AKP កំពង់ឆ្នាំង ថ្ងៃទី២៩ ខែកក្កដា ឆ្នាំ២០២៦--លោក ឈឹម វុទ្ធា អភិបាលរងខេត្តកំពង់ឆ្នាំងបានលើកឡើងបែប នេះនៅក្នុងពិធីដាំនិងចែកកូនឈើចម្រុះប្រមាណជាង១ម៉ឺនដើម ជូនដល់ប្រជាពលរដ្ឋដើម្បីចូលរួមអបអរសាទរបុណ្យរុក្ខទិវា​៩កក្កដាដែលខេត្តបានប្រារព្ធធ្វើឡើងនៅអនុវិទ្យាល័យព្រៃមូល ស្រុករលាប្អៀរ ខេត្តកំពង់ឆ្នាំង កាលពីថ្ងៃទី២៨ ខែកក្កដា ឆ្នាំ២០២៦ ។

ពិធីនេះមានការអញ្ជើញចូលរួមពី លោក ងិន ហ៊ុន ប្រធានមន្ទីរកសិកម្មរុក្ខាប្រមា ញ់និងនេសាទខេត្ត  ក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង សមាជិកក្រុមប្រឹក្សាខេត្ត អភិបាលរងខេត្ត ប្រធានអង្គភាពជុំវិញខេត្ត អភិបាលក្រុង ស្រុក អាជ្ញាធរដែនដី លោកគ្រូ អ្នកគ្រូ សិក្សានុសិស្ស និងប្រជាពលរដ្ឋចូលរួមជាច្រើននាក់ផងដែរ។

ក្នុងឱកាសនោះលោក ឈឹម វុទ្ធា បានមានប្រសាសន៏ថា ការដាំដើមឈើ គឺមានផលប្រយោជន៍ធំធេង ប្រជាពលរដ្ឋគ្រប់ៗរូប និងក្លាយជាប្រពៃណីនៃការរួមសាមគ្គីគ្នាដាំដើមឈើគ្រប់ប្រភេទ និងការថែរក្សាការពារ និងអភិវឌ្ឍធនធានព្រៃឈើ និងសត្វព្រៃដែលជាមរតកជាតិរបស់យើង ឲ្យបានគង់វង្សរហូតតទៅ។ ព្រៃឈើជាគម្របបៃតងលើធម្មជាតិ ហើយមានអត្ថប្រយោជន៍សម្រាប់មនុស្សជាតិទាំងអស់គ្នា និងសត្វគ្រប់ប្រភេទ នៅលើភពផែនដីយើងនេះ។ 

ទន្ទឹមនឹងនេះលោកបានបន្តថា បុណ្យរុក្ខទិវាបានបង្កើត​ឡើង​នៅក្នុងឆ្នាំ១៩៥២ ក្រោមព្រះរាជកិច្ចដឹកនាំរបស់ព្រះបរមរតនកោដ្ឋព្រះមហាវីរក្សត្រព្រះករុណាព្រះបាទសម្តេច​ព្រះ នរោត្តម សីហនុ ក្នុងគោលបំណងបំផុសចលនា ដាំដើមឈើឡើងវិញនិងការថែរក្សាសម្បត្ដិ​ព្រៃឈើរជា​ពិសេសដើម្បីថែរក្សាការពារ និងបណ្តុះ គំនិតស្រឡាញ់ព្រៃឈើ ក្នុងនោះដែរអង្គការសហ ប្រជាជាតិបានបង្កើតទិវាបរិស្ថានពិភពលោកក្នុងឆ្នាំ១៩៧២ ដើម្បីបំផុសគំនិតប្រជាពលរដ្ឋឱ្យស្រឡាញ់បរិស្ថានធម្មជាតិ។

ថ្លែងក្នុងបរិបទនេះលោកអភិបាលរង ខេត្តបានធ្វើការអំពាវនាវដល់ព្រះសង្ឃ មន្ត្រីរាជការ កងកម្លាំងប្រដាប់ អាវុធ និស្សិតសិស្ស ប្រជា​ពលរដ្ឋ​​ទាំងអស់ ឱ្យចូលរួមបណ្តុះគំនិត នៃការស្រឡាញ់ដើមឈើ ចូលរួមដាំដុះ ថែរក្សាការពារព្រៃឈើ និង​បរិស្ថាន​ធម្មជាតិ​ឱ្យបាន​គ្រប់ៗគ្នា ដើម្បីជាប្រយោជន៍ ដល់ការ​រស់​នៅ​របស់​ខ្លូន​យើង​ផង​សហគមន៍​យើងផង និង​ជីវិត​សត្វ​ព្រៃ​គ្រប់​ប្រភេទ​ព្រមទាំង ប្រព័ន្ធជីវៈចម្រុះផងដែរ។ 

ឯកឧត្ដមក៏បានអរគុណដល់ការខិតខំប្រឹងប្រែងរបស់មន្ទីរ អង្គភាព ស្ថាប័នពាក់​ព័ន្ធ អាជ្ញាធរ និង​សមត្ថ​កិច្ច គ្រប់លំដាប់ថ្នាក់ ព្រមទាំងសមាគម អង្គការ ជាតិ និងអន្តរជាតិ ​ដៃគូអភិវឌ្ឍន៍ ព្រម​ទាំង បងប្អូន ប្រជាពលរដ្ឋ ដែល​បាន​ចូល​រួម​ថែរក្សា ការ ពារ និង​ដាំដុះ​ដើម​ឈើ​កាន់​តែបានច្រើនឡើងវិញនៅ​គ្រប់ទីកន្លែង៕

ដោយ៖ បៃ ស៊ីថុន