AKP ភ្នំពេញ ថ្ងៃទី០៩ ខែមិថុនា ឆ្នាំ២០២៦-- ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អញ្ជើញដឹកនាំក្រុមការងារទៅពិនិត្យគុណភាពផ្លូវក្រាលកៅស៊ូពីរជាន់ (DBST) ចំនួន០១ខ្សែ មានប្រវែង៩,៩៦៨គីឡូម៉ែត្រ ទទឹង៧ម៉ែត្រ ចិញ្ចើមផ្លូវក្រាលដីល្បាយថ្មភ្នំសងខាង ម្ខាងៗ១ម៉ែត្រ ព្រមទាំងមានសំណង់សិល្បការ្យមួយចំនួនទៀតនាព្រឹកថ្ងៃអង្គារ ទី០៩ ខែមិថុនា ឆ្នាំ២០២៦។

ផ្លូវមួយខែ្សនេះតភ្ជាប់ពីផ្លូវជាតិលេខ៥៩ ត្រង់ចំណុចគ.ម.១២នៃភូមិអូរអំពិល ទៅភូមិបឹងជង្រុកតេជោឈ្នះឈ្នះ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។ ឯកឧត្តមរដ្ឋមន្ត្រី ព្រមទាំងប្រតិភូអមដំណើក៏បានអញ្ជើញទៅពិនិត្យការដ្ឋានកិនថ្មចំនួន ២ទីតាំងទៀតដែលស្ថិតនៅភូមិប៉ោយស្វាយ ឃុំតាគ្រាម ស្រុកបាណន់ ខេត្តបាត់ដំបង។

ការអញ្ជើញចុះពិនិត្យដោយផ្ទាល់នាពេលនេះក្នុងគោលបំណងដើម្បីស្វែងយល់ពីចង្វាក់នៃការផលិត និងគុណភាពនៃវត្ថុធាតុដើមសម្រាប់យកមកស្ថាបនា និងលើកកម្រិតគុណភាពហេដ្ឋារចនាសម្ព័ន្ធផ្លូវជនបទ ឱ្យកាន់តែមានភាពរឹងមាំប្រើប្រាស់បានយូរអង្វែង៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)