AKP ភ្នំពេញ ថ្ងៃទី១២ ខែឧសភា ឆ្នាំ២០២៦--ផ្ទះកុមារឆត្របៃតង ក្រោមគម្រោងអភិវឌ្ឍន៍កុមារបឹងត្របែក (BT-CDP) របស់អង្គការឈរុអ៊ូសានសម្រាប់កុមារ បានសម្ពោធដាក់ឱ្យប្រើប្រាស់ជាផ្លូវការដោយលោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា នាថ្ងៃទី១១ ខែឧសភា ឆ្នាំ២០២៦ ដែលមានការចូលរួមពីសំណាក់ ឯកឧត្តម Kim Chang Ryong ឯកអគ្គរដ្ឋទូតសាធារណរដ្ឋកូរ៉េ ប្រចាំកម្ពុជា។

ក្នុងពិធីនេះលោកជំទាវបណ្ឌិតរដ្ឋលេខា ធិការប្រចាំការបានថ្លែងអំណរគុណ និងកោតសរសើរចំពោះ រដ្ឋាភិបាលនៃសាធារណរដ្ឋកូរ៉េ តាមរយៈស្ថានទូតសាធារណរដ្ឋកូរ៉េប្រចាំកម្ពុជា និងជាពិសេសអង្គការឈរុអ៊ូសាន ព្រមទាំងម្ចាស់ជំនួយ ដែលបានផ្តល់ការគាំទ្រផ្នែកហិរញ្ញវត្ថុសម្រាប់គម្រោងដ៏មានអត្ថន័យនេះសម្រាប់កុមារនៅតំបន់បឹងត្របែក ដែលពិតជាបានឆ្លុះបញ្ចាំង និងរួមចំណែកយ៉ាងសំខាន់ទៅនឹងគោលដៅចក្ខុវិស័យកម្ពុជា ២០៣០ និង២០៥០  និងការអនុវត្តយុទ្ធសាស្ត្របញ្ចកោណដំណាក់កាល ទី១ សម្រាប់ការកែលម្អវិស័យអប់រំ និងការលើកកម្ពស់គុណវុឌ្ឍិគណៈគ្រប់គ្រងសាលារៀន និងគ្រូបង្រៀន និងស្របតាមអនុក្រឹត្យស្តីពីការគ្រប់គ្រងទារកដ្ឋានរាជរដ្ឋាភិបាលលេខ២៥៤ ដែលបានចុះកាលពីថ្ងៃទី១៥ ខែធ្នូ ឆ្នាំ២០២៥។ 

លោកជំទាវបានគូសបញ្ជាក់ថា ការវិនិយោគទៅលើកុមារនៅថ្ងៃនេះ គឺជាការកសាងគ្រឹះដ៏រឹងមាំសម្រាប់អនាគតនៃប្រទេសជាតិ។ យើងមិនត្រឹមតែចង់ឱ្យកុមារចេះអាន និងសរសេរប៉ុណ្ណោះទេ ប៉ុន្តែយើងចង់ឱ្យពួកគេរីកចម្រើនឡើងដោយក្តីស្រឡាញ់ សុខភាពល្អ បំណិនជីវិត ទំនាក់ទំនងសង្គម-អារម្មណ៍ និងឥរិយាបថវិជ្ជមាន ហើយថា វត្តមានរបស់ "ផ្ទះកុមារឆត្របៃតង" គឺជាការផ្តល់សិទ្ធិស្មើគ្នាដល់កុមារគ្រប់រូប មិនថាកើតក្នុងគ្រួសារដែលមានស្ថានភាពបែបណាក៏ដោយ ដែលតាមរយៈសកម្មភាពស្នូលទាំង៣ រួមមាន សេវាថែទាំកុមារតូច ការត្រៀមលក្ខណៈចូលរៀន និងថ្នាក់បំណិន គឺជាស្ពានរបស់កូនៗទាំងអស់ឱ្យឈានជើងចូលសាលារៀនដោយភាពជឿជាក់៕

ដោយ៖ ចាន់ សុភឿន ,ប្រភព៖ ក្រសួងអប់រំ