AKP ភ្នំពេញ ថ្ងៃទី២៧ ខែមេសា ឆ្នាំ២០២៦ -- ក្រុមកីឡាតេក្វាន់ដូជាតិបុរសនិងនារីរបស់ប៊ុលហ្គារី បានឈ្នះមេដាយមាសចំនួនបីនៅក្នុងព្រឹត្តិការណ៍ប្រកួត British Open Kyorugi 2026 នៅទីក្រុងមេនឆេស្ទ័រ កាលពីថ្ងៃអាទិត្យ ដោយកីឡាករ រីស្ទីយ៉ាន់ ចចជីវ (Hristiyan Georgiev) កីឡាករ ស្តេហ្វេន ស្តាម៉េណូវ (Stefan Stamenov) និងកីឡាការិនី អាឡិចសាន់ដ្រា ចចជីវ៉ា (Alexandra Georgieva) សុទ្ធតែជាអ្នកឈ្នះ។

ក្រុមដែលបច្ចុប្បន្នកំពុងស្ថិតនៅក្នុងជំរុំហ្វឹកហាត់មួយនៅទីក្រុងមេនឆេស្ទ័រនេះ បានប្រកួតប្រជែងនៅក្នុងព្រឹត្តិការណ៍ British Open។ អត្តពលិកប៊ុលហ្គារីបីនាក់ក្នុងចំណោមអត្តពលិកទាំងប្រាំមួយនាក់ដែលហ្វឹកហាត់នៅទីនោះ បានចូលរួមក្នុងព្រឹត្តិការណ៍នេះ និងឈ្នះមេដាយមាសចំនួនបី។

នៅក្នុងវិញ្ញាសាទម្ងន់ ៥៤គីឡូក្រាមផ្នែកបុរស កីឡាករ រីស្ទីយ៉ាន់ ចចជីវ ដែលជាកីឡាករលំដាប់កំពូល បានបើកការប្រកួតដោយឈ្នះ ២-០ទៅលើគូប្រជែងជនជាតិអ៊ីតាលី។ បន្ទាប់មកកីឡាកររូបនេះបានយកឈ្នះគូប្រជែងជនជាតិអារ៉ាប៊ីសាអូឌីត មុនពេលយកឈ្នះអត្តពលិកឥណ្ឌូណេស៊ីម្នាក់នៅវគ្គពាក់កណ្តាលផ្តាច់ព្រ័ត្រ។ នៅវគ្គផ្តាច់ព្រ័ត្រ កីឡាករ ចចជីវ បានបង្ហាញកម្រិតសមត្ថភាពរបស់លោក ដោយយកឈ្នះគូប្រជែងជនជាតិអេស្ប៉ាញម្នាក់ ដោយដណ្តើមបានមេដាយមាស។

នៅក្នុងវិញ្ញាសាទម្ងន់ ៧៤គីឡូក្រាមផ្នែកបុរស កីឡាករ ស្តេហ្វេន ស្តាម៉េណូវ បានឈ្នះការប្រកួតបួនលើកជាប់ៗគ្នា។ កីឡាកររូបនេះបានយកឈ្នះគូប្រជែងមកពីសហរដ្ឋអាមេរិក ដាណឺម៉ាក និងចក្រភពអង់គ្លេស បន្ទាប់មកបានយកឈ្នះគូប្រជែងជនជាតិដាណឺម៉ាកម្នាក់ទៀតនៅវគ្គផ្តាច់ព្រ័ត្រ ដោយដណ្តើមបានមេដាយមាស។

ក្នុងវិញ្ញាសាទម្ងន់ ៤៩គីឡូក្រាមផ្នែកនារី កីឡាការិនី អាឡិចសាន់ដ្រា ចចជីវ៉ា បានឈ្នះមេដាយមាសបន្ទាប់ពីទទួលបានជ័យជម្នះយ៉ាងគួរឱ្យជឿជាក់លើគូប្រជែងមកពីប្រទេសម៉ារ៉ុក សហរដ្ឋអាមេរិក និងប៉ូឡូញ៕

ដោយ៖ យា ចិន្ដាខន្ដី (ប្រភព៖ BTA)