AKP ភ្នំពេញ ថ្ងៃទី០៩ ខែមិថុនា ឆ្នាំ២០២៦-- ឯកឧត្តមសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល ក្នុងឱកាសសួរសុខទុក្ខមន្រ្តីសុខាភិបាល នៅមណ្ឌលសុខភាពសំរោង ខេត្តពោធិ៍សាត់ បានមានប្រសាសន៍ថា «សូមយើងតម្កល់ភាពរីករាយ ទន់ភ្លន់ ញញឹមរាក់ទាក់ ប្រកបដោយក្តីករុណា បម្រើការថែទាំព្យាបាល ជូនប្រជាពលរដ្ឋយើងគ្រប់ពេលវេលា និងគ្រប់ទីកន្លែង»។

ឯកឧត្តមសាស្រ្តាចារ្យរដ្ឋមន្ត្រីបានដឹកនាំប្រតិភូសុខាភិបាល ដោយមានការចូលរួមអមដំណើរដោយ ឯកឧត្ដម ខូយ រីដា អភិបាលនៃគណៈអភិបាលខេត្តពោធិ៍សាត់ ចុះសួរសុខទុក្ខ ពិនិត្យការបម្រើសេវានៅមណ្ឌលសុខភាព សំរោង នៅខេត្តពោធិ៍សាត់ ដែលជាមណ្ឌលសុខភាព កំពុងស្ថិតក្នុងការប្រឡងប្រណាំងយកជ័យលាភី «ជាមណ្ឌលសុខភាពគំរូ សម្រាប់ឆ្នាំ២០២៥» នារសៀលថ្ងៃទី០៩ ខែមិថុនា ឆ្នាំ២០២៦។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តីបានថ្លែងអំណរគុណអំពីការខិតខំរបស់មន្រ្តីសុខាភិបាល ក្នុងការបម្រើសេវាសុខភាពជូនប្រជាពលរដ្ឋប្រកបដោយស្មារតីបុរេសកម្ម។ ឯកឧត្តមសង្កត់ធ្ងន់ថា៖ «យើងកាន់តែត្រូវបង្កើនការខិតខំ និងតម្កល់ភាពល្អប្រសើរនេះ ដែលជាសេចក្តីត្រូវការរបស់ប្រជាពលរដ្ឋ ហើយត្រូវតែចែករំលែកដល់សហភាតរៈយើង អំពីការវិវត្តន៍ជាវិជ្ជមានរបស់ខ្លួនឱ្យកាន់តែទូលាយ សំដៅការរីកចម្រើនទៅមុខជាមួយគ្នា រួមគ្នាកសាងប្រព័ន្ធសុខាភិបាលកម្ពុជាឱ្យកាន់តែមានភាពធន់»។

សូមជម្រាបជូនថា មណ្ឌលសុខភាពសំរោង ស្ថិតនៅភូមីព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់ នៅតាមបណ្តោយផ្លូវជាតិលេខ៥៥ មានចម្ងាយ ៤២គីឡូម៉ត្រពីទីរួមខេត្តពោធិ៍សាត់ ធ្លាប់ទទួលបានជ័យលាភីលេខ១ ទូទាំងប្រទេស ក្នុងឆ្នាំ២០២៣៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)