AKP ភ្នំពេញ ថ្ងៃទី២៧ ខែកក្កដា ឆ្នាំ២០២៦ -- ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានសម្តែងនូវការកោតសរសើរ និងអបអរសាទរយ៉ាងស្មោះស្ម័គ្រចំពោះលោក ទីវ តារារិទ្ធ ដែលបានខិតខំប្រឹងប្រែងតស៊ូជិះកង់ឆ្លងកាត់ ៤០ប្រទេស លើចម្ងាយផ្លូវ ៦០.០០០គីឡូម៉ែត្រ រហូតសម្រេចបានបេសកកម្មជាប្រវត្តិសាស្ត្រយ៉ាងជោគជ័យក្នុងការនាំយកទង់ជាតិ និងស្មារតីតស៊ូរបស់ប្រជាជនខ្មែរទៅបង្ហាញលើឆាកអន្តរជាតិ ព្រមទាំងបានភ្ជាប់ជាមួយសកម្មភាពសប្បុរសធម៌ដ៏ឧត្តុង្គឧត្តមសម្រាប់កុមារកម្ពុជា។

ថ្លែងក្នុងសន្និសីទសារព័ត៌មានផ្សព្វផ្សាយការបិទបញ្ចប់បេសកកម្ម «ជិះកង់ដើម្បីកុមារកម្ពុជា» នារសៀលថ្ងៃទី២៧ ខែកក្កដា ឆ្នាំ២០២៦ នៅទីស្តីការក្រសួងព័ត៌មាន ឯកឧត្តមរដ្ឋមន្ត្រីបានមានប្រសាសន៍ថា ត្រឹមតែកង់មួយគ្រឿង និងកម្លាំងកាយចិត្តក្នុងរយៈពេល ២ឆ្នាំមកនេះ មិនមែនជាការផ្សងព្រេងធម្មតានោះទេ ប៉ុន្តែជា «បេសកកម្មបេះដូង» ដោយការលះបង់ពេលវេលា កម្លាំងកាយ និងស្មារតីរបស់លោក ទីវ តារារិទ្ធ ក្នុងដំណើរជិះកង់ឆ្លងកាត់ទ្វីបអាស៊ី អឺរ៉ុប និងអាហ្វ្រិក។ គោលបំណងចម្បងនៃបេសកកម្មប្រវត្តិសាស្ត្រនេះ គឺដើម្បីគៀងគរថវិកាគាំទ្រដល់មូលនិធិគន្ធបុប្ផាកម្ពុជា និងមន្ទីរពេទ្យកុមារអង្គរ ក្នុងការបន្តបេសកកម្មជួយសង្គ្រោះជីវិតទារក និងកុមារកម្ពុជា ដែលត្រូវការសេវាពិនិត្យ និងព្យាបាលជំងឺដោយឥតគិតថ្លៃ ប្រកបដោយគុណភាព និងសមធម៌។

ឯកឧត្តមរដ្ឋមន្ត្រី បានគូសបញ្ជាក់បន្ថែមថា រាល់គីឡូម៉ែត្រ និងឧបសគ្គដែលលោក ទីវ តារារិទ្ធ បានឆ្លងកាត់ មិនត្រឹមតែជាការល្បងសមត្ថភាព ឬជាការធ្វើដំណើរផ្ទាល់ខ្លួននោះទេ ប៉ុន្តែជាបេសកកម្មបម្រើជាតិ និងសង្គមយ៉ាងពិតប្រាកដ។ អ្វីដែលកាន់តែមានតម្លៃ និងគួរឱ្យគោរពបំផុតនោះ គឺលោកបានភ្ជាប់បេសកកម្មកីឡានេះទៅនឹងការគៀងគរថវិកាពីសប្បុរសជន និងក្រុមហ៊ុនដៃគូនានា ដូចជាក្រុមហ៊ុន ខ្មែរ ប៊ែវ៉ើរីជីស (Khmer Beverages) និងធនាគារ អេស៊ីលីដា (ACLEDA Bank) ជាដើម ដែលថវិកាទាំងនេះ នឹងចូលរួមចំណែកយ៉ាងសំខាន់ជាមួយមន្ទីរពេទ្យ ក្នុងការពិនិត្យ ព្យាបាល និងសង្គ្រោះជីវិតកុមារកម្ពុជារាប់ម៉ឺននាក់ដោយឥតគិតថ្លៃ។

ឯកឧត្តមបានលើកឡើងថា ការជួយដល់កុមារ គឺជួយដល់អនាគតរបស់ជាតិ ហើយរាល់ការបរិច្ចាគ ទោះតិចឬច្រើន ក៏សុទ្ធសឹងជាកម្លាំងចិត្ត និងជាឱកាសនៃការរស់រានមានជីវិតរបស់កុមារកម្ពុជា។ ជាមួយគ្នានេះ នៅក្នុងសម័យកាលឌីជីថលដែលសម្បូរទៅដោយព័ត៌មានចម្រុះ ប្រព័ន្ធផ្សព្វផ្សាយមិនត្រឹមតែមានតួនាទីចែករំលែកព័ត៌មានប៉ុណ្ណោះទេ ប៉ុន្តែត្រូវមានតួនាទីបង្កើតតម្លៃវិជ្ជមាន ជំរុញសាមគ្គីភាព និងលើកកម្ពស់ស្មារតីមនុស្សធម៌ក្នុងសង្គម។ សកម្មភាពដ៏មានន័យរបស់លោក ទីវ តារារិទ្ធ គឺជាគំរូដ៏ល្អប្រពៃនៃការយកកម្លាំងកាយចិត្តមកបម្រើបុព្វហេតុសង្គម បង្កើតក្តីសង្ឃឹម និងបំផុសស្មារតីដល់សាធារណជនទូទៅ។

សូមជម្រាបជូនថា លោក ទីវ តារារិទ្ធ ជាអ្នកបង្កើតមាតិកា និងជាអ្នកជិះកង់ផ្សងព្រេងផ្លូវឆ្ងាយធ្វើសកម្មភាពមនុស្សធម៌។ លោកបានចាប់ផ្តើមជិះកង់រៃអង្គាសថវិកាកាលពីថ្ងៃទី០៩ ខែមិថុនា ឆ្នាំ២០២៤ ដោយចេញដំណើរពីខេត្តសៀមរាប ជាមួយកង់ដោតទង់ជាតិកម្ពុជា ឆ្លងកាត់តាមបណ្តាប្រទេសចំនួន៤០ នៅទ្វីបអាស៊ី អឺរ៉ុប និងអាហ្វ្រិក។ ក្នុងរយៈពេល ២ឆ្នាំ លោកបានធ្វើដំណើរត្រឡប់មកដល់កម្ពុជាវិញនៅថ្ងៃទី០៣ ខែកក្កដា ឆ្នាំ២០២៦ ក្នុងចម្ងាយផ្លូវសរុបប្រមាណ ៦០.០០០គីឡូម៉ែត្រ និងទទួលបានថវិកាជាង ២៦០.០០០ដុល្លារអាមេរិក ដើម្បីឧបត្ថម្ភដល់មន្ទីរពេទ្យគន្ធបុប្ផា និងមន្ទីរពេទ្យកុមារអង្គរ៕

ដោយ៖ ទូច វលក្ខ័ណ
រូបថត៖ ខឹម សុវណ្ណារ៉ា