AKP តាកែវ ថ្ងៃទី0៩ ខែមិថុនា ឆ្នាំ២០២៦--ដើម្បីពង្រឹងសន្តិសុខសណ្ដាប់ធ្នាប់សង្គម និងលើកកម្ពស់ចំណេះដឹងផ្នែកច្បាប់ ពិសេសធ្វើការអប់រំនិងផ្សព្វផ្សាយ អំពីគោលនយោបាយ "ភូមិ-ឃុំ-សង្កាត់ មានសុវត្ថិភាព" ដល់យុវជនដែលជាសិស្សានុសិស្ស។
លោក ហ៊ត មនោ អភិបាលនៃគណៈអភិបាលស្រុកត្រាំកក់ និងជាប្រធានគណៈបញ្ជាការឯកភាពរដ្ឋបាលស្រុកត្រាំកក់ អញ្ជើញចុះអប់រំផ្សព្វផ្យាយអំពីច្បាប់និងសុវត្ថិភាពសង្គម ដល់សិស្សានុសិស្សវិទ្យាល័យសម្ដេចអគ្គមហាសេនាបតីតេជោ ហ៊ុន សែន អង្គតាសោមមានចំនួន 1 859នាក់ និងសិស្សានុសិស្សវិទ្យាល័យ សុខ អាន ១ឧសភា ចំនួន 1 395នាក់ កាលពីព្រឹកថ្ងៃអង្គារ ៩រោច ខែជេស្ឋឆ្នាំមមី អដ្ឋស័កព.ស២៥៧០ ត្រូវនឹងថ្ងៃទី៩ ខែមិថុនា ឆ្នាំ២០២៦ នៅវិទ្យាល័យសម្ដេចអគ្គមហាសេនាបតីតេជោ ហ៊ុន សែន អង្គតាសោម ស្ថិតនៅក្នុងឃុំអង្គតាសោម ស្រុកត្រាំកក់ ខេត្តតាកែវ។ ក្នុងពិធីនោះ ក៏មានការអញ្ជើញចូលរួមពី លោក លោកស្រីអភិបាលរងស្រុកត្រាំកក់ ព្រមទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ចំណុះរដ្ឋបាលស្រុកត្រាំកក់ លោកគ្រូ អ្នកគ្រូ និងសិស្សានុសិស្ស វិទ្យាល័យទាំង២ ចូលរួមយ៉ាងច្រើនកុះករ។

មានប្រសាសន៍សំណេះសំណាលក្នុងពិធីនោះ លោក ហ៊ត មនោ អភិបាលនៃគណៈអភិបាលស្រុកត្រាំកក់ បានលើកឡើងនូវចំណុចសំខាន់ៗដែលតម្រូវឱ្យប្អូនៗ កូន ក្មួយអនុវត្តន៍ ដើម្បីក្លាយខ្លួនជាកូនល្អ សិស្សល្អ មិត្តល្អ និងជាទំពាំងស្នងឫស្សីដែលមានគុណភាព និងសមត្ថភាពខ្ពស់។ លោក ហ៊ត មនោ បានមានប្រសាសន៍បន្តថា ការអប់រំផ្សព្វផ្សាយនូវច្បាប់ចររាចរណ៍ផ្លូវគោក ក្នុងគោលបំណងដើម្បីផ្តល់នូវចំណេះដឹងបន្ថែម ស្តីពីសុវត្ថិភាពចរាចរណ៍ដល់អ្នកប្រើប្រាស់ផ្លូវ ជាពិសេសក្មួយៗសិស្សានុសិស្ស ដែលស្ថិតក្នុងវ័យប្រើប្រាស់កង់ឬម៉ូតូ ជាមធ្យោបាយធ្វើដំណើរ និងជាជនងាយរងគ្រោះថ្នាក់ដោយសារគ្រោះថ្នាក់ចរាចរណ៍។ ដើម្បីឱ្យមានការយល់ដឹងកាន់តែច្បាស់ ក៏ដូចជាការពញ្ញាក់ស្មារតីឱ្យមានការប្រុងប្រយ័ត្ន និងចូលរួមគោរពច្បាប់ចរាចរណ៍ទាំងអស់គ្នាឱ្យ បានខ្ជាប់ខ្ជួន។

លោកអភិបាលស្រុកត្រាំកក់ ក៏បានសង្កត់ធ្ងន់ថា រីឯបញ្ហាគ្រឿងញៀនគឺជាបញ្ហារបស់យើងទាំងអស់គ្នា ត្រូវរួមគ្នាប្រយុទ្ធប្រឆាំង។ មិនត្រូវគិតថាកិច្ចការទាំងអស់នេះ គឺជាភារកិច្ចផ្តាច់មុខរបស់កម្លាំងមានសមត្ថកិច្ចតែម្នាក់ឯងនោះឡើយ។ វាទាមទារឱ្យមានការចូលរួមពីគ្រប់បណ្តាភាគីពាក់ព័ន្ធ អាជ្ញាធរមូលដ្ឋាន លោកគ្រូ អ្នកគ្រូ អាណាព្យាបាល ពិសេសប្អូនៗសិស្សានុសិស្សខ្លួនឯងតែម្តង។ បញ្ហាគ្រឿងញៀនខុសច្បាប់ និងគ្រឿងស្រវឹងអាច បណ្ដាលឱ្យមានគ្រោះថ្នាក់ដល់សុខភាពនិង អាយុជីវិត បំផ្លាញអនាគតយុវជននិងភាគីពាក់ព័ន្ធផងដែរ។ ក្នុងចំណោមគ្រឿងញៀនគ្រប់ប្រភេទ ប្រភេទបារីអេឡិចត្រូនិក (E-Cigarette-Vape) ដែលវាកំពុងបញ្រ្ជាបខ្លួនយ៉ាងខ្លាំងក្នុងចំណោមសិស្សានុសិស្ស។ វាអាចបង្កគ្រោះថ្នាក់ធ្ងន់ធ្ងរដល់សុខភាព ដូចជាបង្កជំងឺមហារីក បង្កើនហានិភ័យជំងឺបេះដូង ជំងឺសួត ធ្វើឱ្យខួរក្បាលមានដំណើរការមិនប្រក្រតីក្នុងអំឡុងពេលប្រើប្រាស់ និងប៉ះពាល់យូរអង្វែងដល់ការលូតលាស់ខួរក្បាលរបស់កុមារនិងយុវវ័យ ព្រមទាំងបង្កអន្តរាយដល់រាងកាយ។

លោក ហ៊ត មនោ បានមានប្រសាសន៍បន្ថែមថា បញ្ហាក្មេងទំនើងក្នុងសាលា ក្រុមការងារនៃគណៈបញ្ជាការឯកភាពស្រុក នឹងចុះកំណត់មុខសញ្ញាក្មេងទំនើងឱ្យបានច្បាស់លាស់ ការពារនិងចៀសវាងជនទាំងនោះបង្កផលប៉ះពាល់គ្រោះថ្នាក់ដល់អ្នកដទៃ។ ត្រូវកោះហៅមកអប់រំណែនាំនិងពិនិត្យសារធាតុញៀន ព្រមទាំងអនុវត្តន៍ច្បាប់លើជននោះផងដែរ។ ចំណែកអនាម័យបរិស្ថានត្រូវបញ្រ្ជាបចំណេះដឹងនិងចំណេះធ្វើ ក្នុងចំណោមកុមារ សិស្សានុសិស្ស និងយុវជន នៅតាមសាលារៀននិងគ្រឹះស្ថានអប់រំ ដែលជាកន្លែងប្រមូលផ្តុំមានលក្ខណៈងាយស្រួលក្នុងការផ្លាស់ប្តូរទម្លាប់ ផ្នត់គំនិតនិងឥរិយាបទរបស់កុមារនិងយុវជន៕

ដោយ អ៊ុច សៀង