AKP ភ្នំពេញ ថ្ងៃទី២៥ ខែឧសភា ឆ្នាំ២០២៦--លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹកបានលើកឡើងថា ការឈ្នះមេដាយមាស១៥គ្រឿង និងប្រាក់១គ្រឿងពីការប្រកួតហែលទឹកពាក់ជើងទារអន្តរជាតិ នៅប្រទេសម៉ាឡេស៊ី គឺជាការរៀបចំផែនការច្បាស់លាស់របស់សហព័ន្ធ រួមជាមួយឆន្ទៈខ្ពស់របស់គ្រូបង្វឹក កីឡាករ កីឡាការិនី ដែលជាលទ្ធផលជោគជ័យដ៏ត្រចះត្រចង់នាំត្រឡប់មកជូនជាតិមាតុភូមិ។

នេះជាការគូសបញ្ជាក់របស់លោកអគ្គលេខាធិការ ក្នុងឱកាសទទួលដំណើរមកដល់មាតុប្រទេសរបស់គ្រូបង្វឹក កីឡាករ កីឡាការិនីហែលទឹកពាក់ជើងទាទាំង៦នាក់នៃសហព័ន្ធខ្មែរកីឡាហែលទឹក នៅអាកាសយានដ្ឋានអន្តរជាតិតេជោ កាលពីយប់រំលងអធ្រាត្រ ថ្ងៃទី២៤ ឈានចូលដល់ថ្ងៃទី២៥ ខែឧសភា ឆ្នាំ២០២៦។

លោក ហែម គីរី បានគូសបញ្ជាក់ថា គោលបំណងចម្បងរបស់សហព័ន្ធ គឺចង់អភិវឌ្ឍធនធានកីឡាករ កីឡាការិនីហែលទឹកវ័យក្មេងកម្ពុជាចូលរួមប្រកួតអន្តរជាតិឱ្យបានច្រើន ដែលជាចក្ខុវិស័យរបស់សហព័ន្ធ ហើយការឈ្នះមេដាយមាស១៥ គ្រឿង និងមេដាយប្រាក់១គ្រឿង សរុប១៦គ្រឿងរបស់កីឡាករ កីឡាការិនីហែលទឹកពាក់ជើងទាកម្ពុជា ក្នុងការប្រកួតកម្រិតអន្តរជាតិ នៅប្រទេសម៉ាឡេស៊ី ឆ្នាំ២០២៦នេះ គឺជាលទ្ធផលជោគជ័យដ៏ត្រចះត្រចង់ជូនដល់ប្រទេសជាតិ។ លោកបន្ថែមថា ការប្រកួតនេះមិននឹកស្មានថា កីឡាករ កីឡាការិនីកម្ពុជាអាចធ្វើបានលទ្ធផលល្អបែបនេះទេ ដោយលោកត្រឹមតែដាក់ក្តីរំពឹងថា ពួកគេត្រឹមទទួលបានល្អជាងការប្រកួតកន្លងមក។ ការចូលរួមប្រកួតអន្តរជាតិពីមុនមក ប្រភេទកីឡាហែលទឹកពាក់ជើងទាកម្ពុជាមិនទាន់ទទួលបានកម្រិតមេដាយមាសច្រើនបែបនេះនៅឡើយទេ ដោយទទួលបានត្រឹមមេដាយប្រាក់ និងសំរឹទ្ធ ហើយលើកនេះកម្ពុជាអាចឈានដល់កម្រិតមេដាយមាស ក្នុងកម្រិតយុវជន។ «អ៊ីចឹង វាបានបញ្ជាក់អំពីការយកចិត្តទុកដាក់ខ្ពស់ ការរៀបចំផែនការច្បាស់លាស់របស់សហព័ន្ធ ជាពិសេសគឺការខិតខំប្រឹងប្រែងរបស់គ្រូបង្វឹក និងកីឡាករ កីឡាការីផ្ទាល់តែម្តង ដែលជំរុញឱ្យហែលទឹកពាក់ជើងទាកម្ពុជាអាចឈានដល់កម្រិតល្អបែបនេះ»។

លោកសង្កត់ធ្ងន់ថា៖ «ក្នុងនាមជាមន្ត្រីរៀបចំការងាររួម ខ្ញុំពិតជាមានក្តីរំភើបរីករាយចំពោះសមិទ្ធផលនេះ ក្រោមកិច្ចសហការល្អរបស់សហព័ន្ធជាមួយស្ថាប័នពាក់ព័ន្ធ ជាពិសេសគឺមានការគាំទ្រពីឯកឧត្តមឧបនាយករដ្ឋមន្ត្រី ស៊ុន ចាន់ថុល ប្រធានសហព័ន្ធខ្មែរកីឡាហែលទឹក ព្រមទាំងថ្នាក់ដឹកនាំសហព័ន្ធទាំងអស់ ដែលធ្វើឱ្យយុវជនហែលទឹកពាក់ជើងទាកម្ពុជាមានការរីកចម្រើនយ៉ាងខ្លាំងក្លា។ អ្វីដែលខ្ញុំចង់សង្កត់ធ្ងន់គឺថា ភាពខ្លាំងនៃក្រុមយុវជននឹងគាំទ្រដល់ក្រុមជម្រើសជាតិឈុតធំទទួលបានលទ្ធផលល្អ គឺត្រូវកើតចេញពីក្រុមយុវជននេះហើយ។ បើថ្នាលយុវជនយើងខ្លាំង នោះថ្ងៃអនាគត ក្រុមជម្រើសជាតិឈុតធំយើងនឹងខ្លាំងដូចគ្នា ដែលសហព័ន្ធតែងតែជ្រើសរើសធនធានវ័យក្មេងចូលរួមហ្វឹកហាត់ ផ្តល់ឱកាសជូនដល់ពួកគាត់ ក្រោមការការរៀបចំផែនការច្បាស់លាស់ក្នុងការគិតគូ ការខិតខំប្រឹងប្រែងខ្លាំងបំផុត ការប្រើពេលវេលាក្នុងការអភិវឌ្ឍបង្កបង្កើនធនធាន ដោយមិនមែនជាការកើតឡើងដោយភាពចៃដន្យនោះទេ»។

លោក ហែម គីរី បានគូសបញ្ជាក់បន្ថែមទៀតថា ដោយសារតែថ្នាក់ដឹកនាំសហព័ន្ធកំពុងខិតខំជាមួយនឹងហរដ្ឋារចនាសម្ព័ន្ធអាងហែលទឹក ដែលមានទីតាំងហ្វឹកហាត់ច្បាស់លាស់ជំរុញឱ្យយើងមានលទ្ធភាពអភិវឌ្ឍន៍ទាំងធនធានគ្រូបង្វឹក កីឡាករ កីឡាការិនី ទើបសហព័ន្ធខ្មែរកីឡាហែលទឹកមានធនធានអត្តពលិកកម្រិតយុវជនល្អៗ ដែលឈានដល់ការចូលរួមប្រកួតអន្តរជាតិជាមួយបណ្តាប្រទេសនានា ក្នុងតំបន់។ ជាមួយគ្នានេះ កីឡាករ កីឡាការិនីទាំងអស់ត្រូវបន្តការដុសខាត់គុណភាពសមត្ថភាពឱ្យកាន់តែខ្ពស់ៗ ដើម្បីឈានដល់ការប្រកួតម្រិតទ្វីប ក្នុងន័យពង្រឹងប្រភេទកីឡាហែលទឹកពាក់ជើងទាកម្ពុជារីកចម្រើនឱ្យកាន់តែខ្លាំងក្លា។

លោក ហែម គីរី បានកោតសរសើរចំពោះការខិតខំប្រែងប្រែងប្រកបដោយឆន្ទៈខ្ពស់របស់គ្រូបង្វឹក កីឡាករ កីឡាការិនីហែលទឹកពាក់ជើងទាកម្ពុជា ដែលចូលរួមប្រកួតប្រជែងមេដាយ និងការលើកស្ទួយកិត្តិយសប្រទេសជាតិ។ លោកអគ្គលេខាធិការក៏លើកទឹកចិត្តដល់កីឡាករ កីឡាការិនីបន្តប្តេជ្ញាចិត្តបន្ថែមទៀត ដើម្បីធ្វើឱ្យវិស័យកីឡាកម្ពុជាបង្ហាញភាពខ្លាំងលើឆាកអន្តរជាតិ ដោយតាមរយៈការឈ្នះមេដាយមាស និងប្រាក់ជាច្រើនគ្រឿងនេះបង្ហាញពីការរៀបចំ ការដឹកនាំគ្រប់ជាន់ថ្នាក់របស់ស្ថាប័នពាក់ព័ន្ធទាំងអស់ ហើយជាពិសេសបំផុតគឺរាជរដ្ឋាភិបាលកម្ពុជា ដែលធ្វើឱ្យវិស័យកីឡាហែលទឹករីកចម្រើន ដែលយើងមិនអាចបំភ្លេចបាន។

គួរបញ្ជាក់ថា សហព័ន្ធខ្មែរកីឡាហែលទឹកបានបញ្ជូនគ្រូបង្វឹកម្នាក់ គឺលោក ហែមថុន ពន្លឺ និងកីឡាករ កីឡាការិនី៥នាក់នៃក្រុមជម្រើសជាតិយុវជនកម្ពុជាចូលរួមប្រកួត The 2nd International Bunga Raya Children & Junior Finswimming Competition-Leg1 2026 ដែលបានធ្វើឡើងកាលពីថ្ងៃទី២៣ ខែឧសភា ឆ្នាំ២០២៦។ ជាលទ្ធផល កីឡាករ កីឡាការិនី៥នាក់ដណ្តើមបានមេដាយមាស១៥គ្រឿង និងប្រាក់១គ្រឿង។ លោក ហែមថុន ពន្លឺ គ្រូបង្វឹកហែលទឹកពាក់ជើងទាកម្ពុជាដែលដឹកនាំអត្តពលិកចូលរួមប្រកួតបញ្ជាក់ថា ការប្រកួតនេះមានប្រទេសចូលរួម ដូចជា កម្ពុជា សិង្ហបុរី ឥណ្ឌូណេស៊ី ឥណ្ឌា និងអត្តពលិកម្ចាស់ផ្ទះ ម៉ាឡេស៊ី ២០ក្លឹប (២០ក្លឹបបូក៤ប្រទេស) ចូលរួមប្រកួត ដោយមានកីឡាករ កីឡាការិនីសរុប ២២៣នាក់៕

ដោយ ហេង ណាលីន