AKP ភ្នំពេញ ថ្ងៃទី០៩ ខែមិថុនា ឆ្នាំ២០២៦ -- ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកម្ពុជាបានជាប់ឆ្នោតជាអនុប្រធានសហព័ន្ធកីឡាជនពិការអាស៊ាន តាមរយៈការរៀបចំមហាសន្និបាតបញ្ចប់អាណត្តិចាស់ និងបន្តអាណត្តិថ្មី ២០២៦-២០៣០ ដែលប្រទេសឥណ្ឌូណេស៊ី ធ្វើម្ចាស់ផ្ទះ។

នេះជាការគូសបញ្ជាក់របស់ឯកឧត្តម យី វាសនា នៅក្នុងដំណើរនិវត្តន៍មកដល់មាតុប្រទេសវិញ នៅអាកាសយានដ្ឋានអន្តរជាតិតេជោ កាលពីវេលាម៉ោង ១១យប់ ថ្ងៃទី០៨ ខែមិថុនា ឆ្នាំ២០២៦ អមដំណើរដោយអគ្គលេខាធិការរងពីររូប ឯកឧត្តម យី សុភ័ក្ត្រា និងលោកជំទាវ សុង សុខលាភ បន្ទាប់ពីបញ្ចប់បេសកកម្មចូលរួមមហាសន្និបាតសហព័ន្ធកីឡាជនពិការអាស៊ាន នៅប្រទេសឥណ្ឌូណេស៊ី។

ឯកឧត្តម យី វាសនា ទីប្រឹក្សារាជរដ្ឋាភិបាលបានមានប្រសាសន៍ថា ក្នុងដំណើរបេសកកម្មអន្តរជាតិនេះ ឯកឧត្តម បានធ្វើដំណើរពីប្រទេសម៉ាឡេស៊ី ទៅប្រទេសឥណ្ឌណេស៊ី ចូលរួមមហាសន្និបាតសហព័ន្ធកីឡាជនពិការអាស៊ាន បានបញ្ចប់អាណត្តិចាស់ និងបោះឆ្នោតជ្រើសរើសគណៈកម្មាធិការប្រតិបត្តិអាណត្តិថ្មី ពីឆ្នាំ២០២៦-២០៣០ (APSF EXCO 2026-2030) ដោយមានសមាសភាព ៧រូប ក្នុងនោះប្រធានសហព័ន្ធកីឡាជនពិការអាស៊ាន លោក Senny Marbun អមដោយអនុប្រធាន៤រូប ក្នុងនោះមានឯកឧត្តម យី វាសនា។

ឯកឧត្តម យី វាសនា បានថ្លែងអំណរគុណយ៉ាងជ្រាលជ្រៅជូនចំពោះថ្នាក់ដឹកនាំគណៈកម្មាធិការជាតិប៉ារ៉ាឡាំពិកកម្ពុជា ជាពិសេសសម្តេចធិបតី ហ៊ុន ម៉ាណែត ប្រធានគណៈកម្មាធិការជាតិប៉ារ៉ាឡាំពិកកម្ពុជា ដែលបានផ្តល់សេចក្តីទុកចិត្ត ជឿជាក់លើវិជ្ជាជីវៈវិស័យកីឡាជនពិការកម្ពុជា ក៏ដូចជាវិស័យកីឡាជនពិការអាស៊ានជូនដល់ឯកឧត្តម យី វាសនា ដោយសម្តេចធិបតី ហ៊ុន ម៉ាណែត បានចាត់តាំងឯកឧត្តមជាតំណាង ក្នុងការចូលរួមមហាសន្និបាតសហព័ន្ធកីឡាជនពិការអាស៊ាន ឆ្នាំ២០២៦នេះ។ ដោយសារសម្តេចធិបតី ជាប្រធានគណៈកម្មាធិការជាតិប៉ារ៉ាឡាំពិកកម្ពុជា ដូច្នេះសម្តេចធិបតីជាសមាជិកដោយស្វ័យប្រវត្តិ ក្នុងក្រុមប្រឹក្សាភិបាលសហព័ន្ធកីឡាជនពិការអាស៊ាន ហើយសម្តេចធិបតីបានអនុញ្ញាតចាត់តាំងឯកឧត្តម យី វាសនា ជាតំណាង និងអនុញ្ញាតឱ្យឈរឈ្មោះឱ្យសមាជិកអាស៊ានបោះឆ្នោត ជាប់ជាអនុប្រធានសហព័ន្ធកីឡាជនពិការអាស៊ាន។

តំណែងអនុប្រធានអាស៊ានរបស់ឯកឧត្តម យី វាសនា ត្រូវបានអាស៊ានបោះឆ្នោតតាំងពីឆ្នាំ២០១៥មក ហើយកន្លងមកជួបវិបត្តិជំងឺកូវីដ-១៩ ទើបការបោះឆ្នោតត្រូវពន្យារអាណត្តិ។ នៅឆ្នាំ២០២៦នេះសហព័ន្ធកីឡាជនពិការអាស៊ានត្រូវរៀបចំការបោះឆ្នោតសម្រាប់អាណត្តិថ្មី។ ឯកឧត្តមបានថ្លែងអំណរគុណដល់ប្រទេសឥណ្ឌូណេស៊ី ដែលរៀបចំមហាសន្និបាត ឆ្នាំ២០២៦ប្រកបដោយជោគជ័យ ដោយបណ្តាប្រទេសទាំង១១ក្នុងអាស៊ានបានផ្តល់សេចក្តីទុកចិត្តបោះឆ្នោតគាំទ្រជូនដល់ឯកឧត្តម ជាអនុប្រធានអាណត្តិថ្មី ២០២៦-២០៣០ ដើម្បីបន្តដឹកនាំប្រតិបត្តិ ផែនការយុទ្ធសាស្ត្រ ក្នុងការជំរុញដំណើរការអភិវឌ្ឍន៍វិស័យកីឡាជនពិការអាស៊ានឱ្យកាន់តែល្អប្រសើរបន្ថែមទៀត។ ការដឹកនាំដ៏រឹងមាំ មាននិរន្តរភាពរបស់សហព័ន្ធសហព័ន្ធកីឡាអាស៊ាន ធ្វើឱ្យរាជរដ្ឋាភិបាលកម្ពុជា ក៏ដូចជាបណ្តារដ្ឋាភិបាលអាស៊ានទាំងមូលមានការគាំទ្រ។ ដូច្នេះហើយការរៀបចំការប្រកួតកីឡាអាស៊ានប៉ារ៉ាហ្គេម រៀងរាល់២ឆ្នាំម្តងនៅតែបន្តធ្វើជាប់ជាប្រចាំ។ ចំពោះការរៀបចំប្រកួតកីឡាអាស៊ានប៉ារ៉ាហ្គេម គ្រោងនឹងធ្វើឡើងនៅប្រទេសម៉ាឡេស៊ី នាឆ្នាំ២០២៧ និងបន្តធ្វើនៅប្រទេសសិង្ហបុរី នាឆ្នាំ២០២៩ខាងមុខ។

គួរបញ្ជាក់ថា ក្រុមកីឡាករ កីឡាការិនីបាល់បោះអង្គុយជនពិការកម្ពុជាទាំងពីរក្រុមបានការការមេដាយមាសជូនជាតិ ក្នុងការប្រកួតកីឡាបាល់បោះអង្គុយជនពិការ ជើងឯកអាស៊ី លើកទី២ ឆ្នាំ២០២៦ (2nd Asian Para Throwball Championship 2026) នៅប្រទេសម៉ាឡេស៊ី គឺជាសមិទ្ធផលប្រកបដោយមោទនភាពជាតិ។ ថ្នាក់ដឹកនាំប៉ារ៉ាឡាំពិកម្ពុជាបានចាត់ទុកថា ភាពជោគជ័យរបស់ក្រុមអត្តពលិកពិការកម្ពុជា ក៏ជាទូតសុឆន្ទៈដែរ ក្នុងការនាំកិត្តិសព្ទកម្ពុជាទៅលើឆាកអន្តរជាតិ។ អ្វីដែលពិសេស ការការពារតំណែងជើងឯកទាំងវិញ្ញាសាបុរស-នារីបានផ្ទុះការចាប់អារម្មណ៍ទាំងតំបន់អាស៊ាន និងអាស៊ីតែម្តង។ ក្រោយបញ្ចប់ការប្រកួតជើងឯកអាស៊ី នៅម៉ាឡេស៊ីនេះ ក្រុមអត្តពលិកកម្ពុជាបានវិលត្រឡប់មកកម្ពុជាវិញ កាលពីថ្ងៃទី០៦ ខែមិថុនា ឆ្នាំ២០២៦ ប៉ុន្តែឯកឧត្តម យី វាសនា អមដោយអគ្គលេខាធិការរង ២រូបបានបន្តធ្វើដំណើរទៅឥណ្ឌូណេស៊ី ចូលរួមមហាសន្និបាត នៅឥណ្ឌូណេស៊ី និងបានវិលត្រឡប់មកដល់កម្ពុជាវិញ កាលពីយប់ថ្ងៃទី០៨ ខែមិថុនា ឆ្នាំ២០២៦៕ ដោយ ហេង ណាលីន