AKP ភ្នំពេញ ថ្ងៃទី១២ ខែឧសភា ឆ្នាំ២០២៦--ស្ថានទូតកម្ពុជាប្រចាំសាធារណរដ្ឋកូរ៉េ បានរៀបចំស្តង់បង្ហាញផលិតផលសក្តានុពលនាំចេញរបស់កម្ពុជាក្នុងព្រឹត្តិការណ៍ “បុណ្យមិត្តភាពសេអ៊ូល លើកទី៣០”នៅសាធារណរដ្ឋកូរ៉េ។

កាលពីថ្ងៃទី៩-១០ ខែឧសភា ឆ្នាំ២០២៦ ឯកឧត្តម ឃួន ផុនរតន: និងលោកជំទាវ ម៉ៅ នរនាថ ព្រមទាំងមន្រ្តីស្ថានទូត បានចូលរួមក្នុងព្រឹត្តិការណ៍ “បុណ្យមិត្តភាពសេអ៊ូល លើកទី៣០” (2026 Seoul Friendship Festival) ក្រោមប្រធានបទ «30 years with the world, Bridging Cultures Together» នៅមជ្ឈមណ្ឌលវប្បធម៌ដុងដេមូនផ្លាសា ក្នុងទីក្រុងសេអ៊ូល ដែលរៀបចំដោយសាលាក្រុងសេអ៊ូល និងមានការចូលរួមពីស្ថានទូត និងស្ថានតំណាងចំនួន ៧៣ ប្រទេស។ 

កម្មវិធីបុណ្យមិត្តភាពសេអ៊ូលជាព្រឹត្តិការណ៍ផ្លាស់ប្តូរវប្បធម៌ប្រចាំឆ្នាំដ៏ធំបំផុតរវាងប្រទេសកូរ៉េ និងបណ្តាប្រទេសផ្សេង ទៀតក្នុងសកលលោក ។

ក្នុងរយៈពេល២ ថ្ងៃនៃពិធីបុណ្យ គណៈកម្មាការកម្មវិធីបុណ្យមិត្តភាពទីក្រុងសេ អ៊ូល បានរៀបចំកម្មវិធីជាច្រើន រួមមានការសម្តែងសិល្បៈអន្តរជាតិ ស្តង់អាហារពិភពលោក ស្តង់សម្លៀកបំពាក់ប្រពៃណី និងមានការបង្ហាញទស្សនីយភាពនៃតំបន់ទេសចរណ៍នៃបណ្តាប្រទេសនានាក្នុងពិភពលោក ជាដើម។ 

ស្ថានទូតកម្ពុជាប្រចាំសាធារណរដ្ឋកូរ៉េ បានរៀបចំស្តង់បង្ហាញផលិតផលសក្តានុពលនាំចេញរបស់កម្ពុជា ស្តង់នំបង្អែម ស្តង់បង្ហាញ និងសាកល្បងស្លៀកឈុតសម្លៀកបំពាក់ប្រពៃណីខ្មែរ និងស្តង់បង្ហាញវីដេអូ ព្រមទាំងរូបភាពផ្សព្វផ្សា យពីតំបន់ទេសចរណ៍នៃព្រះរាជាណា ចក្រកម្ពុជា ព្រមជាមួយគ្នានេះ ក៏បានរៀបចំការសម្តែងសិល្បៈខ្មែរ រួមមាន របាំនារីជាជួរ របាំក្ងោក និងក្បាច់គុនល្បុក្កតោខ្មែរ ដែលបានទាក់ទាញចំណាប់ អារម្មណ៍របស់អ្នកទស្សនាកូរ៉េ និងបរទេសជាច្រើន ដោយពួកគេបានបង្ហាញនូវភាពរីករាយ និងការកោតសរសើរចំពោះវប្បធម៌របស់ប្រទេសកម្ពុជា៕

ដោយ៖ ប៊ុនរិទ្ធ