AKP ខេត្តព្រះសីហនុ ថ្ងៃទី២៧ ខែមេសា ឆ្នាំ២០២៦---

ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ទទួលជំនួបសម្តែងការគួរសមជាមួយលោក ស្រី Kazuko ISHIGIKI នាយិកាប្រចាំតំបន់អាស៊ីប៉ាស៊ីហ្វិក និងលោកស្រី Odicea Angelo Barrios មន្ត្រីជាន់ខ្ពស់ នៃ UN-Habitat ប្រចាំតំបន់អាស៊ីប៉ាស៊ីហ្វិក ដើម្បីពិភាក្សាលើគម្រោងកិច្ចសហប្រតិបត្តិការរវាងរដ្ឋបាលខេត្តព្រះសីហនុ និងកម្មវិធីអង្គការ UN-Habitat ព្រមទាំងស្វែងយល់អំពីការអភិវឌ្ឍខេត្តព្រះសី ហនុនៅសាលាខេត្តព្រះសីហនុ នារសៀលថ្ងៃចន្ទទី២៧ ខែមេសា ឆ្នាំ២០២៦ ។    
ឯកឧត្តម ម៉ាង ស៊ីណេត អភិបាលខេត្តព្រះសីហនុ បានជំរាបជូនថា ក្នុងនាមរដ្ឋ​បាលខេត្ត និងប្រជាពលរដ្ឋខេត្តព្រះសី ហនុ សូមស្វាគមន៍លោកស្រី និងសហការីដែលបានមកដល់ខេត្តតំបន់ឆ្នេរ នៃព្រះរាជាណាចក្រកម្ពុជា ព្រមទាំងបានជំរាបជូន​ពីកត្តាភូមិសាស្ត្រ និងសក្តានុពលរបស់ខេត្តព្រះសីហនុ ចែកជា៦ ក្រុង ស្រុក​ ២៩ឃុំ សង្កាត់​ និង ១១១ភូមិ មានប្រជាពលរដ្ឋប្រមាណជា ៣១ម៉ឺននាក់ ជាខេត្តសម្បុរទៅដោយធនធានធម្មជាតិ មានកោះ៣២ ថ្មដុះ១​ ថ្មប៉ប្រះទឹក៥​ ឆ្នេរសមុទ្រ​ប្រវែង ១៧៥​គីឡូម៉ែត្រ ជួយពង្រឹងពង្រីកវិស័យឧស្សាហកម្ម​ ពាណិជ្ជកម្ម កសិកម្ម​ និងទេស​ចរណ៍​ ធ្វើឪ្យខេត្តព្រះសីហនុ ប្រសិទ្ធនាមថា​ ជាតារារះ "នាទិសនារតី" ខេត្តព្រះ​សីហនុ ជាខេត្តស្នូលនៃតំបន់ឆ្នេរមានដូចជា ខេត្តព្រះសីហនុ ខេត្តកោះកុង​ ខេត្តកំពត​ និងខេត្តកែប និងត្រូវបានដាក់បញ្ជូលជាសមាជិកក្លឹបឆ្នេរស្អាតជាងគេ​លើសកលលោកកាលពីឆ្នាំ២០១១​ នៅប្រទេសសេណេកាល់។​

ឯកឧត្តមថា ខេត្តព្រះសីហនុមានសក្តានុពលសេដ្ឋកិច្ចដូចជា​ ផ្លូវគោក ផ្លូវទឹក និងផ្លូវអាកាស ផ្លូវទឹកមានកំពង់ផែទឹកជ្រៅ ដែលមានទំនិញឆ្លងកាត់ប្រមាណជា​ ៧០ភាគរយ កំពង់ផែស្វយ័តក្រុងព្រះ​សីហនុ ត្រូវបាននឹងកំពុងបានធ្វើការអភិវឌ្ឍជាបីតំណាក់កាល​ នឹងតំណាក់កាលទីបីត្រូវបញ្ចប់នៅឆ្នាំ២០៣០​ ដែលមានជំរៅទឹក ១៧,៥០ម៉ែត្រ​ អាចឪ្យនាវាធ្វើចរាចរណ៍នៅលើពិភពលោកចូលចតបាន ផ្លូវគោក មានដូចជា​ផ្លូវជាតិលេខ៣ លេខ៤ ផ្លូវល្បឿន​​លឿន​ និងផ្លូវរថភ្លើង ផ្លូវអាកាស មានផ្លូវរត់ប្រវែង ៣ ៣០០ម៉ែត្រ។​ 

ជាមួយគ្នាឯកឧត្តមអភិបាលខេត្តបានលើកឡើងថាដោយសារខេត្តព្រះសីហនុ មានវិស័យដឹកជញ្ជូនដ៏សម្បុរបែប រាជរដ្ឋាភិបាលឪ្យបង្កើតជាតំបន់សេដ្ឋកិច្ចពិសេសគំរូពហុបំណង ដែលមានសួនឧស្សាហកម្ម តំបន់ភស្តុភាកម្មដែលមានទំនាក់ទំនងទៅនឹងសកលលោក ទីក្រុងសមាហរណ្មកម្ម​ មជ្ឈមណ្ឌលហិរញ្ញវត្ថុអន្តរជាតិ និងតំបន់កោះ អភិវឌ្ឍទៅជាអេកូទេសចរណ៍ប្រណិត និងរុញវិស័យកសិកម្ម វារីវប្បកម្ម ។

ឯកឧត្តម អភិបាលខេត្តព្រះសីហនុ ក៏បានថ្លែងអំណគុណ UN-Habitat បានជួយអភិរក្សដាំដុះកោង​កាង រួមទាំងគម្រោងទីក្រុងឆ្លាតវៃ​ សំណល់រឹងនៅក្រុងព្រះ​សីហនុ ដែលជាបញ្ហាប្រឈមនឹងសង្គមសព្វថ្ងៃ​ និងគំនិតផ្តួចផ្តើមទីក្រុងបៃតងជា​ដើម យើងត្រូវអភិវឌ្ឍទីក្រុងរបស់យើងក្នុងគម្រោងគាំពារ នៃការប្រែប្រួលអាកាសធាតុនៅខេត្តព្រះសីហនុ អង្គការ UN-Habitat ជួយសាងសង់ប្រព័ន្ធលូបង្ហូទឹកភ្លៀងនៅស្រុកព្រៃនប់​ប្រវែង ២គីឡូម៉ែត្រ​ បានជួយសាងសង់លំនៅដ្ឋានដែលមានភាពធន់នឹងអាកាសធាតុ សូមជួយសាងសង់លំនៅដ្ឋាន និងប្រព័ន្ធរំដោះទឹកនៅស្រុកព្រៃនប់បន្តទៀត យើងក៏ត្រូវការប្រព័ន្ធរំដោះទឹកភ្លៀងជាង ២គីឡូបន្ថែមទៀតនៅស្រុកព្រៃនប់ ម្យ៉ាងទៀតស្រុកព្រៃនប់ទទួលរងផលប៉ះពាល់គ្រោះ​ធម្មជាតិច្រើនជាងគេដោយសារខ្យល់កន្ទ្រាក់​​​ សូមអង្គការ UN-Habitat បន្តជួយគាំទ្រគម្រោងនៅក្នុងខេត្តព្រសីហនុរបស់យើងបន្តទៀត ។   ​​​​
ជាការឆ្លើយតប លោកស្រី Kazuko ISHIGIKI Director of Asia Pacific នាយិកាប្រចាំតំបន់ អាស៊ីប៉ាស៊ីហ្វិក បានកោតសរសើរពីសមិទ្ធិផល​​​ និងសក្តានុពលរបស់ខេត្តព្រះសីហនុ ចំពោះការអនុវត្តគម្រោងនាពេលកន្លងមក ស្តីពីការបន្សំទៅ នឹងការប្រែប្រួលអាកាសធាតុ ប្រព័ន្ធលូទឹកភ្លៀង​ និងលំនៅឋាន ហើយចំពោះសមិទ្ធិផលដែលកើតមាននៅខេត្តព្រះសីហនុ​ ។

លោកស្រីថា៖យើងនឹងបន្តយកទៅចែករំលែកនៅបណ្តាប្រទេសនានានៅខែ​ឧសភាខាងមុខ​ យើងក៏មានឪកាសធ្វើការងារជាដៃគូរជាមួយរដ្ឋបាលខេត្តព្រះសីហនុ លើគម្រោងចំនួន៣នាពេលកន្លងមក មានដូចជា ១.ការប្រែប្រួលអាកាសធាតុ ២.សំណង់បណ្តោះអាសន្ន ៣.ទីក្រុងឆ្លាតវៃ ដោយផ្អែកលើសមិទ្ធផលដែលយើងទទួលបាននាពេលកន្លងមក អង្គការ UN-Habitat បន្តសកម្មភាពថ្មី មានដូចជា​លំនៅឋាន សំណង់បណ្តោះអាសន្ន​ និងការ​ប្រែប្រួលអាកាសធាតុ ដោយសារកម្ពុជាមានហានីភ័យ និងការបន្សំទៅនឹងការប្រែប្រូលអាកាសធាតុលើលំ​នៅឋានដែលមានតម្លៃសមរម្យ​ យើងបន្តការងារភាពជាដៃគូរជាមួយរដ្ឋបាលខេត្តព្រះសីហនុ រួមចំណែកអភិវឌ្ឍខេត្តព្រះសីហនុប្រកបដោយនិរន្តរភាព​ ចំពោះផែនការសកម្មភាពទីក្រុងឆ្លាតវៃ​ យើងនឹងបន្តសិក្សាជាមួយរដ្ឋបាលក្រុង ខេត្ត ដើម្បីពង្រឹងកិច្ចសហប្រតិបត្តិការទៅថ្ងៃខាងមុខ ដើម្បីជំរុញអភិវឌ្ឍខេត្តព្រះ​សីហនុមានការរីកចម្រើន ៕

ដោយ៖ ងូ សុមុនី