AKP បន្ទាយមានជ័យ ថ្ងៃទី0៩ ខែមិថុនា ឆ្នាំ២០២៦--សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា បានចេញបញ្ជាឱ្យដកហូតទ្រព្យសម្បត្តិចំពោះជនទាំងឡាយណា ដែលនាំចូលទំនិញថៃ មកក្នុងប្រទេស ហើយបញ្ជូនទៅធ្វើពលកម្ម តាមរយៈការជីកលេណដ្ឋានឱ្យធ្ងន់ធ្ងរ ។ ការថ្លែងបញ្ជាក់របស់សម្តេចតេជោ ប្រមុខរដ្ឋស្តីទីបែបនេះ ធ្វើឡើងក្នុងឱកាសអញ្ជើញជួបសំណេះសំណាល ជាមួយប្រជាពលរដ្ឋភៀសសឹកចំនួន ២ ៨០៥គ្រួសារ នៅមណ្ឌលបណ្តោះអាសន្ន ស្លរក្រាម ស្រុកស្វាយចេក ខេត្តបន្ទាយមានជ័យ នាព្រឹកថ្ងៃទី៩ ខែមិថុនា ឆ្នាំ២០២៦។

សម្តេចតេជោ ហ៊ុន សែន បានគូសបញ្ជាក់ថា ចំពោះការបិទ ឬបើកព្រំដែន គឺជាការសម្រេចចិត្តរបស់ថ្នាក់ដឹកនាំប្រទេសថៃ ហើយកម្ពុជា ក៏មានសិទ្ធិក្នុងការឆ្លើយតបទៅវិញ ដោយមិនខ្វល់ថាចង់បិទរយៈពេល១០០ឆ្នាំ ឬ៥០០ឆ្នាំទៀតក៏ដោយ ។ សម្តេចតេជោបានមានប្រសាសន៍ថា ការដោះស្រាយដោយសន្តិវិធី ជុំវិញបញ្ហាព្រំដែន ទើបជាការដោះស្រាយមួយ ដែលផ្តល់ផលប្រយោជន៍ឱ្យទាំងសងខាង និងបង្កើតបាននូវជំនឿទុកចិត្ត ដោយយើងមិនអាចរស់នៅជិតខាងគ្នា ធ្វើជាសត្រូវជាមួយគ្នា អស់មួយជីវិតនោះទេ ។

ជាមួយគ្នានេះ សម្តេចតេជោ ហ៊ុន សែន បានសង្កត់ធ្ងន់ថា៖ «តែខ្ញុំ សូមប្រដៅអាអ្នកនាំទំនិញ ខាងនោះគេថា រត់ពន្ធទំនិញពីនោះមក ឯខាងយើង មើលតាមទល់ដែនទាំងឡាយ ដាក់ពួកអាអ្នកនាំទំនិញចូលមកដែលខុសច្បាប់នោះ ដាក់វាមើល រឹបអូសស្អីៗ ហើយឱ្យវាទៅរែកដី លេងចឹងមើល។ ក្រែងរាល់ថ្ងៃយើងមានទឹកសុទ្ធរបស់យើង យើងមានស្អីរបស់យើងអស់ហើយ ហើយទៅប្រកាច់យកស្អី ហើយជួនកាលមកសុទ្ធតែជង្គង់មាន់ អាគេមិនស៊ីជើងមាន់ ឯងមកយកជើងមាន់មកឱ្យខ្មែរស៊ី ចឹងមើលអាណា និយាយពាក្យអាណា មីណាចឹងហ្មង ព្រោះកុំតែថាអាណាវាប៉ះប្រុស វាមានមីណាទៀត ដកហូតទ្រព្យសម្បត្តិវា ឱ្យវាទៅជីកត្រង់សេ..ពលកម្មឱ្យវាធ្ងន់មើល តើវាអត់មិនបានវាស្អី.. វាថាយើងខ្វះទំនិញ ហើយយើងខ្វះទំនិញពីកាល ១ឆ្នាំជាងហើយ ល្មមដឹងថា ខ្មែរមានលទ្ធភាពគ្រប់គ្រាន់ផ្គត់ផ្គង់ទំនិញខ្លួនឯង»៕

ដោយ៖ ប៊ុនរិទ្ធ