AKP បន្ទាយមានជ័យ ថ្ងៃទី១៨ ខែកក្កដា ឆ្នាំ២០២៦ — ការយកចិត្តទុកដាក់លើសុខទុក្ខ និងជីវភាពកសិកម្មរបស់ប្រជាពលរដ្ឋនៅតាមមូលដ្ឋាន នៅតែជាអាទិភាពចម្បងរបស់តំណាងរាស្ត្រ។ ជាក់ស្តែង នារសៀលថ្ងៃទី១៧ ខែកក្កដា ឆ្នាំ២០២៦ ឯកឧត្តម កែ គឹមយ៉ាន តំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ បានដឹកនាំក្រុមការងារចុះមូលដ្ឋានផ្ទាល់ ដើម្បីវាយតម្លៃស្ថានភាពទឹកជំនន់ និងធានាឱ្យបាននូវការផ្គត់ផ្គង់ទឹកសម្រាប់ការប្រើប្រាស់ ក៏ដូចជាការបង្កបង្កើនផលកសិកម្មរបស់ប្រជាពលរដ្ឋនៅក្នុងស្រុកមង្គលបូរី។

គំនិតផ្តួចផ្តើម និងសកម្មភាពស្នូលនៃការចុះមូលដ្ឋាននាឱកាសនេះ រួមមាន វាយតម្លៃស្ថានភាពទឹកជំនន់ និងប្រព័ន្ធធារាសាស្ត្រចំពោះមុខអមដំណើរដោយ ឯកឧត្តម ខេង ស៊ុម តំណាងរាស្ត្រមណ្ឌលខេត្តបន្ទាយមានជ័យ រួមទាំងថ្នាក់ដឹកនាំរដ្ឋបាលស្រុកមង្គលបូរី ដោយឯកឧត្តម កែ គឹមយ៉ាន បានអញ្ជើញទៅពិនិត្យមើលស្ថានភាពទឹកជំនន់ដោយផ្ទាល់នៅចំណុចសំណង់ស្ទាក់ទឹកពោធិ៍ពីរដើមស្ថិតក្នុងឃុំរហាត់ទឹក។ ការចុះពិនិត្យដល់ទីតាំងសំណង់ស្ទាក់ទឹកនេះ គឺដើម្បីវាយតម្លៃពីលទ្ធភាពនៃការស្តុកទឹក និងការរំដោះទឹក ដើម្បីបញ្ចៀសការលិចលង់ធ្ងន់ធ្ងរដល់ភោគផលកសិកម្ម និងដើម្បីធានាថាកម្រិតទឹកត្រូវបានគ្រប់គ្រងដោយប្រុងប្រយ័ត្ន ឆ្លើយតបទាំងតម្រូវការប្រើប្រាស់ប្រចាំថ្ងៃ និងការងារបង្កបង្កើនផលស្រែចំការរបស់កសិករក្នុងតំបន់។

បន្ទាប់ពីបានពិនិត្យស្ថានភាពប្រព័ន្ធទឹកជួរមុខរួចមក ឯកឧត្តមតំណាងរាស្ត្រទាំងទ្វេ និងក្រុមការងារ បានបន្តដំណើរចុះសួរសុខទុក្ខយ៉ាងស្និទ្ធស្នាលជាមួយក្រុមប្រឹក្សាឃុំ នៅឯសាលាឃុំបត់ត្រង់ ស្រុកមង្គលបូរី ដោយការជួបពិភាក្សា និងសួរសុខទុក្ខនេះ មិនត្រឹមតែជាការផ្តល់កម្លាំងចិត្តដល់មន្ត្រីមូលដ្ឋានប៉ុណ្ណោះទេ ប៉ុន្តែថែមទាំងជាឱកាសស្តាប់នូវរបាយការណ៍ និងបញ្ហាប្រឈមនានាដែលឃុំកំពុងជួបប្រទះ ដើម្បីស្វែងរកដំណោះស្រាយសមស្រប និងទាន់ពេលវេលាជូនពលរដ្ឋ។

សកម្មភាពចុះដល់មូលដ្ឋានរបស់ ឯកឧត្តម កែ គឹមយ៉ាន នារសៀលថ្ងៃនោះ បានស្តែងឱ្យឃើញយ៉ាងច្បាស់ពីមនសិការទទួលខុសត្រូវខ្ពស់ និងការមិនរារែកក្នុងការដើរតួជាស្ពានតភ្ជាប់រវាងរាជរដ្ឋាភិបាល ថ្នាក់ដឹកនាំ និងប្រជាពលរដ្ឋនៅគ្រប់កាលៈទេសៈ ក្នុងគោលដៅធានាសុខសុវត្ថិភាព និងស្ថិរភាពសេដ្ឋកិច្ចគ្រួសាររបស់ប្រជាកសិករខេត្តបន្ទាយមានជ័យ៕

ដោយ៖ ឈុន សារ៉ាត