AKP ភ្នំពេញ ថ្ងៃទី២៨ ខែមេសា ឆ្នាំ២០២៦--សហព័ន្ធកីឡាបាល់ទាត់កម្ពុជា (FFC) បានចេញកំណត់បង្ហាញការធ្វើបច្ចុប្បន្នភាព កាលពីថ្ងៃទី២៧ ខែមេសា ឆ្នាំ២០២៦ ស្តីពីការកំណត់របស់សហព័ន្ធកីឡាបាល់ទាត់អាស៊ី (AFC) នូវចំនួនកូតាចំនួនពីរសម្រាប់ក្លឹបតំណាងជាតិរបស់កម្ពុជា សម្រាប់ការប្រកួតពានរង្វាន់ក្លឹបលំដាប់ទី២ (AFC Champions League Two) សម្រាប់រដូវកាល ២០២៦-២០២៧។

តាមការបញ្ជាក់របស់សហព័ន្ធកីឡាបាល់ទាត់កម្ពុជាបានបញ្ជាក់ជាផ្លូវការថា ដោយទទួលបានការបញ្ជាក់បន្ថែមពីសហព័ន្ធកីឡាបាល់ទាត់អាស៊ី សហព័ន្ធកីឡាបាល់ទាត់កម្ពុជាបានធ្វើបច្ចុប្បន្នភាពនៃចំនួនកំណត់កូតាក្លឹបបាល់ទាត់តំណាងជាតិ ដែលកម្ពុជាទទួលបានដើម្បីចូលរួមការប្រកួតដែលរៀបចំដោយសហព័ន្ធកីឡាបាល់ទាត់អាស៊ី (AFC) ឆ្នាំ២០២៦/២៧ មានចំនួន ២ក្លឹប ដូចខាងក្រោម៖ ១. វគ្គចែកពូលពានរង្វាន់ AFC Champions League Two (Group Stage) ចំនួន១។ ២. វគ្គជម្រុះពានរង្វាន់ AFC Champions League Two (Play-off) ចំនួន១។

ជាមួយគ្នានេះ សហព័ន្ធកីឡាបាល់ទាត់កម្ពុជាបានបញ្ជាក់ទៀតថា ចំពោះការកំណត់គោលការណ៍ក្លឹបបាល់ទាត់តំណាងជាតិចូលរួមការប្រកួតពានរង្វាន់កម្រិតទ្វីបអាស៊ីនេះនឹងត្រូវអនុវត្តទៅតាមលំដាប់លំដោយ ក្នុងសេចក្តីជូនដំណឹងលេខ ០៣៤/២៦ ស.ប.ក ចុះថ្ងៃទី២៨ ខែមករា ឆ្នាំ២០២៦ របស់សហព័ន្ធកីឡាបាល់ទាត់កម្ពុជា។

ដោយឡែក បើតាមការបញ្ជាក់របស់ AFC បានឱ្យដឹងថា AFC Champions League Two (អក្សរកាត់ថា ACL Two ឬ ACL2) គឺជាការប្រកួតបាល់ទាត់តាមទ្វីបប្រចាំឆ្នាំ ដែលរៀបចំដោយសហព័ន្ធបាល់ទាត់អាស៊ី។ វាជាការប្រកួតកម្រិតទីពីរនៃបាល់ទាត់ក្លឹបអាស៊ីដែលមានចំណាត់ថ្នាក់ក្រោម AFC Champions League Elite និងលើសពី AFC Challenge League។ ការប្រកួតនេះត្រូវបានបង្កើតឡើងក្នុងឆ្នាំ២០២៤ ដែលជាពានរង្វាន់ AFC Cup វាត្រូវបានលេងជាចម្បងក្នុងចំណោមក្លឹបមកពីប្រទេស ដែលមិនបានទទួលការប្រកួតជម្រុះដោយផ្ទាល់ទៅកាន់ក្របខ័ណ្ឌកំពូល AFC Champions League។ ការប្រកួតប្រជែងនេះបានប្តូរឈ្មោះទៅជាឈ្មោះបច្ចុប្បន្នរបស់វានៅឆ្នាំ២០២៤។ នៅក្នុងការដេញថ្លៃដើម្បីបង្កើនការប្រកួតប្រជែង ទម្រង់របស់វាត្រូវបានផ្លាស់ប្តូរផងដែរ ដើម្បីរួមបញ្ចូលក្លឹបមកពីសមាគមជាសមាជិក AFC ដែលមានចំណាត់ថ្នាក់ខ្ពស់ជាង ហើយប្រាក់រង្វាន់ត្រូវបានកើនឡើងផងដែរ៕

ដោយ ហេង ណាលីន (រូបភាព៖ CPL-FFC)