AKP កណ្តាល ថ្ងៃទី៣០ ខែមេសា ឆ្នាំ២០២៦ -- ក្រុមបាល់ទាត់វិសាខាបានយកឡើងទៅវគ្គផ្តាច់ព្រ័ត្រ ក្រោយឈ្នះគូប្រជែង អាយអេសអាយដង្កោសែនជ័យ សរុបទាំងពីរជើង ៧-១ ខណៈបឹងកេត និងក្រុមព្រះខ័នរាជស្វាយរៀង រក្សាលទ្ធផលស្មើគ្នា ១ទល់១ នៅក្នុងការប្រកួតជើងទី១ ការប្រកួតបាល់ទាត់ពានរង្វាន់សម្តេចតេជោ ហ៊ុន សែន ថ្នាក់ជាតិ រដូវកាល ២០២៥-២០២៦។

ក្រុមវិសាខា ដែលបានកក់កៅអីវគ្គផ្តាច់ព្រ័ត្រនេះ គឺក្រោយពីបានយកឈ្នះគូប្រជែងរបស់ខ្លួន ក្រុមអាយអេសអាយដង្កោសែនជ័យ ដោយលទ្ធផលបច្ចេកទេស ៤-១ ក្នុងជំនួបជើងទី២ កាត់សេចក្តី វគ្គពាក់កណ្តាលផ្តាច់ព្រ័ត្រ កាលពីល្ងាចថ្ងៃទី២៩ ខែមេសា ឆ្នាំ២០២៦ សរុបទាំងពីរជើង ៧-១។ ៤គ្រាប់របស់វិសាខា ធ្វើសម្រេចដោយកីឡាករ JUNGBIN PARK ៣គ្រាប់ និង១គ្រាប់ទៀតរកបានដោយកីឡាករ គ្រីយ៉ា ថា ខណៈ១គ្រាប់តាមពីក្រោយរបស់អាយអេសអាយដង្កោសែនជ័យ រកបានដោយកីឡាករ Sonosuke Onda នៅនាទីទី៨៦។

ចំពោះ១ប្រកួតទៀត នៅក្នុងវគ្គពាក់កណ្តាលផ្តាច់ព្រ័ត្រ កាលពីល្ងាចថ្ងៃទី២៩ ខែមេសានេះដែរ គឺម្ចាស់ផ្ទះ បឹងកេត តាមបានស្មើជាមួយក្រុមភ្ញៀវ ព្រះខ័នរាជស្វាយរៀង ១ទល់១។ ១គ្រាប់បើកការនាំមុខរបស់ព្រះខ័នរាជស្វាយរៀងរកបានដោយកីឡាករ PATRICK ROBSON DE SOUZA MONTEIRO នៅនាទីទី៨ ខណៈ១គ្រាប់តាមស្មើរបស់ម្ចាស់ផ្ទះ បឹងកេត ធ្វើសម្រេចដោយកីឡាករ Lago Bento Fernandes នៅនាទីទី៨៦។

វិសាសា vs អាយអេសអាយដង្កោសែនជ័យ

គួរបញ្ជាក់ថា សម្រាប់ការប្រកួតនៅជើងទី២កាត់សេចក្តីរវាងព្រះខ័នរាជស្វាយរៀង និងបឹងកេត វគ្គពាក់កណ្តាលផ្តាច់ព្រ័ត្រ គ្រោងនឹងធ្វើឡើងនាថ្ងៃទី២០ ខែឧសភា ឆ្នាំ២០២៦ ហើយការប្រកួតវគ្គផ្តាច់ព្រ័ត្រ ដណ្តើមជើងឯក ពានរង្វាន់សម្តេចតេជោ ហ៊ុន សែន ថ្នាក់ជាតិនេះគ្រោងនឹងធ្វើឡើងនាថ្ងៃទី២៤ ខែឧសភា ឆ្នាំ២០២៦ជាមួយពិធីបំពាក់មេដាយ-ប្រគល់ពានរង្វាន់តែម្តង៕ ដោយ

បឹងកេត Vs ព្រះខ័នរាជស្វាយរៀង

ហេង ណាលីន (រូបភាព៖ Hun Sen Cup)