AKP ភ្នំពេញ ថ្ងៃទី២៤ ខែឧសភា ឆ្នាំ២០២៦--ឯកឧត្ដម ឡុង កុសល ឯកអគ្គរាជទូត និងជាប្រតិភូអចិន្ត្រៃយ៍ នៃស្ថានគណៈប្រតិភូអចិន្ត្រៃយ៍កម្ពុជា ប្រចាំអង្គការយូណេស្កូ (UNESCO) និងឯកឧត្តម លុយ ដាវីត ឯកអគ្គរាជទូតកម្ពុជា ប្រចាំសាធារណរដ្ឋបារាំង នៅថ្ងៃទី២២ ខែឧសភា ឆ្នាំ២០២៦ បានរៀបចំកម្មវិធីផ្សព្វផ្សាយអំពីបេក្ខភាពរបស់កម្ពុជា ក្នុងគណៈកម្មការអន្តររដ្ឋាភិបាលដើម្បីកិច្ចការពារបេតិកភណ្ឌវប្បធម៌អរូបី សម្រាប់អាណត្តិ ២០២៦-២០៣០។

សូមបញ្ជាក់ថា ការបោះឆ្នោត នឹងប្រព្រឹត្តទៅនាខែមិថុនាខាងមុខនេះ នៅទីស្នាក់ការកណ្តាលអង្គការយូណេស្កូ។

កម្មវិធីផ្សព្វផ្សាយអំពីបេក្ខភាពរបស់កម្ពុជា ក៏មានការអញ្ជើញថ្លែងសុន្ទរកថាតាមប្រព័ន្ធវីដេអូដោយ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ ការធ្វើបទបង្ហាញនៃទស្សនវិស័យ និងសេចក្តីតាំងចិត្តរបស់កម្ពុជាក្នុងគណ:កម្មការ ការសម្តែងរបាំប្រពៃណីខ្មែរ និងការពិសាអាហារខ្មែរជុំគ្នា អមដោយការប្រគំតន្រ្តីបុរាណខ្មែរ។

កម្មវិធីនេះប្រព្រឹត្តទៅនិវេសនដ្ឋានឯកអគ្គរាជទូតកម្ពុជា និងមានការចូលរួមពីបណ្តាឯកអគ្គរដ្ឋ/រាជទូតដែលជាសមាជិកអង្គការយូណេស្កូ និងបងប្អូនខ្មែរនៅបារាំងយ៉ាងច្រើនកុះករ ប្រកបដោយបរិយាកាសសប្បាយរីករាយ៕

ដោយ នីកា