AKP ភ្នំពេញ ថ្ងៃទី២៤ ខែឧសភា ឆ្នាំ២០២៦ --សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជាបានគូសបញ្ជាក់ថា ក្រុម Scams Online បានបែកហ្វូងធំ រួចបន្ដមកសង្ងំនៅក្នុងរាជធានីភ្នំពេញ ប៉ុន្ដែបែជាទៅកើតនៅខេត្ដមណ្ឌលគិរី ហើយឥឡូវឮថានៅខេត្ដរតនគិរី ក៏មានដែរ ហើយសម្ដេចក៏បានប្រាប់ទៅអភិបាលខេត្ដរតនគិរី ឱ្យត្រៀមខ្លួនបង្រ្កាប បើមិនធ្វើទេ ក៏នឹងអស់ស័ក្ដិដែរ។ ការគូសបញ្ជាក់របស់សម្ដេចតេជោក្នុងពិធីជួបសំណេះសំណាលជាមួយថ្នាក់ដឹកនាំក្រសួង ស្ថាប័ន ក្រុមប្រឹក្សារាជធានី ខណ្ឌ សង្កាត់ មន្ទីរ អង្គភាពនានាជុំវិញរដ្ឋបាលរាជធានីភ្នំពេញ នាព្រឹកថ្ងៃទី២៤ ខែឧសភា ឆ្នាំ២០២៦ នៅរាជធានីភ្នំពេញ។

សម្ដេចតេជោ ហ៊ុន សែន បានបញ្ជាក់ប្រាប់យ៉ាងដូច្នេះថា៖ «ខ្ញុំប្រាប់ទៅអភិបាលខេត្ដរតនគិរី ឱ្យត្រៀមខ្លួនបង្រ្កាប បើមិនធ្វើទេ លោកឯងក៏នឹងអស់ស័ក្ដិដែរ ខ្ញុំប្រាប់ឱ្យហើយ។ ខ្ញុំមិនដកជំនួសនាយករដ្ឋមន្រ្ដីទេ ប៉ុន្ដែក្នុងឋានៈជាប្រធានគណបក្សកាន់អំណាច ខ្ញុំមានសិទ្ធិ នឹងនិយាយ។ មេប៉ូលីស មេប៉េអឹម និងចៅហ្វាយខេត្ដរតនគិរី ត្រៀមខ្លួនឱ្យហើយទៅ កម្ចាត់មក្រុម Scams Online ឱ្យហើយទៅ»។

សម្ដេចតេជោក៏សុំឱ្យថ្នាក់ភូមិ ថ្នាក់ឃុំ ថ្នាក់ស្រុក និងគ្រប់ថ្នាក់ទាំងអស់ រួមជាមួយប្រជាពលរដ្ឋ ត្រូវជួយដល់រាជរដ្ឋាភិបាល និងត្រូវផ្ដល់ព័ត៌មាន និងប្រាប់ពីកន្លែងដែលមានក្រុម Scams Online នៅក្នុងមូលដ្ឋានរបស់ខ្លួន។ សម្ដេចតេជោបានលើកឡើងថា៖ «យើងត្រូវចាប់ឱ្យអស់ ចំពោះអ្នកដែលបានប្រព្រឹត្ដបទល្មើស ហើយខ្លះត្រូវកាត់ទោសក្នុងស្រុក រួចហើយចាំធ្វើបត្យាប័នទៅប្រទេសកំណើតវិញ ខ្លះទៀតចាប់ហើយត្រូវបញ្ជូនទៅតែម្ដង។ ដូច្នេះ ត្រូវខិតខំ រឿងនេះមិនមែនគ្រាន់តែជាបញ្ហាត្រឹមតែមុខមាត់ទេ ប៉ុន្ដែបានធ្វើឱ្យបាត់បង់បរទេស អ្នកវិនិយោគដែលត្រឹមត្រូវ និងអ្នកទេសចរណ៍ត្រឹមត្រូវ មានការភ័យខ្លាច»។

ជាមួយគ្នានេះ សម្ដេចតេជោក៏បានលើកឡើងជាសំណួរថា តើយើងអាចវិលត្រឡប់ទៅរកនយោបាយ ឈ្នះ ឈ្នះ ដែលអ្នកដទៃមិនអាចធ្វើតាមយើងបានទេ «ខ្ញុំជឿងថា យើងអាចធ្វើបានដោយកិច្ចសហការ និងការដឹកនាំរបស់រាជរដ្ឋាភិបាល និងកិច្ចសហការរបស់ប្រជាពលរដ្ឋ»។ សម្ដេចតេជោបានអះអាងថា ផលប្រយោជន៍របស់ប្រជាពលរដ្ឋ នឹងទទួលផលប៉ះពាល់យ៉ាងធ្ងន់ធ្ងរដោយសារតែ Scams Online ហើយដែលចេញពីមន្រ្ដីឃុបឃិតមួយចំនួនដែលយើងត្រូវតែដាក់ទណ្ឌកម្មឱ្យធ្ងន់ធ្ងរ និងដកចោលមន្រ្ដីដែលអសកម្មលើបញ្ហា Scams Online នេះ។ សម្ដេចតេជោបានបន្ថែមថា៖ «បើយើងមិនធ្វើទេ យើងនឹងប្រឈមមុខនឹងមហន្ដរាយ ថ្ងៃក្រោយកូនចៅយើងចេះលេងអនឡាញ ថ្ងៃក្រោយកូនចៅយើងនឹងត្រូវគេបង្វិកឱ្យក្លាយជាអ្នកឆបោក ជាអ្នកចេះធ្វើទារុណកម្មចំពោះអ្នកដទៃ»។

សម្ដេចតេជោបានសង្កត់ធ្ងន់ថា ឥឡូវសភាពការណ៍មិនទាន់ហួសពេលទេ នាយករដ្ឋមន្រ្ដីបានចេញដឹកនាំផ្ទាល់ ហើយពួកអ្នកសារព័ត៌មានមួយចំនួនវិភាគត្រឹមត្រូវ ដោយលើកឡើងថា ពួកក្រុម Scams Online នេះ នៅសល់ការសង្ឃឹម ចេញពីកម្ពុជាមិនរួចនៅសល់ការសង្ឃឹម។ តាមការលើកឡើងនេះ ដូចជាមិនខុសប៉ុន្មានទេ ពីព្រោះក្រុម Scams Online នេះសង្ឃឹមថា ធ្វើកន្លែងធំមិនបានទៅធ្វើកន្លែងតូចដោយមានការគាំទ្រពីមន្រ្ដីមូលដ្ឋាន។

ក្នុងឱកាសនោះ សម្ដេចតេជោ ប្រមុខរដ្ឋស្ដីពីក៏សូមគូសបញ្ជាក់ជូនដល់បងប្អូនប្រជាពលរដ្ឋក៏ដូចជាសហគមន៍អន្ដរជាតិឱ្យបានជ្រាបផងដែរថា សម្រាប់សេដ្ឋកិច្ចកម្ពុជាមិនបានពឹងផ្អែកលើចំណូលពី Scams Online ដូចដែលលើកឡើងនោះទេ ហើយអត់ Scams Online កម្ពុជានៅតែមានប្រាក់ចំណូលដើម្បីនឹងដំណើរការធម្មតា ហើយកម្ពុជា ក៏មិនបានទទួលផលណាមួយពី Scams Online នោះទេ៕

ដោយ៖ រិទ្ធី