AKP ភ្នំពេញ ថ្ងៃទី២៧ ខែមេសា ឆ្នាំ២០២៦ -- ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានសម្តែងការដឹងគុណចំពោះកងទាហានមកពីកូរ៉េខាងជើង ដែលបានចូលរួមក្នុងប្រតិបត្តិការប្រយុទ្ធនៅក្នុងតំបន់ឃឺស។

មេដឹកនាំរុស្ស៊ីរូបនេះ បានថ្លែងនៅក្នុងទូរលេខមួយក្នុងឱកាសនៃការបើកសម្ពោធអគាររំលឹកវិញ្ញាណក្ខន្ធ និងសារមន្ទីររំលឹកវិញ្ញាណក្ខន្ធនៃស្នាដៃប្រយុទ្ធក្នុងប្រតិបត្តិការយោធាក្រៅប្រទេសនៅទីក្រុងព្យុងយ៉ាងថា «ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះទាហានកូរ៉េដ៏អង់អាចក្លាហាន - អ្នកចូលរួមក្នុងប្រតិបត្តិការប្រយុទ្ធនៅក្នុងតំបន់ឃឺស - និងគោរពវិញ្ញាណក្ខន្ធដល់វីរបុរសដែលបានពលីជីវិត»។

លោកប្រធានាធិបតីបានសង្កត់ធ្ងន់ថា «ការប្រយុទ្ធប្រកៀកស្មាជាមួយបងប្អូនរុស្ស៊ីរបស់ពួកគេ កងទាហាន និងមន្ត្រីកូរ៉េ បានបង្ហាញពីភាពក្លាហានពិសេស និងភាពមិនគិតពីប្រយោជន៍ផ្ទាល់ខ្លួនដែលមិនអាចបំភ្លេចបាន។ស្នាដៃដែលមិនអាចប្រៀបផ្ទឹមបានរបស់ពួកគេនឹងនៅតែស្ថិតស្ថេរជារៀងរហូតនៅក្នុងចិត្តរបស់ពលរដ្ឋរុស្ស៊ីគ្រប់រូប»។

ប្រមុខរដ្ឋរូបនេះបានកត់សម្គាល់ថា វិមានរំលឹកវិញ្ញាណក្ខន្ធដែលបើកសម្ពោធនៅថ្ងៃនេះ មានបំណងរក្សាការចងចាំអំពីវីរភាពរបស់ទាហានកងទ័ពប្រជាជនកូរ៉េ និងការលះបង់ដែលបានធ្វើឡើងដើម្បីជាប្រយោជន៍នៃជ័យជម្នះរួម។ លោក ពូទីន បានសម្តែងទំនុកចិត្តថា វិមានរំលឹកវិញ្ញាណក្ខន្ធនេះនឹងក្លាយជានិមិត្តរូបដែលអាចមើលឃើញនៃមិត្តភាព និងឯកភាពរបស់ប្រជាជនយើង។

មេដឹកនាំរុស្ស៊ីរូបនេះក៏បានសម្តែងការដឹងគុណយ៉ាងជ្រាលជ្រៅផងដែរចំពោះមេដឹកនាំកូរ៉េខាងជើង លោក គីម ជុងអ៊ុន (Kim Jong Un) និងអ្នករាល់គ្នាដែលពាក់ព័ន្ធនឹងការអនុវត្តគម្រោងទ្រង់ទ្រាយធំនេះក្នុងរយៈពេលដ៏ខ្លីបំផុត ដែលត្រូវនឹងខួបនៃការរំដោះតំបន់ឃឺសពីការឈ្លានពាន៕

ដោយ៖ យា ចិន្ដាខន្ដី (ប្រភព៖ តាសស៍)