AKP តាកែវ ថ្ងៃទី១៨ ខែកក្កដា ឆ្នាំ២០២៦-- ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ រួមជាមួយលោកអភិបាលរងខេត្ត ប្រធានមន្ទីរអង្គភាពពាក់ព័ន្ធ អាជ្ញាធរស្រុកព្រៃកប្បាស និងមន្ត្រីជំនាញ បានអញ្ជើញចុះពិនិត្យ និងសង្កេត ក្នុងដំណើរការបើកសំណើដេញថ្លៃ គម្រោងមូលនិធិអភិវឌ្ឍន៍ឃុំ-សង្កាត់ឆ្នាំ២០២៦ ក្នុងឃុំបានកាមស្រុកព្រៃកប្បាសខេត្តតាកែវ។ពិធីនេះរៀបចំឡើងនៅសាលាឃុំបានកាមស្រុកព្រៃកប្បាសខេត្តតាកែវ កាលពីថ្ងៃសុក្រ ទី១៧ ខែកក្កដា ឆ្នាំ២០២៦។

ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានធ្វើការណែនាំ និងជំរុញដល់ក្រុមហ៊ុនដែលទទួលការដេញថ្លៃបាន ត្រូវរូតរះពន្លឿនការស្ថាបនាសាងសង់ឱ្យបានឆាប់រហ័ស ដើម្បីឱ្យបងប្អូនប្រជាពលរដ្ឋ ដែលជាអ្នកប្រើប្រាស់ផ្លូវឆាប់បានទទួលផល និងយកទៅប្រើប្រាស់ក្នុងជីវភាពរស់នៅប្រចាំថ្ងៃ។

ឯកឧត្តមបានសង្កត់ធ្ងន់ថា ចំពោះក្រុមហ៊ុនដែលដេញថ្លៃបាននៅថ្ងៃនេះ ត្រូវតែយកចិត្តទុកដាក់ខ្ពស់ក្នុងការអនុវត្តការសាងសង់ ឱ្យបានត្រឹមត្រូវទៅតាមស្តង់ដាបច្ចេកទេស ជាពិសេសមិនត្រូវអនុវត្តឱ្យខុសពីកិច្ចសន្យានោះឡើយ។ដើម្បីធានាឱ្យសមិទ្ធផលផ្លូវដែលធ្វើរួចទាំងនោះមានភាពរឹងមាំ និងអាចប្រើប្រាស់បានយូរអង្វែង ជូនបងប្អូនប្រជាពលរដ្ឋនៅក្នុងមូលដ្ឋាន។

ឯកឧត្តមអភិបាលខេត្តក៏បានណែនាំ និងជំរុញបន្ថែមដល់អាជ្ញាធរឃុំបានកាម ត្រូវយកចិត្តទុកដាក់ចុះតាមដាន និងត្រួតពិនិត្យ ដំណើរការសាងសង់ឬការស្ថាបនាផ្លូវ របស់ក្រុមហ៊ុនដែលទទួលបានសិទ្ធិឱ្យបានជាប់ជាប្រចាំ។ ការចុះពិនិត្យផ្ទាល់ពីសំណាក់អាជ្ញាធរមូលដ្ឋាន គឺដើម្បីធានាថា ក្រុមហ៊ុនពិតជាបានអនុវត្តទៅតាមកិច្ចសន្យា និងបទដ្ឋានបច្ចេកទេសបានត្រឹមត្រូវ។ជៀសវាងការសាងសង់មិនគ្រប់លក្ខណៈបច្ចេកទេស ដែលនាំឱ្យផ្លូវឆាប់ខូចខាតទៅវិញ។

ឯកឧត្តមក៏ចូលរួមអបអរសាទរយ៉ាងកក់ក្តៅចំពោះក្រុមហ៊ុន ដែលទទួលបានសិទ្ធិសាងសង់នាពេលនេះ និងសង្ឃឹមយ៉ាងមុតមាំថា ទាំងក្រុមហ៊ុនសាងសង់ និងអាជ្ញាធរមូលដ្ឋាន នឹងសហការគ្នាបានល្អប្រសើរ ដើម្បីចូលរួមចំណែកអភិវឌ្ឍន៍ហេដ្ឋារចនាសម្ព័ន្ធក្នុងខេត្តឱ្យកាន់តែរីកចម្រើនប្រកបដោយគុណភាពខ្ពស់៕

ដោយ អ៊ុច សៀង