AKP ភ្នំពេញ ថ្ងៃទី០៩ ខែមិថុនា ឆ្នាំ២០២៦ -- ឯកឧត្ដម ឃួង ស្រេង អភិបាលរាជធានីភ្នំពេញ បានស្នើឱ្យគណៈបញ្ជាការឯកភាពខណ្ឌទាំង១៤ ត្រូវបន្ដចុះបង្រ្កាបបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ហើយត្រូវតែធ្វើដោយមិនរាថយដាច់ខាត។

ឯកឧត្តម ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ បានស្នើបែបនេះ ខណៈដែលឯកឧត្ដមកោះប្រជុំជាមួយស្នងការនគរបាលរាជធានីភ្នំពេញ មេបញ្ជាការកងរាជអាវុធហត្ថរាជធានីភ្នំពេញ អភិបាលខណ្ឌ អធិការដ្ឋានខណ្ឌទាំង១៤ នៅថ្ងៃទី០៩ ខែមិថុនា ឆ្នាំ២០២៦ នេះ  ដើម្បីស្ដាប់របាយការណ៍ដែលបានអនុវត្ដកន្លងមក និងវឌ្ឍនភាពការបង្រ្កាបបទល្មើសឆបោកតាមប្រព័នបច្ចេកវិទ្យា។

បើតាមការបញ្ជាក់ឱ្យដឹងពីលោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា ក្នុងកិច្ចប្រជុំនេះ ក្រោយពីស្តាប់របាយការណ៍វឌ្ឍនភាពនៃការងារបង្រ្កាបបទល្មើសតាមប្រព័ន្ធបច្ចេកវិទ្យា ដែលរាយការណ៍ដោយលោកស្នងការរង តំណាងឯកឧត្តមស្នងការ នៃស្នងការដ្ឋាននគរបាលរាជធានីភ្នំពេញរួចមក ឯកឧត្ដមអភិបាលបានអនុញ្ញាតឱ្យអភិបាលខណ្ឌចូលរួមមតិយោបល់ ក៏ដូចជាការចែករំលែកបទពិសោធន៍ ព្រមទាំងបញ្ហាប្រឈមនានាក្នុងរង្វង់ប្រតិបត្តិការកន្លងមក ដើម្បីពិភាក្សារកដំណោះស្រាយធ្វើយ៉ាងណាឱ្យការងារបង្រ្កាបបទល្មើសនេះកាន់តែមានប្រសិទ្ធភាព និងឈានដល់ការបង្រ្កាបឱ្យអស់ក្នុងភូមិសាស្រ្តរាជធានីភ្នំពេញ។  លោកស្រីអ្នកនាំពាក្យបន្តថា ជាមួយគ្នានេះដែរ។

ឯកឧត្តម ឃួង ស្រេង អភិបាលរាជធានីភ្នំពេញ ក៏បានផ្តល់ជាអនុសាសន៍ និងការដឹកនាំមួយចំនួនសម្រាប់ឱ្យប្រតិបតិ្តករទាំងអស់ ទាំងស្នងការដ្ឋាននគរបាល ទាំងបញ្ជាការដ្ឋាន កងរាជអាវុធហត្ថរាជធានីភ្នំពេញ និងគណៈបញ្ជាការឯកភាពរដ្ឋបាលខណ្ឌទាំង១៤ ត្រូវបន្ដយកទៅអនុវត្តឱ្យម៉ត់ចត់ និងអនុវត្ដដូចភ្លៀរលឹម។

ឯកឧត្ដមក៏បានស្នើឱ្យគណៈបញ្ជាការឯកភាពទាំង ១៤ខណ្ឌត្រូវបន្ដចុះបង្រ្កាបបទល្មើសឆបោកតាមប្រព័ន្ធបច្ចេកវិទ្យា គឺត្រូវតែធ្វើដោយមិនរាថយដាច់ខាត ត្រូវតែចុះត្រួតពិនិត្យទីតាំងសង្ស័យឱ្យកាន់តែសកម្ម ហើយត្រូវប្រកាន់ខ្ជាន់នូវវិជា្ជជីវៈរបស់ខ្លួនឱ្យបានត្រឹមត្រូវក្នុងពេលចុះប្រតិបត្តិការលើការងាររបស់ខ្លួន ហ៊ានទទួលខុសត្រូវ ដោយភាពស្មោះត្រង់ និងប្ដេជ្ញារក្សាភាពថ្លៃថ្នូរ យុត្ដិធម៏ ជូនប្រជាពលរដ្ឋ ៕
ដោយ៖ សួស សំរិត