AKPបន្ទាយមានជ័យថ្ងៃទី១៣ខែមិថុនាឆ្នាំ២០២៦– ក្នុងស្មារតីសាមគ្គីភាព និងការយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋ ឯកឧត្តម អ៊ុ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ និងលោកជំទាវ ជ័យ ណារី អ៊ុរាត្រី បានអញ្ជើញចុះសួរសុខទុក្ខ និងប្រគល់ផ្ទះជូនគ្រួសារពលរដ្ឋក្រីក្រចំនួន ២ខ្នង ព្រមទាំងផ្តល់អំណោយមនុស្សធម៌ជូនដល់គ្រួសារងាយរងគ្រោះចំនួន ៦០គ្រួសារបន្ថែមទៀត។

កម្មវិធីនេះបានប្រព្រឹត្តទៅកាលពីរសៀលថ្ងៃទី១២ ខែមិថុនា ឆ្នាំ២០២៦ នៅមូលដ្ឋានស្រុកស្វាយចេក និងក្រុងសិរីសោភ័ណ។
ផ្ទះគ្រោងដែកដ៏រឹងមាំទាំង ២ខ្នង ត្រូវបានប្រគល់ជូនគ្រួសារដែលខ្វះលទ្ធភាពសាងសង់លំនៅដ្ឋាន ដោយមួយខ្នងស្ថិតនៅភូមិតាបែន ឃុំតាបែន ស្រុកស្វាយចេក និងមួយខ្នងទៀតស្ថិតនៅភូមិតាម៉ា សង្កាត់ម្កាក់ ក្រុងសិរីសោភ័ណ។ ការទទួលបាននូវជម្រកដ៏សមរម្យនេះ មិនត្រឹមតែជាការសម្រាលបន្ទុកជីវភាពប៉ុណ្ណោះទេ ប៉ុន្តែថែមទាំងជាការបង្កើនក្តីសង្ឃឹម និងភាពកក់ក្តៅជូនដល់គ្រួសារដែលជួបការលំបាកខ្លាំងក្នុងជីវិត។

ក្នុងឱកាសនោះ ឯកឧត្តម អ៊ុ រាត្រី បានពាំនាំនូវការផ្តាំផ្ញើសួរសុខទុក្ខពីសំណាក់ ឯកឧត្តម ឌិត ទីណា ប្រធានកិត្តិយសសាខា និងជាពិសេសពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជារឿយៗតែងតែគិតគូរពីសុខទុក្ខរបស់ប្រជាពលរដ្ឋគ្រប់កាលៈទេសៈ។

ឯកឧត្តមប្រធានបានគូសបញ្ជាក់យ៉ាងមុតមាំថា«សកម្មភាពនាពេលនេះ គឺស្របទៅនឹងមូលបទ «បន្តរួមកម្លាំងគ្នា ដើម្បីមនុស្សធម៌»។ ក្នុងនាមជាប្រធានសាខា ខ្ញុំពិតជាមានសេចក្តីរីករាយយ៉ាងខ្លាំង ដែលបានឃើញកិច្ចសហការគ្នាយ៉ាងជិតស្និទ្ធរវាងបណ្តាញក្រុមការងារចលនាមនុស្សធម៌គ្រប់ជាន់ថ្នាក់ ដែលនេះគឺជាកត្តាគន្លឹះធ្វើឱ្យចលនាមនុស្សធម៌របស់សាខា អនុវត្តទៅចំគោលដៅ និងដល់ដៃជនដែលកំពុងជួបការលំបាកពិតប្រាកដ»។

លើសពីនេះ ឯកឧត្តមបានក្រើនរំលឹកដល់បងប្អូនប្រជាពលរដ្ឋ ឱ្យយកចិត្តទុកដាក់ខ្ពស់លើការថែទាំសុខភាព ដោយអនុវត្តតាមការណែនាំរបស់ក្រសួងសុខាភិបាល ដើម្បីបង្ការជំងឺឆ្លង និងជំងឺមិនឆ្លងនានា ដែលអាចប៉ះពាល់ដល់អាយុជីវិត និងទ្រព្យសម្បត្តិផងដែរ។

អំណោយដែលបានផ្តល់ជូនក្នុងពិធីនេះ រួមមានសម្រាប់គ្រួសារទទួលបានផ្ទះ ផ្ទះគ្រោងដែកចំនួន ១ខ្នង, សម្ភារៈដំណេក១ឈុត, សម្ភារៈផ្ទះបាយ១ឈុត, អង្ករ៥០គីឡូក្រាម, មី១កេស, ទឹកត្រី១យួរ, ទឹកស៊ីអ៊ីវ១យួរ និងថវិកាមួយចំនួន។ សម្រាប់គ្រួសារងាយរងគ្រោះ ៦០គ្រួសារអង្ករ២៥គីឡូក្រាម, មី១កេស, ទឹកត្រី១យួរ, ទឹកស៊ីអ៊ីវ១យួរ, ត្រីខ១០កំប៉ុង និងថវិកាមួយចំនួន។

ការចុះប្រតិបត្តិការនេះ គឺជាសក្ខីភាពបញ្ជាក់យ៉ាងច្បាស់ពីការប្តេជ្ញាចិត្តរបស់កាកបាទក្រហមកម្ពុជា ក្នុងការពង្រឹងខឿនការពារសង្គម និងការជួយសង្គ្រោះប្រជាពលរដ្ឋដោយមិនប្រកាន់និន្នាការនយោបាយ ឬឋានៈក្នុងសង្គមឡើយ៕

ដោយ៖ ឈុន សារ៉ាត