AkP បន្ទាយមានជ័យថ្ងៃទី០៦ខែឧសភាឆ្នាំ២០២៦--ក្នុងបរិយាកាសដ៏អធិកអធម និងពោរ ពេញដោយស្មារតីសាមគ្គីជាតិ កាលពីរសៀលថ្ងៃទី៥ ខែឧសភា ឆ្នាំ២០២៦ ទីលានកីឡានៃវិទ្យាល័យ ហ៊ុន សែន ខ្លាកូន បានក្លាយជាចំណុចកណ្តាលនៃការជួបជុំគ្នាដ៏ធំមួយ រវាងក្រុមកីឡាករសហ ភាពសហព័ន្ធយុវជនកម្ពុជា (ស.ស.យ.ក.) ខេត្តបន្ទាយ មានជ័យ និងក្រុមកីឡាបាល់ទាត់តារាកម្ពុជា (CFSS) ក្នុងជំនួបមិត្តភាពនិងមនុស្ស ធម៌ ក្រោមប្រធានបទ«កម្លាំងសាមគ្គី ដើម្បីជួរមុខ និងសន្តិភាព»។

ព្រឹត្តិការណ៍នេះ ត្រូវបានរៀបចំឡើងក្រោមអធិបតីភាពលោក កែ សួនសុភាព អភិបាលរងខេត្តបន្ទាយ មានជ័យ និងជាប្រធានសហភាពសហព័ន្ធយុវជនកម្ពុជាខេត្ត ដោយមានការចូលរួមពីថ្នាក់ដឹកនាំមន្ទីរអង្គភាពជុំវិញខេត្ត និងទស្សនិកជនយ៉ាងកុះករប្រមាណជាង ៧,០០០នាក់។

មានប្រសាសន៍ក្នុងឱកាសបើកការប្រ កួត លោក កែ សួនសុភាព បានលើក ឡើងយ៉ាងស៊ីជម្រៅថា ព្រឹត្តិការណ៍នាថ្ងៃនេះមិនមែនត្រឹមតែជាការប្រកួតកីឡាដើម្បីយកឈ្នះឬចាញ់នោះទេ ប៉ុន្តែវាគឺជាការរួមរួមកម្លាំងសប្បុរសធម៌ដ៏ធំធេងមួយ។

លោកបានបញ្ជាក់ថា គោលបំណងចម្បងនៃកម្មវិធីនេះគឺការកៀរគរមូលនិធិសប្បុរសធម៌ដើម្បីនាំយកថវិកា និងសម្ភារៈទៅជួយឧបត្ថម្ភគាំទ្រដល់បងប្អូនវីរកងទ័ពដែលកំពុងឈរជើងការពារទឹកដី និងប្រជាជនភៀសសឹកដែលកំពុងជួបការលំបាក។

លោកបានសង្កត់ធ្ងន់ថា នេះគឺជាការលើកទឹកចិត្ត និងការសម្ដែងការអរគុណយ៉ាងជ្រាលជ្រៅបំផុតចំពោះវីរកងទ័ព ដែលបានលះបង់គ្រប់បែបយ៉ាងដើម្បីការពារបូរណភាពទឹកដី និងសន្តិភាពសម្រាប់ប្រជាជនគ្រប់រូប ក្នុងគ្រប់កាលៈទេសៈ។

ពង្រឹងសាមគ្គីភាពជាតិ តាមរយៈពាក្យស្លោក «ខ្មែរជួយខ្មែរ ខ្មែរតែមួយ» ក្នុងបុព្វហេតុការពារជាតិ និងរក្សាសន្តិភាពឱ្យបានគង់វង្ស។

"យើងលេងកីឡាថ្ងៃនេះ ដើម្បីបង្ហាញថាបេះដូងយុវជន និងប្រជាជននៅជួរក្រោ យ តែងតែនៅជាប់ជាមួយបងប្អូនកង ទ័ពនៅជួរមុខជានិច្ច" នេះជាប្រសាសន៍ដ៏មានអត្ថន័យរបស់លោកប្រធាន ស.ស.យ.ក. ខេត្ត។

ក្រៅពីគោលដៅមនុស្សធម៌ លោក កែ សួនសុភាព ក៏បានឆ្លៀតឱកាសផ្ញើសារអប់រំដ៏មានសារៈសំខាន់ដល់យុវជនដែលបានចូលទស្សនាជិតមួយម៉ឺននាក់នៅទីនោះផងដែរ។ លោកបានក្រើនរម្លឹកដល់ប្អូនៗយុវជនទាំងអស់ ត្រូវតែជៀសឱ្យឆ្ងាយពីគ្រឿងញៀន ដែលជាសត្រូវបំផ្លាញអនាគត និងសង្គមជាតិ។ លោកបានលើកទឹកចិត្តឱ្យយុវជនងាកមកចូលចិត្តលេងកីឡាឱ្យបានច្រើន ដើម្បីសុខភាពមាំមួន បញ្ញាស្មារតីវាងវៃ និងក្លាយជាសសរទ្រូងដ៏រឹងមាំសម្រាប់អភិវឌ្ឍប្រទេសជាតិទៅថ្ងៃអនាគត។    

ការប្រកួតបានប្រព្រឹត្តទៅក្នុងបរិយា កាស សប្បាយរីករាយ និងស្និទ្ធស្នាលជាទីបំផុត។ វត្តមានរបស់ក្រុមកីឡាបាល់ទាត់តារាកម្ពុជា (CFSS) បានទាក់ទាញការចាប់អារម្មណ៍យ៉ាងខ្លាំងពីសំណាក់ទស្សនិកជន ដែលនេះបានសបញ្ជាក់ឱ្យឃើញពីការរួមកម្លាំងគ្នារវាងវិស័យសិល្បៈ កីឡា និងរដ្ឋបាលខេត្ត ក្នុងកិច្ចការងារសង្គម។

ព្រឹត្តិការណ៍នេះមិនត្រឹមតែបានផ្តល់នូវភាពសប្បាយរីករាយប៉ុណ្ណោះទេ ប៉ុន្តែថែមទាំងបានបណ្តុះនូវស្មារតីស្រឡាញ់ជាតិ សាមគ្គីភាព និងការចែករំលែក ក្នុងចំណោមប្រជាពលរដ្ឋ និងយុវជនខេត្តបន្ទាយមានជ័យយ៉ាងពិតប្រាកដ៕

ដោយ ៖ឈុនសារ៉ាត