AKP ព្រះសីហនុ ថ្ងៃទី០៩ ខែមិថុនា ឆ្នាំ ២០២៦ -- លោក ចេង ម៉ីន មន្រ្តីប្រតិបត្តិសាខាកាកបាទក្រហមកម្ពុជាខេត្តព្រះសីហនុ បានដឹកនាំមន្រ្តីសាខា មន្ត្រីអនុសាខា និងអ្នកស្ម័គ្រចិត្តសាខាកាកបាទក្រហមកម្ពុជាខេត្តព្រះសីហនុ នាំយកអំណោយសង្គ្រោះរបស់សាខាកាកបាទក្រហមកម្ពុជាខេត្តព្រះសីហនុ ជូនប្រជាពលរដ្ឋងាយរងគ្រោះ និងជនចាស់ជរាគ្មានទីពឹងចំនួន ១៨គ្រួសារ នៅក្នុងក្រុង-ស្រុកចំនួន០៣ ក្នុងនោះមានស្រុកស្ទឹងហាវចំនួន ០៨គ្រួសារ ស្រុកព្រៃនប់ ០៧គ្រួសារ និងក្រុងកំពង់សោម ០៣គ្រួសារ។

ក្នុងឱកាសនោះ លោក ចេង ម៉ីន មន្ត្រីប្រតិបត្តិសាខាកាកបាទក្រហមកម្ពុជាខេត្តព្រះសីហនុ បានពាំនាំសាកសួរសុខទុក្ខ និងសេចក្តីនឹងរលឹកពីឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋងាយរងគ្រោះ និងជនចាស់ជរាគ្មានទីពឹងក្នុងក្រុង-ស្រុកទាំង០៣ ស្របតាមគោលការណ៏គ្រឹះទាំង៧ របស់កាកបាទក្រហមកម្ពុជា ដោយមិនទុកឱ្យប្រជាពលរដ្ឋណាម្នាក់ខ្វះខាតស្បៀងស្លាប់ដោយយើងមិនបានដឹង និងមិនបានគិតគូនោះទេ ព្រោះទីណាមានការលំបាក ទីនោះមានកាកបាទក្រហមនៅជាមួយបងប្អូនប្រជាពលរដ្ឋជានិច្ច។

ទន្ទឹមនោះ លោក ចេង ម៉ីន ក៏បានធ្វើការណែនាំដល់មន្ត្រីអនុសាខាក្រុង-ស្រុក និងអ្នកស្មគ័្រចិត្តភូមិ ត្រូវយកចិត្តទុកដាក់ចុះតាមដាន ស្រាវជ្រាវជាប់ជាប្រចាំចំពោះប្រជាពលរដ្ឋនៅមូលដ្ឋាន ដោយធ្វើយ៉ាងណាយើងត្រូវដឹងអំពីសុខទុក្ខ ការលំបាករបស់ប្រជាពលរដ្ឋបានទាន់ពេលវេលា ដោយមិនប្រកាន់វណ្ណៈ ពូជសាសន៍ ឬនិន្នាការនយោបាយអ្វីនោះទេ គឺធ្វើយ៉ាងណាយើងជួយប្រជាពលរដ្ឋរបស់យើងឱ្យបានទាន់ពេលវេលា មិនត្រូវទុកឱ្យប្រជាពលរដ្ឋណាម្នាក់ស្លាប់ដោយខ្វះខាងស្បៀងអាហារនោះទេ។

អំណោយដែលបានផ្ដល់ជូនប្រជាពលរដ្ឋងាយរងគ្រោះ និងជនចាស់ជរាគ្មានទីពឹង ១៨គ្រួសារ ក្នុងមួយគ្រួសារទទួលបានអង្ករ ២៥គីឡូក្រាម ត្រីខ ០១យួរ មី ០១កេស ទឹកត្រី ០១យួរ និងថវិកាចំនួន ១០ម៉ឺនរៀល។ ដោយឡែក គ្រួសារដែលមានពិការភាពចំនួនប្រាំមួយនាក់ ទទួលបានអង្ករ ៥០គីឡូក្រាម ត្រីខ ០១យួរ មី ០១កេស ទឹកត្រី ០១យួរ និងថវិកាចំនួន ១០ម៉ឺនរៀល៕

ដោយ៖ ងូ សុមុនី