AKP ភ្នំពេញ ថ្ងៃទី២៤ ខែឧសភា ឆ្នាំ២០២៦ --សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានស្វាគមន៍ចំពោះការដកចោលមន្ត្រីមួយចំនួន និងបានផ្តល់ជាអនុសាសន៍ថា ការបង្ក្រាបការឆបោកតាមប្រព័ន្ធបច្ចេកវិទ្យា ត្រូវតែដើរទន្ទឹមនឹងការបង្កា្របមន្ត្រីពាក់ព័ន្ធ និងដកចោលមន្ត្រីដែលគ្មានសកម្មភាពក្នុងការបង្ក្រាបការឆបោកតាមប្រព័ន្ធបច្ចេកវិទ្យា (Online Scams)។ ការលើកឡើងរបស់សម្ដេចតេជោប្រមុខរដ្ឋស្ដីទី យ៉ាងដូច្នេះ ក្នុងឱកាសជួបសំណេះសំណាលជាមួយថ្នាក់ដឹកនាំក្រសួង ស្ថាប័ន ក្រុមប្រឹក្សារាជធានី ខណ្ឌ សង្កាត់ មន្ទីរ អង្គភាពនានាជុំវិញរដ្ឋបាលរាជធានីភ្នំពេញ នាព្រឹកថ្ងៃទី២៤ ខែឧសភា ឆ្នាំ២០២៦ នៅរាជធានីភ្នំពេញ។

ក្នុងឱកាសនេះ សម្តេចតេជោ ហ៊ុន សែន មានប្រសាសន៍ថា អ្នកមិនអាចទទួលជោគជ័យបានទេ ប្រសិនបើអ្នកត្រឹមតែបង្ក្រាបទៅលើអ្នកឆបោកតាមប្រព័ន្ធបច្ចេកវិទ្យាអនឡាញ មិនដើរទន្ទឹមនឹងអ្នកជាប់ពាក់ព័ន្ធ និងអ្នកដែលមិនចង់ធ្វើ ហើយនាយករដ្ឋមន្ត្រីត្រូវចាំឱ្យច្បាស់ត្រង់កន្លែងហ្នឹង។ សម្ដេចតេជោបានលើកឡើងថា អ្នកដែលចូលជាប់ពាក់ព័ន្ធ បើទ្រព្យសម្បត្តិដែលកើតចេញពីការពាក់ព័ន្ធការឆបោកអនឡាញគឺត្រូវតែរឹបអូសថែមទៀត នេះចំពោះអ្នកដែលជាប់ពាក់ព័ន្ធ ដែលមានខេត្តខ្លះបានបើកដៃ និងដឹកពួកឆបោកចូលទៅក្នុងខេត្តរបស់ខ្លួនថែមទៀតផង ដែលក្រុមនេះជាក្រុម ឬជាមន្ត្រីហមន្តរាយសម្រាប់ប្រទេសមិនត្រូវឱ្យរួចខ្លួនទេ។ សម្តេចតេជោបានបន្ថែមថា៖ «កន្លងទៅបានដកមន្ត្រីមួយចំនួនហើយ ប៉ុន្តែ ខ្ញុំសូមផ្តល់ជាមតិពីរកម្រិត៖ កម្រិតទី១ អ្នកដែលចូលជាប់ពាក់ព័ន្ធមិនមែនត្រឹមតែដកតំណែងនោះទេ ត្រូវចោទប្រកាន់ចំពោះមុខតុលាការថែមទៀត ព្រោះបើត្រឹមតែដកមុខតំណែង វាថា ធ្វើអីអញ លុយអញសល់កន្លះលានដុល្លារ សល់១លានដុល្លារ អញចាយមួយឆ្អែត។ អីចឹង ចេញដិកាចោទប្រកាន់ចំពោះមុខតុលាការ ដែលតុលាការចេញដិកាការពារទ្រព្យសម្បត្ដិមួយចំនួន បើកការស៊ើបអង្កេត បើចេញពីស្កែមអនឡាញ ត្រូវរឹបអូសទ្រព្យសម្បត្ដិថែមទៀត។ នេះបើអ្នកជាប់ពាក់ព័ន្ធ ព្រោះខ្ញុំបានទទួលដំណឹងថា ដឹកពួកស្កែមអនឡាញចូលទៅក្នុងខេត្ដខ្លួនទៀត បើកដៃ។ ក្រុមនេះមិនឱ្យរួចខ្លួនទេ ព្រោះជាក្រុមមហន្ដរាយ មន្រ្ដីមហន្ដរាយ បង្កើតមហន្ដរាយសម្រាប់ប្រទេស។ ឯកម្រិតមួយទៀត ត្រឹមដកចេញពីដំណែង ហើយយកមកកន្លែងថ្មី។»

ជាមួយគ្នានេះ សម្ដេចតេជោប្រមុខរដ្ឋស្ដីទីក៏បានសង្កត់ធ្ងន់ថា៖ «បើចៅហ្វាយខេត្ត ឬចៅហ្វាយស្រុកណាមិនព្រមធ្វើ មិនអើពើ កុំទុកឱ្យធ្វើចៅហ្វាយខេត្ត កុំទុកឱ្យធ្វើចៅហ្វាយស្រុកតទៅទៀត គឺត្រូវតែដកចេញទៅ។ មេប៉េអឹម មេប៉ូលីស មេទ័ពនៅតាមខេត្តស្ថិតនៅក្នុងអនុក្រឹតរបស់នាយករដ្ឋមន្ត្រីរួចស្រេចទៅហើយ»។

សម្ដេចតេជោបានរម្លឹកឱ្យដឹងផងដែររថា កាលពីសម្តេចនៅធ្វើជានាយករដ្ឋមន្ត្រីយ៉ាងយូរ ១៥នាទី អនុក្រឹតចេញបានហើយ និងសង្ឃឹមថា សម្ដេចធិបតីនាយករដ្ឋមន្ត្រីប្រើពេលត្រឹម១០នាទី ក្នុងការចេញអនុក្រឹតដកមន្រ្ដី ហើយប្រកាសភ្លាមតាមប្រព័ន្ធផ្សព្វផ្សាយ ជាពិសេសតាមប្រព័ន្ធសារព័ត៌មានអនឡាញ៕

ដោយ៖ ចាន់ សុភឿន