AKP សៀមរាប ថ្ងៃទី០៩ ខែមិថុនា ឆ្នាំ ២០២៦ -- ព្រះវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក និងលោកស្រី ឈិន សាវី ចៅសង្កាត់គោកចក ក្រុងសៀមរាបរួមនិងសហការី កាលពីរសៀលថ្ងៃទី០៨ ខែមិថុនា ឆ្នាំ២០២៦ បាននិមន្ត និងអញ្ជើញចុះសួរសុខទុក្ខ និងនាំយកនូវគ្រឿងឧបភោគបរិភោគ និងសម្ភារៈប្រើប្រាស់ ព្រមទាំងថវិកាជូនដល់គ្រួសារកងទ័ពដែលកំពុងបំពេញភារកិច្ចតាមបន្ទាត់ព្រំដែនកម្ពុជា-ថៃ ប៉ុន្តែផ្ទះរបស់គាត់នៅក្នុងភូមិគោកចាន់ សង្កាត់គោកចក ក្រុងសៀមរាប ខេត្តសៀមរាប បានអគ្គីភ័យឆាបឆេះ ដោយសារឆ្លងចរន្តអគ្គិសនី ដែលធ្វើឱ្យខូចខាតផ្ទះសម្បែង និងសម្ភារៈជាច្រើន។

ព្រះវិចិត្រវង្សា ហែម គឹមសាន មានថេរដីកាថា គ្រោះធម្មជាតិ ឬឧបទ្ទវហេតុផ្សេងៗ គឺជារឿងដែលយើងមិនអាចមើលឃើញ ឬដឹងមុនឡើយហើយ វាបានបន្សល់ទុកនូវការខូចខាតទាំងទ្រព្យសម្បត្តិ និងផ្លូវចិត្ត។ ព្រះវិចិត្រវង្សា ហែម គឹមសាន ក៍បានមានថេរដីកាលើកទឹកចិត្តក្រុមគ្រួសារ សូមកុំអស់សង្ឃឹម អត់ធ្មត់ និងមានស្មារតីរឹងមាំឡើងវិញ ទោះបីជាផ្ទះសម្បែងត្រូវបាត់បង់ ប៉ុន្តែឱ្យតែយើងមានសុខភាពល្អ មានជីវិតរស់នៅ យើងនឹងអាចចាប់ផ្តើមសាងសង់វាឡើងវិញបាន ហើយព្រះសង្ឃ និងអាជ្ញាធរ ព្រមទាំងអ្នកភូមិផងរបងជាមួយមិនបោះបង់ញាតិញោមចោលឡើយ។

លោកស្រី ឈិន សាវី ចៅសង្កាត់គោកចក ក៍បានមានប្រសាសន៍សម្តែងនូវសេចក្តីរំជួលចិត្ត និងសោកស្តាយជាខ្លាំងចំពោះគ្រោះអគ្គិភ័យដែលបានបំផ្លិចបំផ្លាញផ្ទះសម្បែង និងទ្រព្យសម្បត្តិរបស់បងប្អូន ដែលនេះគឺជាទុក្ខលំបាកដ៏ធំធេងមួយដែលមិនមានអ្នកណាប្រាថ្នាចង់ជួបនោះឡើយ។

សូមបញ្ជាក់ថា ជនរងគ្រោះជាម្ចាស់ផ្ទះមានឈ្មោះ ហូយ សាវន (ជាប្រពន្ធ) និងប្តីឈ្មោះ ឆៃ ហួន ជាកងទ័ព (កំពុងឈរជើងនៅស្រុកអន្លង់វែងខេត្តឧត្តរមានជ័យ)៕

ដោយ៖ ឃុត សៅ