AKP ភ្នំពេញ ថ្ងៃទី៣០ ខែមេសា ឆ្នាំ២០២៦–លោកជំទាវ ឆៃ ច័ន្ទរិទ្ធីសូលីដា រដ្ឋលេខាធិការ និងជាប្រធានក្រុមការងារយេនឌ័រ និងការងារពាក់ព័ន្ធស្ត្រីនិងក្មេងស្រីរបស់ក្រសួងព័ត៌មានមានប្រសាសន៍ថា បញ្ហានៃការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់ មិនត្រឹមតែជាបញ្ហាសុខភាពប៉ុណ្ណោះទេ ប៉ុន្តែវាជាឧបសគ្គរាំងស្ទះដល់ការ អភិវឌ្ឍធនធានមនុស្ស ជាពិសេសគឺការបាត់បង់ឱកាសសិក្សា និងការអភិវឌ្ឍសក្តានុពលរបស់ក្មេងស្រីថែមទៀតផង។

ក្នុងសិក្ខាសាលាស្តីពី “ការបង្ការទប់ស្កាត់ផលប៉ះពាល់នៃការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់” ដែលធ្វើឡើងសម្រាប់អ្នកសារព័ត៌មាន នាព្រឹកថ្ងៃទី៣០ ខែមេសា ឆ្នាំ២០២៦ ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន លោកជំទាវ ឆៃ ច័ន្ទរិទ្ធីសូលីដា បានគូសបញ្ជាក់ថា បញ្ហានៃការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់ គឺជាប្រធានបទដ៏ស៊ីជម្រៅ ដែលទាមទារឱ្យមានការចូលរួមដោះស្រាយពីគ្រប់ផ្នែក ខណៈដែលក្នុងវិស័យព័ត៌មាន យើងមានកាតព្វកិច្ចជាយុទ្ធសាស្ត្រក្នុងការប្រើប្រាស់ឥទ្ធិពលនៃ "សំឡេងម៉ៃក្រូហ្វូន និងចុងប៊ិច” ដើម្បីផ្លាស់ប្តូរផ្នត់គំនិតអវិជ្ជមានក្នុងសង្គម ហើយអ្វីដែលកាន់តែពិសេសនោះគឺ "គុណតម្លៃនៃស្ត្រីក្នុងយុគសម័យឌីជីថល”។

លោកជំទាវរដ្ឋលេខាធិការបានលើកឡើងថា ស្ត្រីក្នុងវិស័យព័ត៌មាននាពេលបច្ចុប្បន្នមិនត្រឹមតែជាអ្នកគ្រប់គ្រងព័ត៌មានប៉ុណ្ណោះទេ ប៉ុន្តែគឺជាអ្នកដឹកនាំការផ្លាស់ប្តូរ និងជាអ្នកបង្កើតមាតិកាឌីជីថលដ៏មានឥទ្ធិពល។ បើតាមលោកជំទាវ ការប្រើប្រាស់បច្ចេកវិទ្យាទំនើបដើម្បីបញ្ជ្រាបការយល់ដឹងពីផលប៉ះពាល់នៃការរៀបការវ័យក្មេង គឺជាអាវុធដ៏មុតស្រួចដែលយើងត្រូវប្រើប្រាស់ដើម្បីការពារអនាគតក្មេងស្រីជំនាន់ក្រោយឱ្យទទួលបាននូវការសិក្សា និងការអភិវឌ្ឍពេញលេញ។ លោកជំទាវថា សិក្ខាសាលាថ្ងៃនេះ មិនមែនត្រឹមតែជាការជួបជុំគ្នាដើម្បីទទួលចំណេះដឹងប៉ុណ្ណោះទេ ប៉ុន្តែគឺជាការកំណត់ទិសដៅរួមគ្នាដោយយើងទទួលបានបទបង្ហាញពីវាគ្មិនកិត្តិយសមកពីក្រសួងកិច្ចការនារី និងក្រសួងសុខាភិបាល សិក្ខាកាមទាំងអស់នឹងក្លាយជាអ្នកនាំសារដ៏សកម្មក្នុងការផ្សព្វផ្សាយបន្តនូវវិធានការបង្ការ និងទប់ស្កាត់ឱ្យមានប្រសិទ្ធភាពខ្ពស់បំផុតទៅលើផលប៉ះពាល់នៃការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់។

ក្នុងឱកាសនេះ ក្នុងនាមជាប្រធានក្រុមការងារយេនឌ័រ លោកជំទាវ ឆៃ ច័ន្ទរិទ្ធីសូលីដា បានធ្វើការប្តេជ្ញាចិត្តយ៉ាងមុតមាំក្នុងការបន្តខិតខំប្រឹងប្រែងអស់ពីកម្លាំងកាយ ចិត្ត ដើម្បីធ្វើជាសេនាធិការដ៏រឹងមាំ និងសកម្មបំផុតជូនក្រសួងព័ត៌មាន ដោយនឹងបន្តជំរុញការងារយេនឌ័រ ការងារស្ត្រី និងក្មេងស្រីឱ្យកាន់តែមានសន្ទុះខ្លាំងក្លា ឆ្លើយតបនឹងយន្តការជាតិ និងទិសដៅការងាររបស់ក្រសួង ដែលឯកឧត្តមរដ្ឋមន្ត្រីបានដាក់ចេញ៕

ដោយ៖ ចាន់ សុភឿន , រូបថត៖ សួស សាវី