AKP កណ្តាល ថ្ងៃទី៣០ ខែមេសា ឆ្នាំ២០២៦ -- ក្រុមកីឡាករ កីឡាការិនីបាល់ទាត់លើតុជម្រើសជាតិកម្ពុជាបានវិលត្រឡប់មកដល់មាតុប្រទេសវិញ បន្ទាប់ពីបានបញ្ចប់បេសកកម្មចូលរួមប្រកួតកីឡាឆ្នេរខ្សាច់អាស៊ី (Asian Beach Games) លើកទី៦ នៅទីក្រុងសាន់យ៉ា សាធារណរដ្ឋប្រជាមានិតចិន ដោយបាននាំយកនូវមេដាយសំរឹទ្ធ១វិញ្ញាសាមកជូនជាតិ ខណៈម្ចាស់មេដាយសំរឹទ្ធ១វិញ្ញាសាទាំងពីររូបបានបង្ហាញពីមោទនភាពដែលការប្រឹងប្រែងនេះបាននាំយកមេដាយយកមកជូនជាតិ។

ការវិលត្រឡប់មកដល់វិញនេះទទួលបានការស្វាគមន៍យ៉ាងកក់ក្តៅពីឯកឧត្តម ដួង មាសចំរើន ទីប្រឹក្សាក្រសួងអប់រំ យុវជន និងកីឡា និងអនុប្រធានមជ្ឈមណ្ឌលជាតិហ្វឹកហ្វឺនកីឡា និងមន្ត្រីជាច្រើនរូប កាលពីល្ងាចថ្ងៃទី២៩ ខែមេសា ឆ្នាំ២០២៦ នៅអាកាសយានដ្ឋានអន្តរជាតិតេជោ ខេត្តកណ្តាល។

មេដាយសំរឹទ្ធ១វិញ្ញាសារបស់ប្រភេទកីឡាបាល់ទាត់លើតុកកម្ពុជានេះដណ្តើមបានលើវិញ្ញាសាទាត់គូនារី ដោយកីឡាការិនី ម៉ី ស្រីមាស និងកីឡាការិនី យ៉ន សោភ័ណ្ឌរស្មី។

ម្ចាស់មេដាយសំរឹទ្ធ កីឡាការិនី ម៉ី ស្រីមាស បានលើកឡើងថា ក្នុងវិញ្ញាសាទាត់គូនារីនេះមាន១១ក្រុមចូលរួម ចែកចេញជាពីរពូល ដោយក្រុមនារីកម្ពុជាស្ថិតក្នុងពូល A ដែលមាន៥ក្រុម ក្នុងនោះក្រុមនារីកម្ពុជាលេង៤ប្រកួត ហើយឈ្នះ៣ប្រកួត និងចាញ់១ប្រកួត។ ក្រុមនារីកម្ពុជាបានឡើងវគ្គពាក់កណ្តាលផ្តាច់ព្រ័ត្រ ដោយប៉ះជាមួយក្រុមនារីកូរ៉េខាងជើង ប៉ុន្តែក្រុមនារីកម្ពុជាបានប្រកួតចាញ់ក្រុមយក្រុមនារីកូរ៉េខាងជើង ហើយទទួលបានមេដាយសំរឹទ្ធតែម្តង។

កីឡាការិនីរូបនេះបន្ថែមថា ការទទួលបានមេដាយសំរឹទ្ធ១គ្រឿងនេះមិនមែនជាបំណងដែលខ្លួនចង់បាននោះទេ ដោយឆន្ទៈរបស់ក្រុមនារីកម្ពុជាចង់ឈ្នះមេដាយកម្រិតខ្ពស់ជាងនេះ ប៉ុន្តែយ៉ាងណានេះជាការកើតចេញពីការខិតខំប្រឹងប្រែងយ៉ាងខ្លាំង ម្យ៉ាងដោយសារការប្រមូលផ្តុំហ្វឹកហាត់មានរយៈពេលខ្លី ហើយប្រភេទកីឡាបាល់ទាត់លើតុជាប្រភេទកីឡាថ្មីដែលទើបបង្កើតឡើងប៉ុន្មានឆ្នាំចុងក្រោយនេះប៉ុណ្ណោះ ជាពិសេសទើបហ្វឹកហាត់ក្នុងឆ្នាំ២០២៥មក។ នេះជាការប្រកួតកម្រិតហ្គេមដ៏ធំកម្រិតទ្វីបអាស៊ី ដែលក្រុមចូលរួមសុទ្ធសឹងជាប្រទេសខ្លាំងៗតែម្តង។

 យ៉ាងណាក្តី កីឡាការិនី ម៉ី ស្រីមាស បង្ហាញចំណាប់អារម្មណ៍របស់ខ្លួនបន្ថែមថា ៖«មេដាយសំរឹទ្ធ១វិញ្ញាសានេះ គឺជាសមិទ្ធផលថ្មីមួយ ដែលកើតចេញពីការប្រឹងប្រែងអស់ពីសមត្ថភាព ហើយក៏ជាមេដាយដ៏អស្ចារ្យលើសពីការំពឹងទុក។ ខ្ញុំពិតជាមានមោទនភាពណាស់ ដែលការប្រឹងប្រែងនេះអាចដណ្តើមបានមេដាយ១វិញ្ញាសាយកមកជូនជាតិមាតុភូមិ។ បើប្រៀបធៀបនឹងកម្រិតអាស៊ី គុណភាពបច្ចេកទេសក្រុមកម្ពុជាយើងនៅមានកម្រិតនៅឡើយ ដោយប្រទេសខ្លះទៀតមានកម្រិតខ្ពស់ ប៉ុន្តែប្រៀបធៀបនឹងកម្រិតអាស៊ីអាគ្នេយ៍ គឺក្រុមកម្ពុជាយើងអាចប្រដំប្រសងគ្នាបាន។ ជារួមមេដាយសំរឹទ្ធ១វិញ្ញាសានេះ គឺជាកើតចេញពីការប្រឹងប្រែងយ៉ាងខ្លាំងផ្ទាល់ខ្លួនផង និងការមើលថែរបស់គ្រូបង្វឹក ព្រមទាំងការលើកទឹកចិត្តពីថ្នាក់ដឹកនាំរបស់យើងផងដែរ»។

គួរបញ្ជាក់ថា ការប្រកួតកីឡាឆ្នេរខ្សាច់អាស៊ី (Asian Beach Games) លើកទី៦ នៅទីក្រុងសាន់យ៉ា សាធារណរដ្ឋប្រជាមានិតចិន ឆ្នាំ២០២៦នេះ គឺកម្ពុជាបញ្ជូនប្រតិភូ គ្រូបង្វឹក កីឡាករ កីឡាការិនីចូលរួមប្រកួតលើ៤ប្រភេទកីឡា ដូចជាកីឡាទ្រីយ៉ាត្លុង ជឺជីតស៊ូ ចំបាប់ និងបាល់ទាត់លើតុ ហើយជាលទ្ធផល គឺកម្ពុជាដណ្តើមបានមេដាយ២គ្រឿង ក្នុងនោះមេដាយប្រាក់១គ្រឿងដណ្តើមបានលើប្រភេទកីឡាទ្រីយ៉ាត្លុង ដោយកីឡាការិនីកូនកាត់ខ្មែរ-បារាំង ម៉ាហ្គត មរកត ហ្គារ៉ាប៊ិឌៀន ដែលឈ្នះមេដាយប្រាក់១គ្រឿង លើវិញ្ញាសាអាគ័រត្លុងនារី (Women Individual Aquathlon) (រត់ និងហែលទឹក) និងមេដាយ១គ្រឿងទៀតជាមេដាយសំរឹទ្ធ ដណ្តើមបានដោយកីឡាការិនី២រូបនេះលើប្រភេទកីឡាបាល់ទាត់លើតុលើវិញ្ញាសាទាត់គូនារី៕ ដោយ

ហេង ណាលីន (រូបភាព៖ យឹម សុវឌ្ឍនា)