AKP ភ្នំពេញ ថ្ងៃទី០៩ ខែមិថុនា ឆ្នាំ២០២៦ -- តំណាងឱ្យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន ឯកឧត្ដមទេសរដ្ឋមន្ដ្រី លី ធុជ ជាអនុប្រធានទី១ អាជ្ញាធរមីន បានចូលរួមជាអធិបតីក្នុងពិធីចុះហត្ថលេខាលើកិច្ចព្រមព្រៀងវិភាគទាន១.៥លានដុល្លារអូស្រ្ដាលី រវាងប្រទេសអូស្ត្រាលី និងកម្មវិធីអភិវឌ្ឍន៍សហប្រជាជាតិ (UNDP) ដើម្បីគាំទ្រកិច្ចខិតខំប្រឹងប្រែងស្តារឡើងវិញ និងសកម្មភាពមីននៅតាមសហគមន៍ដែលរងផលប៉ះពាល់តាមព្រំដែនរបស់កម្ពុជា កាលពីរសៀលថ្ងៃទី០៨ ខែមិថុនា ឆ្នាំ២០២៦ នៅស្នាក់ការអាជ្ញាធរមីន។

ពិធីចុះហត្ថលេខានេះបានប្រព្រឹត្ដទៅរវាងឯកឧត្ដមDerek Yip ឯកអគ្គរដ្ឋទូតអូស្ត្រាលីប្រចាំកម្ពុជា និងលោក Enrico Gaveglia តំណាងអង្គការUNDPប្រចាំកម្ពុជា។ តាមកិច្ចព្រមព្រៀងនេះ ប្រទេស អូស្រ្តាលីបានផ្តល់វិភាគទានចំនួន១.៥ លានដុល្លារអូស្រ្តាលី តាមរយៈ គម្រោងបោសសម្អាត ដើម្បីលទ្ធផលដំណាក់កាលទីV (CfR-V) ដែលជាគម្រោងមានម្ចាស់ជំនួយជាច្រើនរួមមានរដ្ឋាភិបាលកម្ពុជា អ៊ីតាលី លុចសំបួ និងនូវែលសេឡង់ ហើយអនុវត្តរួមគ្នាដោយអាជ្ញាធរមីននិងអង្គការ UNDP។

ជំនួយនេះនឹងគាំទ្រលើកិច្ចការបោសសម្អាតមីនការអប់រំអំពីហានិភ័យយុទ្ធភណ្ឌគ្រឿងផ្ទុះ និងការគាំទ្រជីវភាពរស់នៅរបស់ប្រជាជនផ្លាស់ទីលំនៅព្រមទាំងរួមចំណែកដល់ការស្តារសេដ្ឋកិច្ចសង្គម ក្នុ ងខេត្តចំនួន៤ រួមមាន ខេត្តបន្ទាយមានជ័យ បាត់ដំបង ឧត្តរមានជ័យ និងព្រះវិហារ ដែលជាខេត្តរងផលប៉ះពាល់ខ្លាំង ដោយសារជម្លោះតាមព្រំដែន កម្ពុជា-ថៃ។

ឯកឧត្ដមទេសរដ្ឋមន្រ្តី លី ធុជ បានលើកឡើងថា សកម្មភាពមីននៅកម្ពុជា គឺជាដៃគូអភិវឌ្ឍន៍ និង កិច្ចការមនុស្សធម៌យូរអង្វែងមួយដ៏សំខាន់បំផុតរបស់ប្រទេសកម្ពុជា។ ចាប់តាំងពីឆ្នាំ១៩៩២ មកថវិកាប្រមាណជាង១ពាន់លានដុល្លារត្រូវបានវិនិយោគលើការបោសសម្អាតមីន និងសំណល់ជាតិផ្ទុះពីសង្រ្គាម ការជួយជនរងគ្រោះ និងការពារសហគមន៍ ក្នុងនោះប្រមាណ ៧០ភាគរយ ជាជំនួយ ពីសហគមន៍អន្តរជាតិ ខណៈដែលរាជរដ្ឋាភិបាលកម្ពុជាក៏បានបន្តការប្តេជ្ញាចិត្តយ៉ាងមុតមាំការវិនិយោគជាតិប្រកបដោយនិរន្តរភាពក្នុងសកម្មភាពមីន។

ឯកឧត្ដម ទេសរដ្ឋមន្រ្តីបន្ថែមថា អូស្ត្រាលីជាដៃគូសកម្មភាពមីនដែលគួរឱ្យទុកចិត្តមួយរបស់កម្ពុជាតាំងពីដើមឆ្នាំ១៩៩០ និងបានគាំទ្រគម្រោង CfR តាំងពីដំណាក់កាលទី១ ឆ្នាំ២០០៦ ដោយ មាន វិភាគទាន សរុប៤៥.៣១ លានដុល្លារ អូស្រ្តាលី។ ការចូលរួមចំណែកក្នុងដំណាក់កាល CfR-V បង្ហាញ ពីការប្តេជ្ញា ចិត្ដរួមគ្នាក្នុងការគាំទ្រសហគមន៍ដែលរងផលប៉ះពាល់ ដើម្បីឆ្ពោះទៅរកកម្ពុជា គ្មានផលប៉ះពាល់ដោយសារមីន និងសំណល់ជាតិផ្ទុះពីសង្រ្គោះ ក្រោមការដឹកនាំប្រកប ដោយ ចក្ខុវិស័យ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។

ឯកឧត្ដមក៏បានថ្លែងអំណរគុណដល់UNDP ដែលបានឈរជាមួយអាជ្ញាធរមីនជិត២០ ឆ្នាំកន្លងមក តាមរយៈគម្រោងCfR ដែលបានរួមចំណែករំដោះផ្ទៃដីប្រមាណ៤២៧គីឡូម៉ែត្រការ៉េ ជូនប្រជាពលរដ្ឋកម្ពុជាស្មើនឹង១៣.៥ភាគរយនៃលទ្ធផលសរុបនៃការបោសសម្អាតទូទាំងប្រទេស៕

ដោយ សួស សំរិត