ឋសន្យាថាមិនត្រឹមតែមកដាំថ្ងៃនេះទេ តែនឹងជួយមើលថែ និងស្រោចទឹកកូនឈើទាំងឡាយណាដែលនៅជិតផ្ទះយើងឱ្យធំធាត់បានល្អទាំងអស់គ្នា»។

គួរបញ្ជាក់ផងដែរថា ពិធីរុក្ខទិវា ៩ កក្កដា ឆ្នាំ២០២៦ នេះ មិនត្រឹមតែជាព្រឹត្តិការណ៍និមិត្តរូបនៃការបង្កើនគម្របព្រៃឈើប៉ុណ្ណោះទេ ប៉ុន្តែវាបានក្លាយជាចលនាសង្គមដ៏មានឥទ្ធិពលមួយក្នុងការបំផុសស្មារតីស្រឡាញ់ធម្មជាតិ និងការទទួលខុសត្រូវរួមគ្នាចំពោះអនាគតបរិស្ថានខេត្តបន្ទាយមានជ័យទាំងមូល៕

ដោយ ឈុន សារ៉ាត