AKP បន្ទាយមានជ័យ ថ្ងៃទី២៨ ខែមេសា ឆ្នាំ២០២៦-- ក្នុងគោលដៅលើកកម្ពស់សុខុមាលភាពគ្រួសារ និងកិច្ចការពារស្ត្រីនិងកុមារនៅតាមតំបន់ងាយរងគ្រោះ លោកជំទាវ ហ៊ូ សាមិត្ត រដ្ឋលេខាធិការក្រសួងកិច្ចការនារី បានសង្កត់ធ្ងន់ពីសារៈសំខាន់នៃ "ការចិញ្ចឹមកូនបែបវិជ្ជមាន" ថាជាខែលការពារដ៏រឹងមាំក្នុងការទប់ស្កាត់អំពើហិង្សា និងការកេងប្រវ័ញ្ចគ្រប់ទម្រង់។ ការថ្លែងបែបនេះបានធ្វើឡើងក្នុងឱកាសដែលលោកជំទាវអញ្ជើញជាអធិបតីក្នុងពិធីបើកវគ្គបណ្តុះបណ្តាលគ្រូបង្គោលថ្នាក់ក្រោមជាតិ នាព្រឹកថ្ងៃទី២៨ ខែមេសា ឆ្នាំ២០២៦ នៅមន្ទីរកិច្ចការនារីខេត្តបន្ទាយមានជ័យ។

លោកជំទាវ ហ៊ូ សាមិត្ត បានបញ្ជាក់ថា មន្ត្រីបង្គោលគឺជាស្ពានចម្លងចំណេះដឹងដ៏សំខាន់ ដើម្បីប្រែក្លាយការយល់ដឹងពីថ្នាក់ជាតិ ទៅជាការអនុវត្តជាក់ស្តែងនៅក្នុងសហគមន៍ ជាពិសេសនៅតំបន់ដាច់ស្រយាលតាមព្រំដែន។

វគ្គបណ្តុះបណ្តាលរយៈពេល២ថ្ងៃ (២៨-២៩ មេសា) ត្រូវបានរៀបចំឡើងដោយនាយកដ្ឋានស្ត្រី និងការអប់រំនៃក្រសួងកិច្ចការនារី ក្រោមការគាំទ្រថវិកាពីរដ្ឋាភិបាលនៃសាធារណរដ្ឋកូរ៉េ និងការគាំទ្របច្ចេកទេសពីអង្គការយូនីសេហ្វប្រចាំកម្ពុជា (UNICEF)។ គោលបំណងចម្បងគឺអភិវឌ្ឍសមត្ថភាពមន្ត្រីបង្គោល បំពាក់បំប៉នចំណេះដឹងដល់មន្ត្រីថ្នាក់ក្រោមជាតិឱ្យមានលទ្ធភាពពេញលេញក្នុងការផ្តល់ការគាំទ្រ។ ការផ្សព្វផ្សាយបន្ត សំដៅដល់ការចុះអប់រំដោយផ្ទាល់ដល់សហគមន៍ដែលរងគ្រោះ ឬងាយរងគ្រោះដោយសារជម្លោះព្រំដែន។

វគ្គបណ្តុះបណ្តាលនេះបានផ្តោតលើចំណុចគន្លឹះសំខាន់ៗរួមមានសុខុមាលភាពផ្លូវចិត្ត ការយល់ដឹងពីស្ថានភាពចិត្តសាស្ត្រក្នុងគ្រួសារ។ការលុបបំបាត់អំពើហិង្សាយុទ្ធសាស្ត្រកាត់បន្ថយអំពើហិង្សាលើស្ត្រី និងកុមារ។កិច្ចការពារការរំលោភបំពាន ការទប់ស្កាត់ការកេងប្រវ័ញ្ច និងការរំលោភបំពានផ្លូវភេទលើគ្រប់រូបភាព។ ក្នុងព្រឹត្តិការណ៍នេះ មានការចូលរួមយ៉ាងកុះករពីមន្ត្រីពាក់ព័ន្ធសរុបចំនួន ៤៦ នាក់ (ក្នុងនោះស្រីមានរហូតដល់ ៤៥ នាក់) ដែលអញ្ជើញមកពី គណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត (គកសក)។ មន្ទីរកិច្ចការនារីខេត្ត ក្រុមប្រឹក្សាឃុំ/សង្កាត់ (ជំទប់ទី១ និងទី២) ការិយាល័យសង្គមកិច្ច និងសុខុមាលសង្គម។

តាមរយៈការបណ្តុះបណ្តាលនេះ គេរំពឹងថា មន្ត្រីបង្គោលទាំងអស់នឹងក្លាយជាកម្លាំងចលករដ៏មានឥទ្ធិពល ក្នុងការផ្លាស់ប្តូរឥរិយាបថសង្គម តាមរយៈការជំរុញឱ្យមានការចិញ្ចឹមកូនដោយក្តីស្រឡាញ់ គ្មានអំពើហិង្សា និងការបង្កើតបរិយាកាសសុវត្ថិភាពសម្រាប់ស្ត្រី និងកុមារនៅតាមមូលដ្ឋានផ្ទាល់តែម្តង៕

ដោយ ឈុន សារ៉ាត